ប្រទេសប្រេស៊ីល ៖ អ្នកទោសយ៉ាងតិច៥២នាក់បានត្រូវស្លាប់ កាលពីថ្ងៃទី២៩ ខែកក្កដា ឆ្នាំ២០១៩ ដោយសារការប៉ះទង្គិចគ្នា ក្នុងពន្ធនាគារមួយនាភាគខាងជើងប្រេស៊ីល ដែលនោះជាការកាប់សម្លាប់គ្នាយា៉ងរង្គាលថ្មី ក្នុងពន្ធនាគារនៃតំបន់យុទ្ធសាស្ត្រនោះ ដែលបណ្ដាក្រុមឧក្រិដ្ឋជនឈ្លោះគ្នាលើការរត់ពន្ធកូកាអុីន។
អាជ្ញាធរពន្ធនាគារមូលដ្ឋានបញ្ជាក់ថា អ្នកទោស១៦នាក់ត្រូវគេកាត់ក្បាល។ ហើយការបះបោរចាប់ផ្ដើមនាវេលាម៉ោង៧ព្រឹកម៉ោងក្នុងស្រុក ក្នុងមជ្ឈមណ្ឌលឃុំឃាំងតំបន់ ALTAMIRA រដ្ឋប៉ារ៉ា ស្ថិតក្នុងតំបន់អាម៉ាហ្សូន។ ឆ្មាំគុក២នាក់ត្រូវចាប់ជាចំណាប់ខ្មាំង ប៉ុន្តែត្រូវបានដោះលែងវិញព ្រោះគោលដៅគឺចង់បង្ហាញថា នោះជាការទូទាត់បញ្ជីគ្នា តែរវាងបណ្ដាក្រុមដែលប្រជែងគ្នាធ្វើបងធំប៉ុណ្ណោះ ហើយពុំមែនជាការបះបោរ ដើម្បីតវ៉ាប្រឆាំងលក្ខខណ្ឌនៃការឃុំឃាំងឡើយ។ នេះជាការអះអាងរបស់អភិបាលរដ្ឋប៉ារ៉ា លោកJARBAS VASCONCELOS។
ពួកអ្នកទោសនៃផ្នែកពន្ធនាគារសម្រាប់ដាក់បណ្ដាសមាជិកនៃក្រុមឧក្រិដ្ឋមួយ បានលុកចូលក្នុងផ្នែកមួយទៀតជាកន្លែងឃុំឃាំងពួកអ្នកទោសនៃក្រុមប្រឆាំងគ្នា មុនពេលដុតទីនោះ។ អ្នកនាំពាក្យរបស់អាជ្ញាធរពន្ធនាគារនិយាយថា អ្នកទោសជាច្រើននាក់អាចស្លាប់ដោយថប់ដង្ហើម ព្រោះពុលផ្សែង ហើយតុល្យការអាចមានខ្ពស់ជាងនេះទៀត។
វីដេអូមួយចេញផ្សាយតាមបណ្ដាញសង្គម បង្ហាញក្បាលអ្នកទោស៦នាក់ ដែលគេយកមកគរនៅជាប់នឹងជញ្ជាំងមួយ។ អ្នកទោសម្នាក់បន្ទាប់មកបានយកក្បាលមនុស្សមួយមកទាត់ដូចបាល់។ ក្នុងវីដេអូមួយទៀតគេអាចឃើញបណ្ដាសាកសពមនុស្ស ដែលមានភ្លើងឆេះរោលនៅលើដំបូលមួយ ជាកន្លែងដែលពួកគេរត់គេចចេញពីផ្សែខ្មៅយ៉ាងក្រាស់ ចំណែកអ្នកទោសប្រដាប់ដោយដាវក៏បានរត់ទៅកាន់ទីនោះដែរ។
ក្រសួងយុត្តិធម៌ប្រេស៊ីលក្នុងសេចក្ដីប្រកាសមួយគូសបញ្ជាក់ថា យើងនឹងរៀបចំកន្លែងសមស្របក្នុងបណ្ដាពន្ធនាសហព័ន្ធ ដែលមានកិច្ចការពារសន្តិសុខមាំទាំសម្រាប់បញ្ជូនបណ្ដាមេដឹកនាំ ដែលចូលរួមក្នុងការបះបោរទៅកាន់ទីនោះ។ កាលពីខែកញ្ញាកន្លងទៅ អ្នកទោស៧នាក់បានត្រូវស្លាប់ ក្នុងការបះបោរនៅក្នុងផ្នែកដដែលនោះដែរនៃពន្ធនាគារALTAMIRA ៕ (កែសម្រួលដោយ ៖ បុប្ផា) (ប្រភពវីដេអូ ៖ euronews (en français) & AFP)
ចែករំលែកព័តមាននេះ