រាជធានីភ្នំពេញ ៖ ក្នុងនាមជាកូន លោក គង់ បុរាណ បានចេញមុខប្រតិកម្ម និងថ្កោលទោសយ៉ាងខ្លាំងទៅកាន់តួអង្គផ្ទះលេខ២មួយរូប ដែលតែងខ្លួនជាព្រឹទ្ធាចារ្យ គង់…
រាជធានីភ្នំពេញ ៖ ក្នុងនាមជាកូន លោក គង់ បុរាណ បានចេញមុខប្រតិកម្ម និងថ្កោលទោសយ៉ាងខ្លាំងទៅកាន់តួអង្គផ្ទះលេខ២មួយរូប ដែលតែងខ្លួនជាព្រឹទ្ធាចារ្យ គង់ ណៃ ហើយសម្តែងបែបអសីលធម៌ និងប្រមាថមើលងាយមកលើឪពុករបស់លោក ដែលមហាជនខ្មែរទូទាំងប្រទេសគោរពស្រឡាញ់ ។
លោកបានចាត់ទុកទង្វើពីក្រុមសម្តែងរបស់ផ្ទះលេខ២នាពេលនេះ គឺជាទង្វើបែបអសីលធម៌ និងមិនអាចទទួលយកបានឡើយ ដ្បិតកាលពីឪពុកលោកនៅរស់មិនដែលច្រៀងមើលងាយ ឬប្រមាថមកលើជាតិសាសន៍មួយនេះឡើយ ។ ការចេញមុខប្រតិកម្មពីលោកគង់ បុរាណ នាពេលនេះ បានធ្វើឡើង បន្ទាប់ពីរូបភាពវីដេអូមួយដែលត្រូវបានគេចែកចាយតាមបណ្តាញសង្គម ដោយបង្ហាញពីសម្មភាពតួអង្គពីររូប ដោយនៅក្នុងនោះ មានតួអង្គម្នាក់បានតុបតែងខ្លួនធ្វើដូចជាព្រឹទ្ធាចារ្យ គង់ ណៃ ដោយមានកាន់ចាប៉ីដងវែងផងដែរ ។
ការសម្តែងនោះ មានតួអង្គម្នាក់បានដើរទៅវាយក្បាលលើតួអង្គដែលតែងខ្លួនជាព្រឹទ្ធាចារ្យ គង់ ណៃ ដែលសម្មភាពនេះ បានធ្វើឲ្យមហាជនខ្មែរសម្តែងការខឹងសម្បារយ៉ាងខ្លាំង និងបានថ្កោលទោសចំពោះទង្វើបែបអសីលធម៌ និងប្រមាថមើលងាយពីសំណាក់អ្នកសម្តែងដែលជាជាតិថៃទាំងនេះ ។
យ៉ាងណា ក្រោយឃើញរូបភាពវីដែអូនេះ លោក គង់ បុរាណ ដែលជាកូនប្រុសរបស់លោកព្រឹទ្ធាចារ្យ គង់ ណៃ បានចេញមុខប្រតិកម្ម និងថ្កោលទោសយ៉ាងខ្លាំង ចំពោះសកម្មភាពសម្តែងបែបអសីលធម៌ និងការប្រមាថម៉ាក់ងាយមកលើរូបឪពុកលោកនាពេលនេះ ។
លោក គង់ បុរាណ បានលើកឡើងប្រាប់កោះសន្តិភាពថា នៅពេលដែលលោកបានឃើញវីដែអូមួយនេះ លោកពិតជាមានអារម្មណ៍ឈឺចាប់ខ្លាំង ដោយសារឪពុករបស់លោកគឺជាព្រឹទ្ធចារ្យចាប៉ីដងវែង ដែលមានកេរ្តិ៍ឈ្មោះទាំងក្នុង និងក្រៅប្រទេស ដោយគេទទួលស្គាល់ពីទេពកោសល្យរបស់គាត់ បែរជាត្រូវគយកមកប្រមាថបែបនេះ ។
លោកបន្តថា អ្វីដែលធ្វើឲ្យលោកមានការឈឺចាប់បំផុត គឺពេលនេះឪពុកលោកបានលាចាកលោកទៅកាន់ទីឋានស្ងប់សុខទៅហើយ ហេតុអីក៏ពួអាចង្រៃទាំងអស់នេះ យករូបភាពមកប្រមាថដូច្នេះទៅវិញ វាពិតជាមិនអាចទទួលយកបាននោះឡើយ ។
លោកថា បើសិនជាគាត់នៅមានព្រះជន្មនោះមិនសូវមានបញ្ហាអ្វីឡើយ តែនេះគាត់ស្លាប់បាត់ទៅហើយ ហេតុអី យករូបភាពមួយនេះមកប្រមាថដល់គាត់ អញ្ចឹងខ្ញុំពិតជាឈឺចាប់ណាស់ ព្រោះមិននឹកស្មានថា ពួកអស់នេះវាធ្វើដល់ថ្នាក់នឹង ទាំងដែលគាត់មិនដែលធ្វើអាក្រក់ណាមួយដល់ជនជាតិ និងជាតិសាសន៍វាសោះ ។
លោកបញ្ជាក់ថា វាអាចយករូបអ្នកណាដែលវាមិនពេញចិត្តមកធ្វើ តែនេះឪពុកលោកជាអ្នកពិការភ្នែក ហើយជាមនុស្សដែលមានកេរ្តិ៍ឈ្មោះល្បីទូទាំងប្រទេស និងទទួលស្គាល់ទូទាំងពិភពលោកថែមទៀត មិនគួរណាវាយកធ្វើជាវីដេអូបែបនេះឡើយ ។
លោក គង់ បុរាណ បន្ថែមថា សម្រាប់ទង្វើបែបនេះ លោកពិតជាមានការឈឺវចាប់ណាស់ ហេតុនេះ លោកសន្យានឹងបន្តធ្វើពហិកាមិនប្រើប្រាស់របស់របរផ្សេងៗពួកវាឡើយ ហើយបើសូម្បីតែឈ្មោះប្រទេសមួយនេះ ក៏លោកមិនចង់ដឹង និងចង់ឮដែរ ។
បើតាមលោក គង់ បុរាណ តាមរយៈសកម្មភាពខាងលើនេះ ក្នុងនាមក្រុមគ្រួសារលោកព្រឹទ្ធាចារ្យ គង់ ណៃ លោកសូមសំណូមពរទៅដល់ទស្សនិកជនខ្មែរទាំងអស់ជួយលើកតម្លៃសិល្បករយើង ជាពិសេស វិរសិល្បករ ហើយមានមតិតវ៉ា និងថ្កោលទោសចំពោះជនជាតិថៃម្នាក់នេះ ដែលគាត់ហ៊ានបំពាន ធ្វើសកម្មភាពស្មោកគ្រោក មិនសមរម្យ និងអសីលធម៌មកលើឪពុករបស់លោក ។
លោកក៏បានស្នើឲ្យជនជាតិថៃដទៃទៀត កុំឲ្យកើតមាននូវរូបភាពដូចគ្នានេះទៀត ត្រូវមានការយល់ដឹង និងភ្ញាក់រលឹកឡើង ព្រោះឪពុកលោកគឺជាមនុស្សដែលមានតម្លៃដែលមានការគោរពស្រឡាញ់ពីប្រជាជនខ្មែរទាំងមូល ហើយក៏ទទួលស្គាល់ទូទាំងពិភពលោកផងដែរ បើទោះបីជាពេលនេះ ឪពុកលោកលាចាកលោកទៅហើយក្តី ៕
ចែករំលែកព័តមាននេះ