ខេត្តព្រះសីហនុ ៖ អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ឧត្តមសេនីយ៍ឯក ហ៊ុន ម៉ាណែត បានថ្លែងនូវការព្រមានចាត់វិធានការដោយម៉ឺងម៉ាត់ ចំពោះរាល់ការតែងតាំងមិនប្រក្រតី ក្នុងរូបភាពសូកប៉ាន់ ដើម្បីផលប្រយោជន៍បុគ្គលព្រោះថា បើយើងជ្រើសរើសការតែងតាំងតាមរបៀបសូកប៉ាន់នោះ វាមិនអាចធ្វើឲ្យអង្គភាពមួយធានាបានកត្តាសាមគ្គីភាព ឯកភាព រួមទាំងប្រសិទ្ធ ភាពការងារឡើយ ។
ឧត្តមសេនីយ៍ឯក ហ៊ុន ម៉ាណែត បានព្រមានដូច្នេះ ក្នុងឱកាសចូលរួមក្នុងពិធីប្រកាសតែងតាំងផ្លាស់ប្តូរមុខងារមេបញ្ជាការតំបន់ប្រតិបត្តិការសឹករងព្រះសីហនុ កាលពីថ្ងៃព្រហស្បតិ៍ទី៨ ខែសីហា ឆ្នាំ២០១៩ កន្លងទៅ នៅបញ្ជាការដ្ឋានតំបន់ប្រតិបត្តិការសឹករងព្រះសីហនុ ។ លោក ហ៊ុន ម៉ាណែត បានលើកឡើងថា ការជ្រើសរើសរើសថ្នាក់ដឹកនាំអង្គភាព ឬមេបញ្ជាការ នាយសេនាធិការ បានត្រឹមត្រូវគឺជាកត្តាធានាបានសាមគ្គីភាព ឯកភាព និងប្រសិទ្ធភាពការងារ ។
គោលការណ៍របស់កងទ័ពជើងគោក គឺការជ្រើស រើសថ្នាក់ដឹកនាំអង្គភាពចាប់ពីថ្នាក់តំបន់ប្រតិបត្តិការសឹករង និងកងព្រំដែនឡើងទៅ ត្រូវមានគណៈកម្មការកងទ័ពជើងគោកមួយដើម្បីពិនិត្យវាយតម្លៃ សំដៅធានាបានតម្លាភាពនិងប្រសិទ្ធភាព ។
ឧត្តមសេនីយ៍ឯក ហ៊ុន ម៉ាណែត បានលើកឡើងថា ខេត្តព្រះសីហនុគឺជាខេត្តដែលមានសក្ដានុពលនៃការរីកចម្រើន ដូច្នេះយើងទាមទារកងកម្លាំងប្រដាប់អាវុធរបស់យើងដែលមានលក្ខណៈគ្រប់គ្រាន់ ដើម្បីត្រៀមជួយដល់ប្រជាពលរដ្ឋ និងការងារសន្តិសុខផ្សេងៗ ក្នុងនោះ ផ្ដោតលើមេបញ្ជាការ និងនាយសេនាធិការដែលមានសមត្ថភាព និងឆន្ទៈនៅក្នុងការងារ ។
ផ្ទុយទៅវិញ បើការជ្រើសរើស ការតែងតាំង មិនប្រក្រតីក្នុងរូបភាពសូកប៉ាន់ដើម្បីផលប្រយោជន៍ សូមរកឱ្យឃើញនូវភ័ស្តុតាង និងចាត់វិធានការឱ្យបានម៉ឺងម៉ាត់ ព្រោះយើងទទួលភារកិច្ចពីរាជរដ្ឋាភិបាលក្នុងការជ្រើសរើសថ្នាក់ដឹកនាំអង្គភាព ហើយនេះគឺជាអ្វី ដែលជាការខិតខំរបស់យើង ដើម្បីផ្ដល់ឱកាសទៅដល់អ្នកខិតខំប្រឹងប្រែង អ្នកដែល ធ្វើការយូរនៅក្នុងអង្គភាព ។
ទន្ទឹមនោះ ការជ្រើសរើសថ្នាក់ដឹកនាំអង្គភាពគឺផ្ដោតលើយុត្តិធម៌សម្រាប់បុគ្គល និងយុត្តិធម៌ សម្រាប់អង្គភាព ។ បើយើងផ្តោតយុត្តិធម៌សម្រាប់បុគ្គល គឺយើងថ្លឹងថ្លែងយុត្តិធម៌សម្រាប់អង្គភាព ប្រសិទ្ធភាពការងារ និងការដឹកនាំបញ្ជា ។
លោក ហុ៊ន ម៉ាណែត ថ្លែងថា នេះគឺជាគោលការណ៍របស់កងទ័ពជើងគោក ដើម្បីបញ្ជាក់ឲ្យនាយទាហាន ថ្នាក់ដឹកនាំនៅក្នុងអង្គភាពបានយល់ច្បាស់ ព្រោះការដំឡើងឋានៈ ការតែងតាំងមុខងារណាមួយ មិនមែនជាការផ្ទេរសិទ្ធិអំណាចនោះទេ ។ ប៉ុន្តែ គឺជាការផ្ទេរការទទួលខុសត្រូវបន្ត វេនពីមួយជំនាន់ទៅមួយជំនាន់ ដើម្បីប្រសិទ្ធភាព និងនិរន្តរភាពនៃការបំពេញភារកិច្ចរបស់កងយោធពលខេមរភូមិន្ទ ៕ (សម្រួួលដោយ៖ ស្រីណា)
ចែករំលែកព័តមាននេះ