រាជធានីភ្នំពេញ៖ ការអភិវឌ្ឍន៍រាជធានីភ្នំពេញ ត្រូវបានគេមើលឃើញថា បានរីកសាយពីកណ្ដាលទៅកាន់តំបន់ជាយៗក្រុង ជាក់ស្ដែងតំបន់ទួលពង្រ ដែលនៅភាគខាងលិចឈៀងខាងត្បូងរាជធានីភ្នំពេញ ហាក់មានការអភិវឌ្ឍន៍ខ្លាំង ដោយបានកែប្រែពីតំបន់នោះ ពីវាលស្រែ មិនជាទីគាប់ចិត្តពីវិនិយោគិននានាឡើយ ក៏ប៉ុន្តែពេលនេះ វាបានកែប្រែពីតំបន់វាលស្រែ ស្ងាត់ជ្រងំទៅជាតំបន់លំឋានដ៏មានសក្ដានុពល និងបានជំរុញតម្លៃដីធ្លីតំបន់នោះកើនឡើងខ្ពស់ហួសពីការស្មាន ។
បើតាមលោក គីម ហ៊ាង អគ្គនាយកក្រុមហ៊ុន ខ្មែររៀលអ៊ីស្ទេត បានអោយដឹងថាតំបន់ទួលពង្រ ដែលស្ថិតនៅក្នុងទឹកដីខណ្ឌពោធិ៍សែនជ័យ នៅពេលនេះបានអភិវឌ្ឍន៍លឿនមិនគួរអោយជឿជាក់ស្ដែងពីមុនតំបន់នេះគ្រាន់តែវាលស្រែ និងដីបឹង ។ លោកបានបន្តថា «ចំពោះតម្លៃដីធ្លីនៅតំបន់ទួលពង្រ កាលពី១៥ឆ្នាំមុន តម្លៃត្រឹមតែ២០ឬ៣០ដុល្លារក្នុងមួយម៉ែត្រការ៉េ ក៏រកអ្នកទិញស្ទើរមិនបានដែរ ហើយកាលនោះ អ្នកដែលហ៊ានទិញដីនោះ ត្រឹម២០ដុល្លារ ទុកតែពីរខែ លក់វិញបាន៣០ដុល្លារ តែមួយឆ្នាំក្រោយ បើចង់ទិញដីដែលលក់ឱ្យគេត្រឹមតម្លៃ៣០ដុល្លារ ទាល់តែចំណាយក្នុងតម្លៃ៧០ដុល្លារក្នុងមួយម៉ែត្រការ៉េ ពោលគឺដីនោះឡើងជាប្រចាំតែម្ដង» ។
លោកបានបន្តថា តំបន់ទួលពង្របច្ចុប្បន្ននេះ ថ្វីដ្បិតតែវានៅជាយក្រុងមែន តែតម្លៃដីធ្លីឡើងថ្លៃណាស់ ។ ការឡើងថ្លៃដីធ្លីនៅទួលពង្រមិនមែនអត់មូលហេតុនោះទេ ដោយសារតែនៅតំបន់នេះ មានការអភិវឌ្ឍន៍ហេដ្ឋារចនា សម្ព័ន្ធ ហើយការអភិវឌ្ឍន៍ហេដ្ឋារចនាសម្ព័ន្ធនេះដែរក៏ដោយសារតែមានការអភិវឌ្ឍន៍លំនៅឋានរបស់វិស័យឯកជន ការអភិវឌ្ឍន៍រោងចក្រឧស្សាហកម្ម នៅតំបន់នោះ ច្រើនដែរ ទើបតម្រូវឱ្យរដ្ឋត្រូវពង្រីកការអភិឌ្ឍន៍ហេដ្ឋារចនាសម្ព័ន្ធទឹក ភ្លើង ទៅកាន់តំបន់នោះ និងបានជំរុញឱ្យតម្លៃដីធ្លីកាន់តែមានសន្ទុះមួយកម្រិតទៀតផងដែរ ។ លោកបានបន្ថែមថា បច្ចុប្បប្បន្ន តំបន់នេះ ជាមធ្យមម្ចាស់ដីគេទារតម្លៃ៥០០ដុល្លារអាមេរិក ក្នុងមួយម៉ែត្រការ៉េ ខណៈពីមុនត្រឹមតែ២០ដុល្លារ ។ តែលោកបានបញ្ជាក់ថា «តំបន់ហ្នឹង សព្វថ្ងៃនេះ ក្រោម៥០០ដុល្លារក្នុងមួយម៉ែត្រការ៉េ មិនដឹងថាទិញបានឬអត់ផង ព្រោះម្ចាស់ដីភាគច្រើនគេលក់ក្នុងតម្លៃ៥០០ដុល្លារអាមេរិក » ។
លោកឧកញ៉ា ចេង ខេង ប្រធានក្រុមប្រឹក្សាភិបាលសមាគមអ្នកវាយតម្លៃនិងភ្នាក់ងារអចលនវត្ថុកម្ពុជា បានមានប្រសាសន៍ថា ជាធម្មតា មនុស្សកើតរាល់ថ្ងៃ តែដីអត់កើតទេ មានតែរួញ ដូច្នេះទើបតម្លៃដីធ្លី បានកើនឡើងជាបន្តបន្ទាប់ តាំងពីតំបន់ទីប្រជុំជនកណ្ដាលក្រុង ដល់តំបន់ជាយក្រុង ដែលពីមុនមិនមានមនុស្សរស់នៅនោះ ។ លោកថា៖« រហូតមកដល់ពេលនេះ ស្ថានភាពអចលនទ្រព្យនៅតែមិនមានសញ្ញាណាមួយបង្ហាញពីបញ្ហានោះទេ គឺវានៅតែមានភាពល្អប្រសើរដដែល និងត្រូវការវិនិយោគិនបន្ថែម ដើម្បីដាក់ទុនវិនិយោគ ទៅលើវិស័យនេះ » ។ លោកឧកញ៉ាបន្តថា សព្វថ្ងៃ ការវិនិយោគលើអចលនទ្រព្យមិនមែនមានតែនៅភ្នំពេញ ដូចកាលពីមុនទៀតនោះទេ វាបានសាយភាយទៅកាន់តំបន់ជាច្រើននៅតាមបណ្ដាខេត្តដែលមានសក្ដានុពល ដូចជាខេត្តព្រះសីហនុ ខេត្តកំពត ខេត្តកំពង់ចាម សៀមរាប និងតំបន់មួយទៀតនៅតាមជាយរាជធានីភ្នំពេញផងដែរ ។
គួរបញ្ជាក់ថា តំបន់ទួលពង្រនៅពេលនេះ គេឃើញមានក្រុមហ៊ុនបុរីលំនៅឋានធំៗ កំពុងអភិវឌ្ឍន៍សាងសង់ ដែលជាការទាក់ទាញអ្នកមានជីវភាពមធ្យម ទៅរស់នៅនិងប្រកបអាជីវកម្មនៅទីនោះ ស្របពេលតំបន់នោះក៏ជាតំបន់ឧស្សាហកម្មដ៏មានសក្ដានុពលមួយដែរ ហើយរំពឹងថានៅពេលអនាគតដ៏ខ្លីតំបន់នេះ នឹងក្លាយជាតំបន់ដែលមានការអភិវឌ្ឍន៍កាន់តែខ្លាំងថែមទៀត ស្របពេល ការអភិវឌ្ឍន៍ហេដ្ឋារចនាសម្ព័ន្ធ របស់រដ្ឋក៏កំពុងមមាញឹកណាស់ដែរ ៕ កែសម្រួលដោយ ៖សុឃាក់
ចែករំលែកព័តមាននេះ