រាជធានីភ្នំពេញ ៖ តារាសម្ដែងថ្ពាល់ខួច អ្នកនាងប៉ែន សុផានី ដ្បិតតែមានអាយុច្រើនបន្ដិចមែន តែនៅតែមមាញឹកក្នុងអាជីព ។ តារាសម្ដែងស្រគត់ស្រគំរូបនេះអះអាងថា នាងមិនបោះបង់ចោលអាជីពសិល្បៈឡើយ ទោះជាមានវ័យហក់ទៅមុខក៏ដោយ ។ អ្នកនាងប៉ែន សុផានី ទទួលបានសំឡេងគាំទ្រពីទស្សនិកជន ព្រោះនាងប៉ិនប្រសប់ក្នុងការសម្ដែង ។ បច្ចុប្បន្ននាងបង្ហាញស្នាដៃសម្ដែងនៅតាមកញ្ចក់ទូរទស្សន៍ស្ទើរតែគ្រប់ប៉ុស្ដិ៍ ។
តារាស្រីវ័យក្មេងជាច្រើនដួងចង់មានមុខសម្ដែងឱ្យផលិតកម្មក្នុងស្រុក ល្បីៗដើម្បីពង្រីកកេរ្ដិ៍ឈ្មោះ តែមិនសូវឃើញមុខប៉ុន្មានទេ ខុសពីតារាសម្ដែងចាស់វស្សាប៉ែន សុផានី នៅតែឆក់ចិត្ដម្ចាស់ផលិតកម្មអញ្ជើញឱ្យចូលរួមសម្ដែងយ៉ាងមមាញឹក ។ អ្នកនាងប៉ែន សុផានី សម្ដែងជាតួម្ដាយមើលទៅសក្ដិសមបំផុតស្របនឹងវ័យ និងទម្រង់មុខរបស់ខ្លួន ។អ្នកនាងប៉ែន សុផានី រំឭកថា «បើរំលឹកពីសម័យដែលខ្ញុំចូលសម្ដែងដំបូងគឺពិបាកណាស់ ។ ខ្ញុំមិនបានសិក្សាវិធីសាស្រ្ដសម្ដែងនៅសាលាវិចិត្រសិល្បៈដូចរៀមច្បងមួយចំនួនទេ ។ មុនពេលចូលសិល្បៈ នាងខ្ញុំតែងតែសរសើរថា តារាសម្ដែង ម្នាក់ៗ គេពូកែសម្ដែងណាស់ឱ្យធ្វើតួអ្វីក៏ធ្វើបាន ពិតជាមានសមត្ថភាព ។
ចំពោះនាងខ្ញុំពេលមានឱកាសចូលប្រឡូកដំបូងមានការខ្មាសអៀនណាស់ ។ ពេលទៅថត ម្ដងៗឱ្យតែមានមនុស្សឈរមើលច្រើនធ្វើអ្វីមិនចេញទាំងអស់ ហើយឧស្សាហ៍ប្រាប់អ្នកដឹកនាំថា ខ្ញុំសម្ដែងមិនកើតទេ បើគេមើលច្រើនបែបនេះនោះ ។ ប៉ុន្ដែក្រោយពេលមានការពន្យល់ប្រាប់ពីអ្នកមានបទពិសោធន៍ នាងខ្ញុំក៏ប្រឹងប្រមូលអារម្មណ៍ អ្នកណាមើលអីមើលទៅចាត់ទុកថាគ្មានមនុស្សនៅជិត ចេះតែសម្ដែងទៅមិនខ្វល់ពីអ្នកដទៃ ទើបយើងចេះតែមានឱកាសសម្ដែងបានជោគជ័យពីជំហានដំបូងរហូតមកទល់ពេលនេះ ព្រោះភាពក្លាហានទើបបានផលបែបនេះ» ។
តារាសម្ដែងដែលនៅតែជាប់ឈ្មោះជាស្រ្ដីមេម៉ាយមិនទាន់រៀបការ និងមានកូនប្រុសម្នាក់អាយុជាង ២០ឆ្នាំទៅហើយ តែនៅរក្សាបានភាពស្រស់សោភារូបនេះឱ្យដឹងកាលពីពេល ថ្មីៗនេះថា មានខ្សែរឿងជាច្រើនដែលនាងបានចូលរួមសម្ដែង ពិសេសរឿង ដែលនាងពេញចិត្ដគឺរឿង«ភ្នំទាបជាងស្មៅ» ។ ក្រោយមករឿង«ពិសស្នេហ៍» និងរឿងថ្មីគឺរឿង«ម្ដាយក្មេករើសកូនប្រសា» ។ ក្នុងឈុតរឿងទី៣នេះមានឈុតឆាកសម្ដែងជាច្រើនទម្រង់ទាំងកំប្លែង ទាំងកាច និងកម្សត់ខុសពីមុននាងធ្លាប់តែដើរតួស្លូតគឺស្លូតមែនទែន បើកាចគឺកាចយ៉ាងខ្លាំង តែរឿងទី៣នេះសម្ដែងគ្រប់បែប ហើយមានអ្នកមើលច្រើន ដូច្នេះធ្វើឱ្យនាងពេញចិត្ដ ។
អ្នកនាងប៉ែន សុផានី និយាយថា«ចំពោះខ្ញុំជាតារាសម្ដែងមានការគាំទ្រ ដើម្បីឱ្យនៅតែទទួលជោគជ័យ ខ្ញុំនឹងរៀបចំខ្លួនឱ្យមើលទៅបែបសុភាព ។ រៀបចំខ្លួនមើលទៅឱ្យសមជាម្ដាយគេ ។ បើសម្ដែងបែបជាម្ដាយ យើងត្រូវធ្វើបែបម៉េចឱ្យ ប្អូនៗជំនាន់ក្រោយគោរពស្រឡាញ់ និងអាចប្រាប់ពីគន្លឹះសម្ដែង នោះបានគេហៅថា រៀមច្បងសិល្បៈ» ។ ទាក់ទិននឹងបញ្ហាក្នុងសង្គមគ្រួសារ អ្នកនាងប៉ែន សុផានី តែងតែស្រមៃចង់បានគ្រួសារដែលចេះគិតគូរពីអ្នកផ្ទះ គិតដល់ប្រពន្ធកូនជាសំខាន់។ ទោះជាមេគ្រួសាររវល់បែបណា តែមានពេលឆ្លៀតមកជួបជុំគ្រួសារបានខ្លះ នោះពិតជាសប្បាយចិត្ដ តែពេលនេះអ្នកនាងនៅមិនទាន់សម្រេចចិត្ដជ្រើសរើសអ្នកណាជាគូគាប់ទៀតទេ បើទោះជាមានពាក្យលេចឮថារវាងនាង និងលោកម៉ារ៉ា ប៊ុណ្ណា ទាក់ទងស្នេហាគ្នាក៏ដោយ គឺនោះគ្រាន់តែជាព័ត៌មានក្រៅផ្លូវការប៉ុណ្ណោះ ។ អ្វីដែលសំខាន់ នាងនៅតែចង់ប្រឡូកក្នុងពិភពសិល្បៈដដែល ព្រោះធ្លាប់សាកល្បងឈប់បាន៤ឆ្នាំដែរ ដើម្បីងាកទៅរកស៊ី តែនៅមានគេសួរពេកក៏សម្រេចចិត្ដវិលមកវិញ ក៏ល្បីម្ដងទៀត ៕
ចែករំលែកព័តមាននេះ