ខេត្តព្រះសីហនុ ៖ សេចក្តីរាយការណ៍បឋមឲ្យដឹងថា ក្មេងប្រុសតូចៗ៣នាក់ដោយសារទឹកដោះម្តាយថ្លៃ ត្រូវបានជួយសង្គ្រោះរួចផុតពីគ្រោះថ្នាក់ដល់ជីវិត កាលពីព្រឹកថ្ងៃទី២៨ កក្កដា បន្ទាប់ពីក្មេងប្រុសទាំង៣នាក់នោះ ជាប់កប់ក្នុងភក់ល្បាប់អស់រយៈពេលមួយយប់ ស្ថិតនៅក្បែរផែប្រេងកំពេញ ស្រុកស្ទឹងហាវ ខេត្តព្រះសីហនុ ។ សមត្ថកិច្ចបានការបំភ្លឺពីអ្នកអាណាព្យាបាលក្មេងប្រុសទាំង៣នាក់បានរៀបរាប់ឱ្យដឹងថា ពួកគេបានបាត់ខ្លួនពីផ្ទះ កាលពីវេលាម៉ោងប្រមាណ៥ និង៣០នាទីល្ងាចថ្ងៃ២៧ កក្កដា រហូតដល់ព្រឹកថ្ងៃទី២៨ កក្កដាទេីបក្រុមគ្រួសារ និងអ្នកភូមិស្វែងរកឃេីញ ខណៈពួកគេនៅត្រាំក្នុងរណ្តៅដីល្បាប់មានភក់មួយកន្លែងក្បែរវត្តពោធិមានជ័យ និងត្រូវបានដឹកយកទៅសង្គ្រោះនៅមន្ទីរពេទ្យ ។
សេចក្តីរាយការណ៍បន្តថា ក្មេងប្រុសតូចៗ៣នាក់នោះ ជាបងប្អូនជីដូនមួយនឹងគ្នា រស់នៅឃុំទំនប់រលក ស្រុកស្ទឹងហាវ ខេត្តព្រះសីហនុ ។ បើតាមមន្ត្រីនគរបាលស្រុកស្ទឹងហាវ បានប្រាប់ឲ្យដឹងថា ដំបូងគេបានឃើញក្មេងៗទាំង៣នាក់នោះ រត់លេងតាមរថយន្តដង្ហែរសពទៅកាន់វត្តពោធិ៍មានជ័យដែលទំនងពួកគេតាមរើសលុយ ដែលគេបាចតាមដងផ្លូវដោយក្រុមគ្រួសារសពដើម្បីឧទ្ទិសកុសលដល់វិញ្ញាណក្ខន្ធអ្នកស្លាប់ ។
ក្រោយពីបញ្ចប់ពិធីដង្ហែសព ក្មេងៗទាំង៣នាក់នោះបាននាំគ្នាទៅលេងភក់ក្នុងរណ្តៅកាយដីមួយកន្លែងនៅជិតវត្តពោធិ៍មានជ័យ បណ្តាលឲ្យជាប់នៅក្នុងល្បាប់ភក់នោះ ដោយគ្មាននរណាម្នាក់ដឹងនោះឡើយ និងថាដោយសារតែពេលយប់ មិនមានមនុស្សចាស់នៅជិតឬមានអ្នកឃើញហេតុការណ៍ ទើបធ្វើឲ្យក្មេងទាំង៣នាក់ជាប់នៅក្នុងល្បាប់ភក់នោះអស់ពេលពេញមួយយប់តែម្តង ។
