ប្រទេសម៉ិកស៊ិក ៖ អាជ្ញាធររាយការណ៍កាលពីថ្ងៃទី២៨សីហាថា ការដុតនិងការបាញ់រះដោយកាំភ្លើងស្វ័យប្រវត្តិក្នុងបារមួយ នៃរដ្ឋVERACRUZរបស់ ម៉ិកស៊ិក បណ្ដាលឲ្យមនុស្សយ៉ាងតិច២៨នាក់ស្លាប់និង៩នាក់រងរបួស។
បណ្ដាសាក្សីគូសបញ្ជាក់ថា បុរស៨នាក់បានលុកចូលនាវេលាយប់ថ្ងៃទី២៧មក២៨សីហាក្នុងបារCABALLO BLANCO ជាបារមួយស្ថិតក្នុងទីក្រុងCOATZACOALCOSជាទីក្រុងកំពង់ផែមួយរបស់ ម៉ិកស៊ិក ដែលមានឧស្សាហកម្មប្រេងកាត។ ពួកអ្នកទាំងនោះមួយចំនួនបានបាញ់រះលើបណ្ដាភ្ញៀវហើយខ្លះទៀតដុតបារនោះដោយដបសាំងដុត។
សាក្សីខ្លះទៀតរៀបរាប់ថាពួកកំណាចទាំងនោះបានចាក់សាំងដុត។ នៅមុខបារដែលឆេះអស់មួយផ្នែកគេអាចឃើញបំណែកនានា និងតុកៅអីរាយប៉ាយ។ សាកសពរបស់នារីជាអ្នករាំម្នាក់គេឃើញដេកដួលលើទីលានរាំ។
ព្រឹកថ្ងៃទី២៨សីហាក្នុងសន្និសីទសារព័ត៌មានជាទម្លាប់ប្រចាំថ្ងៃមួយ ប្រធានាធិបតី ម៉ិកស៊ិក លោកMANUEL LOOEZ OBRADOR បានបរិហារថា នេះជាការវាយប្រហារអមនុស្សធម៌មួយ ដោយលោកលើកឡើងថាវាអាចពាក់ព័ន្ធនឹងអំពើពុករលួយ។
ការវាយប្រហារនេះកើតមានក្នុងតំបន់មួយ ក្នុងចំណោមតំបន់ដែលតែងកើតមានអំពើហិង្សានៅ ម៉ិកស៊ិក ។ រដ្ឋVERACRUZនៅជាប់ឈូងសមុទ្រ ម៉ិកស៊ិក ជារដ្ឋដែលល្បីខាងរត់ពន្ធគ្រឿងញៀនទៅកាន់សហរដ្ឋអាមេរិក។ រដ្ឋនេះតែងជាឆាកនៃការចាប់ពង្រត់មនុស្ស និងការកំហែងធ្វើបាបពួកជនអន្តោប្រវេសន៍។
អភិបាលរដ្ឋនោះលោកCUITLAHUAC GARCIAគូសបញ្ជាក់តាមTWITTERថា តាមលទ្ធផលដំបូងៗនៃការស៊ើបអង្កេតលើអំពើឧក្រិដ្ឋនោះ ក្នុងចំណោមពួកអ្នកវាយប្រហារម្នាក់ធ្លាប់ត្រូវចាប់ខ្លួនកាលពីខែកក្កដា មុនពេលត្រូវដោះលែង៤៨ម៉ោងក្រោយមក ដោយអយ្យការមូលដ្ឋាន តែរឿងនោះត្រូវបានក្រសួងសាធារណៈបដិសេធ។
ប្រធានាធិបតីអះអាងពីព័ត៌មានបែបនេះហើយលោកគូសបញ្ជាក់ថា រដ្ឋាភិបាលរបស់លោកនឹងស្នើឲ្យមានការស៊ើបអង្កេតដោយស៊ីជម្រៅមួយ លើការវាយប្រហារនោះក៏ដូចជាលើបណ្ដាទំនងទំនងរវាងអយ្យការរដ្ឋVERACRUZនិងបណ្ដាក្រុមឧក្រិដ្ឋជន។ លោកថានោះអាចជារឿងពុករលួយដែលយើងត្រូវប្រយុទ្ធប្រឆាំង៕ (កែសម្រួលដោយ ៖ បុប្ផា)
ចែករំលែកព័តមាននេះ