រាជធានីភ្នំពេញ៖ សាធារណជន ពិសេសអ្នកគាំទ្រចង់ដឹងថា អ្នកនាងឱក សុគន្ឋកញ្ញាដែលពពោះកូនលើកដំបូងនេះជាកូនស្រី ឬប្រុសនិងចង់ដឹងថា ពេលណានាងសម្រាកកាយថែទាំបុត្រ ដ្បិតនៅឃើញនាងធ្វើជាគណៈកម្មការប្រលងចម្រៀងនៅឡើយខណៈពោះកាន់តែធំ ។ អ្នកនាងឱក…
រាជធានីភ្នំពេញ៖ សាធារណជន ពិសេសអ្នកគាំទ្រចង់ដឹងថា អ្នកនាងឱក សុគន្ឋកញ្ញាដែលពពោះកូនលើកដំបូងនេះជាកូនស្រី ឬប្រុសនិងចង់ដឹងថា ពេលណានាងសម្រាកកាយថែទាំបុត្រ ដ្បិតនៅឃើញនាងធ្វើជាគណៈកម្មការប្រលងចម្រៀងនៅឡើយខណៈពោះកាន់តែធំ ។
អ្នកនាងឱក សុគន្ឋកញ្ញា កន្លងមកបង្ហាញឲ្យដឹងថានាងមានផ្ទៃពោះ តែមិនបានប្រាប់ឲ្យដឹងថាជាកូនប្រុស ឬស្រីទេ ។ ក្រោយពេលរៀបររួចបានប៉ុន្មានខែមកនេះ អ្នកនាងកញ្ញាបានប្រកាសប្រាប់ឲ្យមហាជនដឹងគ្រប់គ្នាថា នាងមានកូនក្នុងផ្ទៃជាលើដំបូង ហើយមហាជនក៏បានឃើញច្បាស់តាមរយៈកម្មវិធីប្រលងចម្រៀងពេលនាងចូលរួមធ្វើគណៈកម្មការ ។
ជាមួយគ្នានៃការប្រកាសនេះដែរ ស្រាប់តែអ្នកនាងឱក សុគន្ធកញ្ញា បានថ្លែងថានាង និងស្វាមីបានដាក់ក្តីប្រាថ្នាកូនដំបូងនៅក្នុងផ្ទៃសុំឲ្យកើតមកជាកូនភ្លោះ ព្រោះអ្នកទាំងពីរពិតជាចង់បានកូនភ្លោះណាស់ ។ លើសពីនេះអ្នកនាងឱក សុគន្ធកញ្ញា បានបន្ថែមថា ទោះបីជាកូនដំបូងភ្លោះ ឬមិនភ្លោះក៏ដោយ នៅតែស្រលាញ់ខ្លាំង ម្យ៉ាងទៀតបើបានកូនប្រុសរឹតតែល្អ ។
ក្នុងពេលចូលរួមកម្មវិធីចុះហត្ថលេខាជាមួយក្រុមហ៊ុនម្សៅទឹកដោះគោមួយ ក្រោមការចូលរួមពីតារាមួយចំនួនផងនោះ អ្វីដែលគួរឲ្យចាប់អារម្មណ៍ អ្នកនាងឱក សុគន្ឋកញ្ញា និងលោកអ៊ឹង សុខលី ជាស្វាមីបានបណ្តើរគ្នាយ៉ាងផ្អែមល្ហែម ទឹកមុខញញឹមស្រស់ស្រាយដូចគ្នាបង្ហាញឲ្យដឹងពីសុភមង្គលក្នុងគ្រួសារក្រោយសំពះផ្ទឹមរួមរស់ក្នុងភាពជាប្ដីប្រពន្ធ ។
នាពេលនោះអ្នកនាងឱក សុគន្ឋកញ្ញា បានទម្លាយរឿងពពោះថា ដោយសារតែចុះកិច្ចសន្យាជាមួយក្រុមហ៊ុនម្សៅទឹកដោះគោទើបកន្លងមកមិនដែលហ៊ាននិយាយថា កូនក្នុងផ្ទៃដែលពពោះ៦ខែនេះស្រី ឬប្រុស ។ ជាចម្លើយកូនរបស់អ្នកនាង គឺកូនប្រុស ហើយទាំងនាង និងលោកសុខលី ជាស្វាមីបានដាក់ឈ្មោះក្រៅថា «ឆលី» ព្រោះជាឈ្មោះស្រឡាញ់ ។ ចំពោះឈ្មោះក្នុងបញ្ជីជាតិមិនទាន់ជ្រើសរើសទេរង់ចាំប្រសូតសិន ។ តាំងពីពពោះបាន២ខែមកនាងមិនចាញ់ទេ ហើយអាចចេញទៅបំពេញការងារក្នុងសិល្បៈបានយ៉ាងល្អ។
«នាងខ្ញុំពពោះនៅតែប្រឡូកការងារសិល្បៈហើយនឹងបន្តរហូតឆ្លងទន្លេទើបសម្រាក ដោយបានសម្រុកថតចម្រៀងទុកជាចំណងដៃនៅពេលសម្រាកមាតុភាព ។ ខ្ញុំមិនចង់ឃ្លាតឆ្ងាយពីអ្នកគាំទ្រច្រើនខែទេ ទើបខំចេញបំពេញការងារទាំងពពោះ ហើយថតបទចម្រៀងទុកដើម្បីបំពេញសំណូមពរទស្សនិកជនដែលចូលចិត្តចម្រៀងរបស់នាងខ្ញុំតាំងពីដើមមក»៕ (កែសម្រួលដោយ ៖ បុប្ផា)
ចែករំលែកព័តមាននេះ