ឪពុកម្តាយក្មេងប្រុស៣នាក់ (គ្រួសារផ្សេងគ្នា) គឺជាអ្នកប្រកបរបរនេសាទ មានទីលំនៅភូមិ១ ឃុំទំនប់រលក ស្រុកស្ទឹងហាវ ខេត្តព្រះសីហនុ នៅវេលាម៉ោង៤ រសៀលថ្ងៃទី២៧ កក្កដា ខណៈដែលវិលត្រលប់មកពីប្រកបរបរនេសាទវិញ ស្រាប់តែមិនឃើញកូនក៏ផ្អើលឆោឡោដល់អ្នកភូមិដែលមានលំនៅឋានក្បែរគ្នាក្នុងភូមិ និងព្រះសង្ឃគង់នៅវត្តពោធិ៍មានជ័យជាច្រើនអង្គ រួមជាមួយសមត្ថកិច្ចនគរបាលប៉ុស្តិ៍រដ្ឋបាលឃុំទំនប់រលកផង បានលើកគ្នាដើររកជាមួយក្រុមគ្រួសារដែលបាត់កូនមួយយប់ទល់ភ្លឺ ទើបរកឃើញក្មេងទាំង៣នាក់ នាំគ្នាអង្គុយនៅក្នុងល្បាប់ភក់មួយកន្លែង មានចម្ងាយប្រមាណជា២០០ម៉ែត្រពីផ្ទះ ដែលពួកគេម្នាក់ៗខ្លួនប្រាណទាំងមូលប្រឡាក់ប្រឡូសដោយភក់ឃើញតែប្រឡង់ភ្នែកនិងមានសភាពហត់ហេវងងុយដេកយ៉ាងខ្លាំង ។
លោកអនុសេនីយ៍ឯក បូ ណាំ នាយនគរបាលប៉ុស្តិ៍រដ្ឋបាលឃុំទំនប់រលក ស្រុកស្ទឹងហាវ បានឲ្យដឹងថា បន្ទាប់ពីមានការភ្ញាក់ផ្អើលនិងទទួលបានពាក្យបណ្តឹងពីម្តាយក្មេងម្នាក់ដែលបាត់ខ្លួន ក្នុងចំណោមក្មេងទាំង៣នាក់ លោកបានដឹកនាំកម្លាំងនគរបាលប៉ុស្តិ៍រដ្ឋបាល សហការជាមួយក្រុមគ្រួសារក្មេង ដែលបាត់ខ្លួនទាំង៣គ្រួសាររួមជាមួយបងប្អូនប្រជាពលរដ្ឋមានទាំងព្រះសង្ឃផង បានដើររុករករហូតដល់វេលាម៉ោង៦និង៣០នាទីព្រឹកថ្ងៃទី២៨ កក្កដា ក៏ប្រទះឃើញក្មេងប្រុសទាំង៣នាក់កំពុងតែអង្គុយនៅក្នុងរណ្តៅដីទំនាបមានទាំងភក់យ៉ាងក្រាស់ គឺជាប់ផុងធ្វើឲ្យពួកគេដើរមិនរួច ដោយសារតែមានស្ថានភាពស្អិតខ្លាំង ។ ក្រោយពេលរកឃើញក៏នាំគ្នាទៅជួយលើកទាញកុមារទាំង៣នាក់ពីក្នុងភក់នាំមកលាងសម្អាតភក់ចេញដែលមើលទៅគួរឱ្យអាណិតក្រៃលែង ។
ក្មេងដែលបាត់ខ្លួនទាំង៣នាក់មានឈ្មោះដូចខាងក្រោម ៖
១-ឈ្មោះ ចៅ កៅ ភេទប្រុស អាយុ៤ឆ្នាំ ជាកូនឈ្មោះ ថុង អៀង (ដែលដាក់ពាក្យ បណ្តឹង) ។
២-ឈ្មោះ ចៅ មឿន ភេទប្រុស អាយុ ៣ឆ្នាំ ។
៣-ឈ្មោះ អឹម សំណាង ភេទ ប្រុស អាយុ៥ឆ្នាំ ។
បន្ទាប់ពីរកឃើញ ឪពុកម្តាយកុមារខាងលើបានថ្លែងអំណរគុណ ដល់សមត្ថកិច្ចនិងបងប្អូនប្រជាពលរដ្ឋ និងព្រះសង្ឃ ចំពោះការជួយជ្រោមជ្រែងក្នុងការរុករកកុមារទាំង៣នាក់ខាងលើបានទាន់ពេលវេលា ៕ (សម្រួលដោយ៖ ស្រីណា)
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