រាជធានីភ្នំពេញ ៖ ក្រុមហ៊ុនភ្នំពេញ លែន ឃែភីថល ភីអិលស៊ី បានចុះកិច្ចព្រមព្រៀងភាពជាដៃគូយុទ្ធសាស្ត្រ ក្នុងទំហំទឹកប្រាក់ចំនួន ៥.៦លានដុល្លារសហរដ្ឋអាមេរិច កាលថ្ងៃទី២៩ ខែសីហាឆ្នាំ ២០១៩ នៅសណ្ឋាគារ សូហ្វីតែលភ្នំពេញភូគីត្រា សម្រាប់ការវិនិយោគរួមគ្នាលើសេវាកម្មសុខាភិបាល និងសេវាកម្មគ្រប់គ្រងអាជីវកម្ម ។
កិច្ចព្រមព្រៀងត្រូវបានចុះហត្ថលេខាដាច់ដោយឡែកពីគ្នារវាងលោកជំទាវ សែ លីលី ប្រធានក្រុមប្រឹក្សាភិបាលនៃក្រុមហ៊ុនភ្នំពេញ លែន ឃែភីថល ភីអិលស៊ី ជាមួយលោកស្រី អ៊ិន ថៃរ៉ូហ្សាលីន ប្រធានក្រុមហ៊ុន Max Icon Plc, លោកស្រីវេជ្ជបណ្ឌិត ឃួន លីដា ប្រធានក្រុមហ៊ុន Aurora Capital Plc និង លោក វ៉ាន ច័ន្ទដារិទ្ធ ប្រធានក្រុមហ៊ុន Fourmi Rouge Plc។
យោងតាមលោក Rory Cox នាយក នាយកវិនិយោគនៃក្រុមហ៊ុនភ្នំពេញ លែន ឃែភីថល ភីអិលស៊ី បានឲ្យដឹងថា «ការបណ្តាកទុនរួមគ្នានេះគឺដើម្បីផ្តល់ដល់ប្រទេសកម្ពុជានូវគោលដៅមួយធ្វើ៎ឲ្យការរស់នៅរបស់ប្រជាពលរដ្ឋប្រកបដោយភាពទាន់សម័យ។ យើងរីករាយបង្កើតទំនាក់ទំនងសហប្រតិបត្តិការឲ្យកាន់តែជិតស្និទ្ធថែមទៀតដើម្បីធានាបាននូវភាពជោគជ័យនៃគម្រោងដ៏ធំរបស់យើងគឺទីក្រុង អៃ ស៊ីធី» ។
សូមបញ្ជាក់ថា Max Icon Plc ជាក្រុមហ៊ុនមេ ដែលបានបង្កើតក្រុមហ៊ុនបុត្រសម្ព័ន្ធពីរផ្តល់សេវាកម្ម ផ្នែកទន្តសាស្ត្រ និងរោគសើស្បែក គោរពតាមបទដ្ឋាន ISO ។ នៅក្នុងឆ្នាំខាងមុខ ក្រុមហ៊ុន គ្រោងនឹងបើកសាខា Jordan Petra Dental ចំនួន៤បន្ថែមទៀត ។ អតិថិជននឹងមានឱកាសទទួលបានការព្យាបាលប្រកបដោយវិជ្ជាជីវៈ ដោយវេជ្ជបណ្ឌិត ដែលមានបទពិសោធន៍ក្នុងតម្លៃសមរម្យ ។
Aurora Capital Plc ជាក្រុមហ៊ុនមេ ដែលបានបង្កើតក្រុមហ៊ុនបុត្រសម្ព័ន្ធពីរ គឺ Maxicare Pediatric Clinic Co., Ltd. និង Bright Mind Co., Ltd. ដែលក្រុមគ្រូពេទ្យមានជំនាញច្បាស់លាស់បញ្ចប់ការសិក្សាពីប្រទេសបារាំង អូស្ត្រាលី និងកូរ៉េ ។ Bright Mind ផ្តោតលើការពិនិត្យព្យាបាលកុមារជួបបញ្ហាជំងឺ Autism ដោយក្រុមជំនាញជាជនជាតិបរទេស ។ គ្លីនិក Maxicare Pediatric មានបំរើសេវាកម្ម២៤ម៉ោង ក្នុង១ថ្ងៃ ដល់អតិថិជន ។ ក្រុមហ៊ុនបានសម្រេចចិត្តចូលរួមជាដៃគូយុទ្ធសាស្ត្រ ដើម្បីផ្តល់សេវាកម្មថែទាំសុខភាពដល់អ្នករស់នៅក្នុង អៃ ស៊ីធី ក៏ដូចជាប្រជាពលរដ្ឋនៅជុំវិញនោះផងដែរ ។
លោក លីវ បូនីតូ នាយកប្រតិបត្តិក្រុមហ៊ុន ហ្វួរមី រ៉ូសហ្ស បានលើកឡើងដែរថា ដោយបានមើលឃើញនូវកំណើនសេដ្ឋកិច្ច ស្ថេរភាពនយោបាយ និងលំហូរចូលជាវិជ្ជមាននៃវិនិយោគិនពីក្រៅប្រទេសមកក្នុងប្រទេសកម្ពុជា ក្រុមហ៊ុន ហ្វួរមី រ៉ូសហ្ស បានចាប់ដៃគូសហការជាមួយក្រុមហ៊ុន ភ្នំពេញ លែន ឃែភីថល ក្នុងការផ្តល់សេវាកម្មសវនកម្ម គណនេយ្យ និងពន្ធដារ ដល់សហគ្រាសដែលនឹងមានវត្តមានក្នុងទីក្រុងដ៏មានសក្តានុពលមួយនេះ និងដើម្បីជួយសហគ្រាសគ្រប់គ្រងហិរញ្ញវត្ថុប្រកបដោយតម្លាភាព។
ក្រុមហ៊ុនក៏ជា Xero Gold Partner ដំបូងគេបង្អស់នៅប្រទេសកម្ពុជា ។ Xero Accounting Software គឺជាកម្មវិធីគណនេយ្យ ដែលកំពុងទទួលបានចំណែកទីផ្សារធំៗនៅបរទេស និងទទួលបានការចាប់អារម្មណ៍នៅក្នុងប្រទេសកម្ពុជា ។
សូមបញ្ជាក់ដែរថា ភាពជាដៃគូបែបនេះ នឹងជំរុញឱ្យមានរលកសហការជាដៃគូលក្ខណៈអន្តរជាតិបន្ថែមទៀត ក៏ដូចជាស្រូបទាញគម្រោងអភិវឌ្ឍន៍វិស័យអចលនទ្រព្យលំដាប់ពិភពលោកមកទីផ្សារកម្ពុជាផងដែរ។ ក្រុមហ៊ុនភ្នំពេញ លែន ឃែភីថល ម.ក គ្រោងនឹងរៀបចំឲ្យមានការចូលរួមបណ្តាក់ទុនជាបន្តបន្ទាប់ទៀតនៅឆ្នាំនេះផងដែរ៕ ដោយសហការ (កែសម្រួលដោយ ៖ បុប្ផា)
ចែករំលែកព័តមាននេះ