រាជធានីភ្នំពេញ ៖ តារាចម្រៀងប្រចាំផលិតកម្មហង្សមាសនាង ផន ស្រីខួច បានធ្វើការបដិសេធចោលទាំងស្រុងជុំវិញពាក្យចចាមអារ៉ាមមួយចំនួនដែលដាក់ការសង្ស័យថា តារារូបនេះ ចេញចូលអាមេរិកច្រើនដងដោយសារតែនាងមានគូស្នេហ៍នៅទីនោះ ក្នុងពេលដែលនាងតែងតែបង្ហាញវត្តមាននៅក្នុងទឹកដីមហាអំណាចមួយនេះជាញឹកញាប់ ។
ការសង្ស័យពីសំណាក់មហាជននាពេលនេះបានកើតឡើងបន្ទាប់ពីគេតែសង្កេតឃើញតារាស្រីរូបនេះ តែងបង្ហាញខ្លួននៅក្នុងទឹកអាមេរិកជាបន្តបន្ទាប់ មិនថាការសម្តែង និងការដើរកម្សាន្តជាលក្ខណៈឯកជននោះឡើយ ស្របពេលដែលនាងហាក់ដូចជាស្ងប់ស្ងាត់ក្នុងការចេញបទចម្រៀងថ្មី ។
ជាក់ស្តែងក្នុងពេលថ្មីៗនេះ ផន ស្រីខួច បានបង្ហោះរូបភាពដើរកម្សាន្តជាលក្ខណៈឯកជននៅសហរដ្ឋអាមេរិកជាបន្តបន្ទាប់ ជាមួយនឹងភាពហ៊ឺហារ និងការដើរលែងទៅកន្លែងកម្សាន្តផ្សេងៗ និងការទិញសម្ភារប្រើប្រាស់នៅតាមហាងដ៏ទំនើបមួយចំនួនផងដែរ ។
តាមរយៈសកម្មភាពទាំងអស់នេះនាំឲ្យទស្សនិកជនមានការសង្ស័យថា នាងនេះទំនងជាមានគូស្នេហ៍នៅទីនោះ ដែលបានធានានាងឲ្យមកលេងសហរដ្ឋអាមេរិកជាញឹកញាប់ ក្នុងពេលដែលមួយរយៈចុងក្រោយនេះនាងហាក់មានការប្រែប្រួលនូវរូបសម្រស់ស្រស់សោភាផងនោះ។
យ៉ាងណាក៏ដោយពាក់ព័ន្ធការលើកឡើងខាងលើនេះ ផន ស្រីខួច បានធ្វើការបដិសេធចោលទាំងស្រុង ដោយនាងលើកឡើងថា ការមកអាមេរិកនាពេលនេះ គឺជាការដើរកម្សាន្តជាលក្ខណៈឯកជនប៉ុណ្ណោះ ប៉ុន្តែនាងទទួលស្គាល់ថា ការមកនេះគឺមិនមែនមកដើម្បីសម្តែងប្រាកដមែន ។ ផន ស្រីខួច អះអាងថា នាងមកអាមេរិកលើកនេះ គឺមកលេងពិតមែន ហើយក៏ចង់ស្រាយចម្ងល់បងប្អូនដែរ គឺមកនេះមិនមែនដោយសារតែមានគូរស្នេហ៍នៅទីនេះអ្វីទេ ។
ទោះជាយ៉ាងណា ផន ស្រីខួច បានថ្លែងអំណរគុណដល់ប្រិយមិត្តគាំទ្រនាងទាំងអស់ ដែលតែងតែចាប់អារម្មណ៍ និងតាមដាននូវរាល់សកម្មភាពរបស់នាងទាំងក្នុង និងក្រៅរង្វង់សិល្បៈ ។
គួរំលឹកថា តារាចម្រៀងនាង ផន ស្រីខួច ធ្លាប់ពើបប្រទះនូវរឿងរ៉ាវស្នេហាជាមួយនឹងតារាចម្រៀងរួមទ្រនំ គឺលោក នៅ ស៊ីនឿន កាលពីពេលកន្លងទៅ ប៉ុន្តែទំនាក់ទំនងនោះបានកាត់ផ្តាច់ទៅវិញ បន្ទាប់ពីលោក នៅ ស៊ីនឿន បានជួបនឹងគូស្នេហ៍ថ្មី ។ ជាការកត់សម្គាល់ កាលពីឆ្នាំកន្លងទៅ ផន ស្រីខួច ក៏ត្រូវបានគេសង្ស័យថា បានផ្តើមស្នេហ៍ជាថ្មីជាមួយលោក នៅ ស៊ីនឿន ឡើងវិញបន្ទាប់ពីពួកគេបានជួបគ្នានៅទឹកដីអាមេរិក ក្នុងពេលដែលនាងបានចេញទៅសម្តែងនៅទីនោះរយៈពេល ៣ ខែ ។
ទោះជាយ៉ាងណា ផន ស្រីខួច ក៏នៅតែបដិសេធនូវការយល់ឃើញអំពីរឿងខាងលើនេះ ដោយនាងបញ្ជាក់ថា នាងទៅកម្សាន្តនៅអាមេរិកជាមួយក្រុមគ្រួសាររយៈពេល ៣ ខែតាមការធានារបស់បងស្រីដែលរស់នៅទីនោះផ្ទាល់ ។ តែចៃដន្យ នៅ ស៊ីនឿន ទៅតាមក្រោយ ហើយបងប្អូនខ្មែរនៅទឹកដីមហាអំណាចនេះស្គាល់ថា អ្នកទាំងពីរជាតារាចម្រៀងនៅផលិតកម្មជាមួយគ្នាក៏ចាប់ដៃគូឲ្យច្រៀងជាមួយគ្នាតែម្ដងទៅ ឯរឿងពន្លកស្នេហ៍ដុះឡើងវិញគឺអត់ទេ ។
ផន ស្រីខួច បញ្ជាក់ថា ទំនាក់ទំនងនាង និង នៅ ស៊ីនឿន នៅពេលនេះក្នុងនាមជាមិត្តភ័ក្ដិរួមការងារជាមួយគ្នា មិនបានគិតអ្វីលើសពីនេះនោះទេ ។ ដូច្នេះនាងសុំចិត្តទស្សនិកជនកុំយល់ច្រឡំតទៅទៀត ។
បើតាមនាង ផន ស្រីខួច ប្រសិនបើថ្ងៃណាមួយនាងជួបអ្នកត្រូវចិត្តហើយស្រឡាញ់ និងឲ្យតម្លៃនាងក៏ដូចជាក្រុមគ្រួសារនាង ពេលនោះហើយនាងនឹងប្រកាសប្រាប់ទស្សនិកជនជាសាធារណៈ ប៉ុន្តែពេលនេះនាងអត់ទាន់គិត ព្រោះរវល់ជាមួយការងារសិល្បៈខ្លាំងពេក ៕ (កែសម្រួលដោយ ៖ បុប្ផា)
ចែករំលែកព័តមាននេះ