លោក សម រង្ស៊ី បានប្រកាសថា លោកនិងអតីតមេដឹកនាំគណបក្សសង្គ្រោះជាតិមួយចំនួន ដែលកំពុងស្នាក់នៅក្រៅប្រទេសនឹងវិលត្រឡប់ចូលប្រទេសកម្ពុជាវិញ នៅថ្ងៃទី៩ ខែវិច្ឆិកា ដែលជាថ្ងៃបុណ្យឯករាជ្យជាតិកម្ពុជា ។ ការប្រកាសពេលវេលាដ៏ច្បាស់លាស់នេះ បានធ្វើឱ្យមនុស្សម្នាជាច្រើន អាចនឹងជឿថាគាត់នឹងវិលត្រឡប់មកវិញដូចដែលគាត់បាននិយាយ ប៉ុន្តែក៏មានមនុស្សច្រើនដែរ មិនជឿថាមកទេ ។
នៅពេលជួបអ្នកគាំទ្រនៅក្នុងប្រទេសណូវែលហ្សេឡង់ សម រង្ស៊ី បានធ្វើការិះគន់អំពីរដ្ឋាភិបាលកម្ពុជាបច្ចុប្បន្ន និងវត្តមានរបស់ចិននៅកម្ពុជា ហើយបានប្តេជ្ញាចិត្តថា នឹងវិលត្រឡប់មកកម្ពុជា ដើម្បីឱ្យមានការផ្លាស់ប្តូររបបគ្រប់គ្រង ។
ការប្រកាសរបស់លោក សម រង្ស៊ី ដើម្បីវិលចូលប្រទេសកម្ពុជាវិញនាំឱ្យមានការយល់ខុសគ្នា ដោយខ្លះនៅតែគិតថាគាត់នឹងមិនអាចវិលត្រឡប់ចូលប្រទេសកម្ពុជាវិញទេ ខណៈដែលអ្នកគាំទ្ររបស់គាត់មួយចំនួនក៏មានការសប្បាយចិត្ត ហើយជឿថាមេដឹកនាំរបស់ពួកគេពិតជានឹងវិលត្រឡប់មកវិញ ដូចអ្វីដែលគាត់បាននិយាយ ។
មេដឹកនាំរដ្ឋាភិបាល និងយោធានៅក្នុងប្រទេសកម្ពុជាបានប្រកាសហើយថា នឹងអនុវត្តទៅតាមច្បាប់គឺ ការចាប់លោក សម រង្ស៊ី ដាក់ពន្ធនាគារតាមដីកាតុលាការ ដោយសារតែរូបលោកសម រង្ស៊ីមានជំពាក់ជំពិននឹងរឿងក្តីជាច្រើននៅតុលាការ ។
អ្នកវិភាគមួយចំនួននៅតែសង្ស័យចំពោះភាពក្លាហានរបស់គាត់ ដោយសារកន្លងមក គាត់បាន ប្រកាសជាច្រើនដងពីការវិលត្រឡប់របស់គាត់ប៉ុន្តែវាមិនបានកើតឡើងឡើយ ។ ប៉ុន្តែ បើសិនជាលោក សម រង្ស៊ី ពិតជាវិលត្រឡប់មកកម្ពុជាវិញដោយគ្មានដំណោះស្រាយមែននោះ កម្ពុជានឹងមានស្ថានភាពនយោបាយដ៏តឹងតែងមួយ ។
កម្ពុជានឹងកាន់តែមានការបែកបាក់រវាងក្រុមអ្នកគាំទ្រ គណបក្សកាន់អំណាច និងក្រុមគាំទ្រ ខាងប្រឆាំង ។ ក្រុមគាំទ្រខាងប្រឆាំងនឹងអាចធ្វើការតវ៉ា ខណៈដែលរដ្ឋាភិបាលនឹងអាចធ្វើការបង្ក្រាបដើម្បីការពារ សន្តិភាពនិងសន្តិសុខជាតិ ។
