រាជធានីភ្នំពេញ៖ រហូតមកដល់ពេលនេះគម្រោងមូលនិធិប្រាក់កម្ចីសម្រាប់ផលិតករយកធ្វើទុនផលិតកុនមិនបានចេញជារូបរាងទេ ។ គម្រោងមូលនិធិប្រាក់កម្ចីសម្រាប់ផលិតករយកធ្វើទុនផលិតកុននេះត្រូវគេដឹងថាតាំងពីអំឡុងលោកសុះ ម៉ាច នៅធ្វើជាប្រធានសមាគមសិល្បករខ្មែរមកម្លេះ ប៉ុន្តែក្រោយពីលោកផុតអាណត្តិមក គម្រោងមួយនេះបានស្ងប់ស្ងាត់ទៅវិញ ហើយគេក៏មិនដឹងថា វាកំពុងតែដំណើរការ…
រាជធានីភ្នំពេញ៖ រហូតមកដល់ពេលនេះគម្រោងមូលនិធិប្រាក់កម្ចីសម្រាប់ផលិតករយកធ្វើទុនផលិតកុនមិនបានចេញជារូបរាងទេ ។ គម្រោងមូលនិធិប្រាក់កម្ចីសម្រាប់ផលិតករយកធ្វើទុនផលិតកុននេះត្រូវគេដឹងថាតាំងពីអំឡុងលោកសុះ ម៉ាច នៅធ្វើជាប្រធានសមាគមសិល្បករខ្មែរមកម្លេះ ប៉ុន្តែក្រោយពីលោកផុតអាណត្តិមក គម្រោងមួយនេះបានស្ងប់ស្ងាត់ទៅវិញ ហើយគេក៏មិនដឹងថា វាកំពុងតែដំណើរការ ឬក៏មិនអាចរកច្រកចេញបានបែបណានោះទេ ។
លោកសុះ ម៉ាច ធ្លាប់បានអះអាងថា រដ្ឋាភិបាលបានជំរុញឲ្យមានគម្រោងមូលនិធិប្រាក់កម្ចីសម្រាប់ផលិតករយកមកធ្វើទុនផលិតកុន ។ សមាគមសិល្បៈ ក៏ដូចជាផលិតករបានរួមគ្នាធ្វើគម្រោងនេះ មុនបញ្ជូនឲ្យក្រសួងពាក់ព័ន្ធពិនិត្យ ហើយក្រសួងបញ្ជូនបន្តទៅរដ្ឋាភិបាលពិនិត្យ និងបន្តឲ្យក្រសួងសេដ្ឋកិច្ចរៀបចំកញ្ចប់ថវិកាដាក់ឲ្យខ្ចីមកវិនិយោគផលិតភាពយន្តក្នុងលក្ខខណ្ឌដ៏សមស្របមួយដើម្បីជួយជំរុញឲ្យការផលិតភាពយន្តក្នុងស្រុកកាន់តែមានសន្ទុះ និងមានគុណភាព ។
អតីតប្រធានសមាគមសិល្បករខ្មែរបានអះអាងប្រាប់កោះសន្តិភាពកាលពីពេល ថ្មីៗនេះថា រហូតមកដល់ពេលនេះលោកមិនដឹងពីគម្រោងមួយនេះដើរដល់ណាហើយទេ ។ កាលពីលោកនៅជាប្រធានសមាគមលោកតែងតែខំជួយជំរុញអំពីបញ្ហានេះ តែឥឡូវលោកគ្មានសិទ្ធិទេ ។
លោកសុស ម៉ាច រំឭកថា រដ្ឋាភិបាលធ្លាប់បានលើកឡើងបញ្ហានេះប្រមាណជាជាង៣ឆ្នាំមុន ប៉ុន្តែមកទល់ពេលនេះលោកមិនបានដឹងទេថាតើខាងសមាគមភាពយន្តខ្មែរបានរៀបចំឯកសារ ឬមានការរួបរួមគ្នា ដើម្បីដាក់ទៅក្រសួងពាក់ព័ន្ធ ឬយ៉ាងណាទេ ។ បញ្ហានេះគឺជាមោទនភាពមួយដែររាជរដ្ឋាភិបាលបានគិតគូរដល់វិស័យភាពយន្តខ្មែរយើង ប៉ុន្តែបញ្ហាអាចដំណើរការដល់ណានោះរូបលោកគឺគ្មានសិទ្ធិ និងតួនាទីអ្វីសម្រាប់ដេញដោលសួរបញ្ហានេះទៀតឡើយ ។
បើតាមលោកសុះ ម៉ាច បើមិនមានអ្វីខុសដំណឹងមួយនេះលោកបានឮប្រសាសន៍លោករដ្ឋមន្ត្រីក្រសួងព័ត៌មានដោយផ្ទល់ ហើយបើដំណឹងនេះមិនបានចេញពីមន្ត្រីរដ្ឋាភិបាលទេនោះលោកក៏មិនអាចលើកយកមកនិយាយដែរ ។
ពាក់ព័ន្ធបញ្ហានេះដែរផលិតករលោកមុត ថារី និងអតីតប្រធានសមាគមភាពយន្តខ្មែរលោកឆាយ បូរ៉ា សុទ្ធតែបានអះអាងដូចគ្នាថា លោកហាក់មិនបានដឹងរឿងមួយនេះទេ ប៉ុន្តែប្រសិនបើកគម្រោងនេះអាចចេញជារូបរាងលោកស្វាគមន៍ និងសាទរ ។
រហូតមកដល់ពេលនេះខ្សែភាពយន្តភាគដែលបានដាក់បញ្ចាំងតាមកញ្ចក់ទូរទស្សន៍ហាក់កំពុងតែមានសន្ទុះកើនឡើងជាបន្តបន្ទាប់ បើទោះបីជាភាពយន្តខ្លះទទួលបានការគាំទ្រច្រើន និងខ្លះមិនសូវមានអ្នកទស្សនាក្ដី ។ ភាគច្រើនការផលិតជាខ្សែភាពយន្តភាគដាក់បញ្ចាំងតាមទូរទស្សន៍នោះ គឺខាងស្ថានីយផ្ទាល់ជាអ្នកចេញ ចំណាយ ឯរឿងខ្លះផលិតករចំណាយទុនខ្លួនឯងយកទៅជួលផ្សាយ ។ ក្រៅពីមានការផលិតសម្រាប់បញ្ចាំងតាមរោងផងដែរ ៕ (កែសម្រួលដោយ ៖ បុប្ផា)
ចែករំលែកព័តមាននេះ