រាជធានីភ្នំពេញ ៖ ថ្នាក់ដឹកនាំក្រសួងពាណិជ្ជកម្មកម្ពុជាបានមានប្រសាសន៍ថាការលើកកម្ពស់ខ្សែចង្វាក់តម្លៃ និងការបង្កើតតម្លៃបន្ថែមក្នុងវិស័យកសិកម្មនៅកម្ពុជា ជាការងារសំខាន់ និងជាការងារអាទិភាពសម្រាប់កម្ពុជាដើម្បីបង្កើនការរួមចំណែករបស់កសិកម្មក្នុងសេដ្ឋកិច្ចជាតិ ក៏ដូចជាជំរុញដល់ការអភិវឌ្ឍឧស្សាហកម្មនៅកម្ពុជា ព្រោះកន្លងមកកម្ពុជានៅខ្វះខាតចំណុចសំខាន់ជាច្រើន ក្នុងការបង្កើតនូវតម្លៃបន្ថែម ជាក់ស្តែងការនាំចេញស្រូវរបស់កម្ពុជាទៅប្រទេសជិតខាង ភាគច្រើនគឺនាំស្រូវសើមចេញ ។
លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានថ្លែងបែបនេះនៅក្នុងជំនួបជាមួយប្រធានក្រុមហ៊ុនប៊ូល័រ លោក ខាលវីន ហ្គ្រីដ័រ និងនាយកប្រតិបត្តិ លោក ស្តេវហ្វាន ច្រាយប័រ (Stefan Scheiber) នៅប្រទេសស្វីសកាលពីថ្ងៃទី២៦ ខែសីហា កន្លងទៅនេះ ។ លោក ប៉ានសូរស័ក្តិ បានលើកឡើងថា« ចំពោះវិស័យនាំចេញស្រូវអង្ករវិញ ការនាំចេញភាគច្រើនរបស់កម្ពុជា គឺមានលក្ខណៈជាស្រូវសើម ដែលបានលក់ទៅកាន់ប្រទេសជិតខាងក្រោយប្រមូលផលភ្លាមៗ ដោយកម្ពុជាមិនមានហេដ្ឋារចនាសម្ព័ន្ធគ្រប់គ្រាន់ក្នុងការសម្ងួតស្រូវ និងរក្សាទុកស្រូវក្នុងរយៈពេលវែង។ ការកសាងឡសម្ងួត និងឃ្លាំងរក្សាទុកស្រូវអង្ករ នឹងបង្កភាពងាយស្រួលសម្រាប់ក្រុមហ៊ុននាំចេញស្រូវអង្ករ ធ្វើការប្រមូលទិញស្រូវពីកសិករកាន់តែច្រើន ដើម្បីរក្សាទុកនឹងធ្វើការកិនជាអង្ករសម្រាប់នាំចេញ ក្នុងពេលមួយសមស្រប និងតម្លៃក្នុងទីផ្សារខ្ពស់ ក៏ដូចជាដោះស្រាយមួយកម្រិតនៃរបាំងបច្ចេកទេសមួយចំនួន ដែលរារាំងដល់ការនាំចេញដោយកម្ពុជា ទៅកាន់ទីផ្សារបរទេស។ លើសពីនោះ ការបង្កើតឡើងនូវឡសម្ងួត និងឃ្លាំងរក្សាទុកស្រូវ នឹងជួយពង្រឹងស្ថិរភាពតម្លៃកសិផលក្នុងស្រុក និងទប់ស្កាត់ការហូរចេញស្រូវទៅកាន់ប្រទេសជិតខាង ព្រមទាំងជួយលើកកម្ពស់ជីវភាពប្រជាកសិករ ក៏ដូចជាការអភិវឌ្ឍសេដ្ឋកិច្ចជនបទ»។
បើតាម លោក ខាលវីន ហ្គ្រីដ័រ ប្រធានក្រុមហ៊ុនប៊ូល័រ ក្រុមហ៊ុនប៊ូល័រ ពិតជាមានសេចក្ដីរីករាយដែលបានចូលរួមក្នុងការអនុវត្តគម្រោងនេះ និងផ្ដល់ឧបករណ៍ដែលមានគុណភាពខ្ពស់ និងមានកិត្តិនាមថ្មីក្នុងពិភពលោកសម្រាប់កម្ពុជា។ លោកបានជម្រាបបន្ថែមថា ប៊ូល័រ មិនត្រឹមតែមានឧបករណ៍សម្រាប់សម្ងួតស្រូវ ឬកសិផលដទៃទៀតនោះទេ ក្រុមហ៊ុនក៏មានឧបករណ៍ច្រើនប្រភេទសម្រាប់កិន និងកែច្នៃកសិផល ទៅជាផលិតផលសម្រេច ដូចជា ម្ហូបអាហារ និងចំណីសត្វ និងឧបករណ៍វិភាគសុវត្ថិភាពចំណីអាហារ ជាដើម។ ជាមួយនឹងការកសាងឡសម្ងួត និងឃ្លាំងស្ដុក ក្រុមហ៊ុនប៊ូល័រ នឹងផ្ដល់ការបណ្ដុះបណ្ដាលដល់អ្នកប្រតិបត្តិការរោងចក្រ និងឃ្លាំងបន្ថែមទៀត។
តាមក្រសួងពាណិជ្ជកម្ម ក្រោមគម្រោងជំរុញផលិតកម្មស្រូវ និងការនាំចេញអង្ករនៅកម្ពុជា ក្រុមហ៊ុនប៊ូល័រ នឹងសាងសង់ឡសម្ងួត និងឃ្លាំងរក្សាទុកស្រូវចំនួនសាងសង់ឡសម្ងួតទំនើបចំនួន ១០ទីតាំង នៅក្នុងខេត្តគោលដៅចំនួន ១០ ដែលអាចស្តុកទិន្នផលស្រូវប្រមាណ ១លានតោន និងអាចសម្ងួតស្រូវ ១៣ពាន់តោន ក្នុងមួយថ្ងៃ សម្រាប់កែច្នៃជាផលិតផលចំណីអាហារ ដើម្បីនាំចេញទៅកាន់ទីផ្សារអន្តរជាតិ៕ កែសម្រួលដោយ ៖សុឃាក់
ចែករំលែកព័តមាននេះ