នៅក្នុងដំណើរផ្លូវនយោបាយបែបនេះ ការប៉ះទង្គិចគ្នានិងអំពើហិង្សាអាចនឹងកើតមាន ។ ចំណែកផលប៉ះពាល់របស់វាមកលើនយោបាយនិងសេដ្ឋកិច្ចប្រទេសកម្ពុជា មានទំហំធ្ងន់ធ្ងរឬស្រាល វានឹងអាស្រ័យទៅលើទំហំនៃការតវ៉ានិងអំពើហិង្សាព្រមទាំងប្រតិកម្មពីសហគមន៍អន្តរជាតិ ។ ដោយវិភាគទៅលើផលប៉ះពាល់នៃការវិលត្រឡប់របស់លោក សម រង្ស៊ី ដោយគ្មានដំណោះស្រាយនយោបាយ គ្មានភាគីណា
មួយបានចំណេញពីការវិលត្រឡប់ដែលគ្មានសុវត្ថិភាពនោះឡើយ ។
លោក សម រង្ស៊ី នឹងត្រូវជាប់ពន្ធនាគារ រដ្ឋាភិបាលកម្ពុជានឹងត្រូវបរទេសធ្វើការរិះគន់និងអាចឈានដល់ការដាក់ទណ្ឌ កម្មសេដ្ឋកិច្ច ។ ចំណែក ស្ថិរភាពនយោបាយកម្ពុជានឹងប៉ះពាល់ដោយធ្វើឱ្យប៉ះពាល់ វិនិយោគិន បរទេសនៅប្រទេសកម្ពុជា ។ ធ្ងន់ធ្ងរជាងនេះ ឈាមរបស់ប្រជាពលរដ្ឋខ្មែរ អាចនឹងហូរដោយសារតែការប៉ះទង្គិចគ្នានិងហិង្សាដែលអាចកើតមាន ។
ដូច្នេះផ្លូវដែលល្អមួយសម្រាប់ការវិលត្រឡប់របស់ សម រង្ស៊ី គឺ ត្រូវកើតមានតែនៅពេលណា ដែលមានដំណោះស្រាយដ៏ជាក់លាក់មូយដែលបញ្ចៀសរាល់ការប្រឈមមុខដាក់គ្នា ។ ពីពេលនេះរហូតដល់ថ្ងៃទី៩ ខែវិច្ឆិកា គឺជាពេលវេលាដ៏សំខាន់សម្រាប់ដំណោះស្រាយនយោបាយ ។
ខណៈដែលការប្រកាសពេលវេលាពិតប្រាកដអាចជាយុទ្ធសាស្ត្រមួយសម្រាប់លោកសម រង្ស៊ី ដើម្បីដាក់សម្ពាធឱ្យបានការចរចានយោបាយ ការវិលត្រឡប់គួរតែ កើតមានតែនៅពេល ដែលមានដំណោះស្រាយផ្នែកនយោបាយប៉ុណ្ណោះ ដើម្បីបញ្ចៀសផលប៉ះពាល់ដែលអាចកើតមានចេញពីការវិលត្រឡប់របស់គាត់នោះ ។
រដ្ឋាភិបាលនិងក្រុមប្រឆាំងត្រូវតាំងចិត្តធ្វើការចរចាដើម្បីរកដំណោះស្រាយកណ្តាលមួយដែលចំណេញទាំងអស់គ្នា ។ ដំណោះស្រាយនោះត្រូវផ្អែកទៅលើគោលដៅដើម្បីសន្តិភាព ប្រជាធិបតេយ្យ និងផលប្រយោជន៍ប្រជាជនជាធំ ។ ដើម្បីសម្រេចគោលដៅបែបនេះ វាទាមទារឱ្យភាគីទាំង ពីរធ្វើការសម្របសម្រួលមួយ ដោយហេតុថានៅក្នុងការចរចាគឺវានឹងមិន អាចជោគជ័យឡើយកាល បើភាគីម្ខាងៗ មិនធ្វើសម្បទានខ្លះអំពីគោលជំហររបស់ខ្លួន ។
ស្ថានភាពកម្ពុជាបច្ចុប្បន្ន តម្រូវឱ្យមេដឹកនាំនយោបាយធ្វើការសម្រេចចិត្តយ៉ាងប្រយ័ត្នប្រយ៉ែងបំផុត ដើម្បីចៀសវាងការថ្លោះធ្លោយ ដែលនឹងឱ្យប៉ះពាល់ដល់អនាគតប្រទេសជាតិ និងប្រជាជន ៕
ចែករំលែកព័តមាននេះ