ខេត្តឧត្តរមានជ័យ៖ សេចក្តីរាយការណ៍បន្តឱ្យដឹងថា បឹងអូរជីក ហៅបឹងតាម៉ុក បានហក់ឡើងយ៉ាងខ្លាំងដល់លើស្ពាន ។ តែយ៉ាងណា អាជ្ញាធរពាក់ព័ន្ធបាននិងកំពុងប្រចាំការនៅចំណុចប្រឈមទាំងនោះ ដើម្បីត្រៀមអន្តរាគមន៍ និងបញ្ចៀសចរន្តទឹក…
ខេត្តឧត្តរមានជ័យ៖ សេចក្តីរាយការណ៍បន្តឱ្យដឹងថា បឹងអូរជីក ហៅបឹងតាម៉ុក បានហក់ឡើងយ៉ាងខ្លាំងដល់លើស្ពាន ។ តែយ៉ាងណា អាជ្ញាធរពាក់ព័ន្ធបាននិងកំពុងប្រចាំការនៅចំណុចប្រឈមទាំងនោះ ដើម្បីត្រៀមអន្តរាគមន៍ និងបញ្ចៀសចរន្តទឹក កុំឲ្យប៉ះពាល់ដល់ទីប្រជុំជន និងលំនៅដ្ឋានរបស់ប្រជាពលរដ្ឋ ។ នេះបើតាមប្រភពឱ្យដឹងបន្ត នារសៀលថ្ងៃទី០៦ កញ្ញា នេះ ។ ទោះបីជាយ៉ាងណា សូមបងប្អូនរស់នៅក្បែរនោះ ពិសេសសម្រាប់បងប្អូនជាអ្នកដំណើរ ត្រូវមានការប្រុងប្រយ័ត្នឱ្យខ្ពស់បំផុតពីសុវត្ថិភាពរបស់ខ្លួន ។
ទោះបីមានការប្រឈមខ្លះៗ តែសភាពការណ៍ជំនន់ស្ថិតនៅក្នុងកម្រិតមួយ ដែលយើងអាចគ្រប់គ្រងបាន។ យោងតាមការពិនិត្យជាក់ស្ដែង ស្ថានភាពនេះ ទាមទារនូវការប្រុងប្រយ័ត្នខ្ពស់ពីរទៅបីថ្ងៃទៀត ទើបបានធូរស្រាល ។ នេះបើតាមចុះពិនិត្យជាក់ស្តែងនៅស្ថានភាពទឹកនៅខេត្តឧត្តរមានជ័យ ។
គួរបញ្ជាក់ថា លោក ញើន កួន ប្រធានមន្ទីរធនធានទឹក និងឧតុនិយមខេត្តបានឱ្យដឹងថា ស្ថានភាពទឹកជំនន់ជាទូទៅក្នុងខេត្តរហូតមកដល់ពេលនេះពុំមានការវាយប្រហារធ្ងន់ធ្ងរដល់លំនៅឋាន ស្រែចំការ ឬតាមប្រព័ន្ធធារាសាស្ត្រនានានៅក្នុងខេត្តទេ ។ លោកបញ្ជាក់ថា ក្នុងករណីកម្រិតទឹកភ្លៀង នៅតែបន្តធ្លាក់ក្នុងបរិមាណចាប់់ពី១០០មម ឡើងទៅ ដែលអំឡុងចាប់ពី២ទៅ៣ថ្ងៃជាប់គ្នាខាងមុខទៀត ក៏នឹងអាចតំបន់មួយចំនួនរងការជន់លិច ពីជំនន់ទឹកភ្លៀងផងដែរ ។
លោកបន្តថា កម្រិតទឹកភ្លៀងធ្លាក់ ពីខ្សោយទៅមធ្យមរហូតដល់ថ្ងៃទី២៥ សីហា មេឃភ្លៀងធ្លាក់ខ្លាំងចាប់ពី២៥មម ទៅ១០០មម ហើយមកដល់ព្រឹកថ្ងៃទី៥ កញ្ញា ទឹកជំនន់មិនទាន់ដល់ប្រកាសអាសន្នទេ តែក៏ស្ថិតនៅក្នុងការប្រុងប្រយ័ត្នប៉ុណ្ណោះ ក្នុងចំណោមប្រព័ន្ធធារាសាស្ត្រទូទាំងខេត្ត តូចនិងមធ្យមចំនួន៧៨កន្លែង ។ ហើយអាងស្តុកទឹកមួយចំនួនមានទឹកពេញតាមស្តង់ដាកំណត់ នឹងត្រូវបើកបង្ហូរទឹក ពីតំបន់អាងស្តុកទឹកនៅស្រុកត្រពាំងប្រាសាទ ឆ្លងកាត់ស្រុកអន្លង់វែង ក្រុងសំរោង និងស្រុកចុងកាល់ ព្រោះអាងស្តុកទឹកនៅផ្នែកចុងខេត្តពុំមានទឹកគ្រប់គ្រាន់នោះឡើយ ។
លោកបានបន្ថែមថា នៅព្រឹកថៃ្ងទី៥ កញ្ញា បរិមាណទឹកភ្លៀងដែលបានធ្លាក់កម្ពស់១១០មម បានបង្កឲ្យមានជំនន់ទឹកភ្លៀងជន់លិចលើកំណាត់ផ្លូវជាតិប្រវែង១០០ម៉ែត្រ ស្ថិតនៅភូមិត្រាំប៉ោង និងផ្លូវលំ ក្នុងភូមិអូររំដួល ឃុំព្រះប្រឡាយ ស្រុកត្រពាំងប្រាសាទ ។ (សម្រួលដោយ៖ ស្រីណា)
ព័ត៌មានបន្ថែម កោះសន្តិភាពនឹងមានផ្សាយជូនបន្ត ។
ចែករំលែកព័តមាននេះ