រាជធានីភ្នំពេញ ៖ តារាពីរគូត្រូវបានគេមើលឃើញថា កំពុងបង្ហាញសញ្ញានឹងចូលរោងការឆាប់ខាងមុខនេះ បន្ទាប់ពីពួកគេបានចាប់ផ្តើមទំនាក់ទំនងស្នេហាយ៉ាងផ្អែមល្ហែម និងបើកជំហរក្នុងរយៈពេលប៉ុន្មានឆ្នាំចុងក្រោយនេះ។
តារាចម្រៀងលោក គូ ម៉ា បានកសាងទំនាក់ទំនងស្នេហាក្រៅឆាកយ៉ាងផ្អែមល្ហែមជាមួយនឹងតារាសម្តែងវ័យក្មេងនាង ម៉ៅ គឹមធីតា ក្នុងពេលដែលតារាសម្តែងមុខស្រស់សម្បុរស្រអែម នាង ឈុំ វត្តី ក៏បាននិងកំពុងសាងភាពផ្អែមល្ហែមជាមួយគូស្នេហ៍របស់ខ្លួនដែលគេស្គាល់ថា ជាអ្នកដឹកនាំការសម្តែងមួយរូបគឺលោក រក្សា ផងដែរ។
ជាការកត់សម្គាល់តារាសម្តែងនាង ម៉ៅ គឹមធីតា បានបង្ហាញរូបថតមួយសន្លឹកជាមួយនឹងតារាចម្រៀងលោកគូម៉ា ជាមួយនឹងសម្លៀកបំពាក់ប្រពៃណីដូចទៅនឹងពីធីមង្គលការ ឬភ្ជាប់ពាក្យ ជាមួយនឹងស្នាមញញឹម ក្នុងពេលដែលតារារូបនេះក៏បានប្រើប្រាស់រូបភាពមួយួនេះធ្វើជា Cover photo ហ្វេសប៊ុករបស់ខ្លួនផងដែរ។
ដោយឡែកសម្រាប់តារាសម្តែងនាង ឈុំ វត្តី វិញ ក៏បានបញ្ចេញនូវរូបភាពថតមុនរៀបការ(Pre-wedding) របស់ខ្លួនជាមួយគូស្នេហ៍ នៅតាមបណ្តាញសង្គមហ្វេសប៊ុកផងដែរ កាលពីពេលថ្មីៗនេះ បន្ទាប់ពីនាងនឹងគូស្នេហ៍បានស្វែងយល់ចិត្តគ្នាបានយ៉ាងល្អនៅក្នុងរយៈពេលចុងក្រោយនេះ។
រូបភាពដ៏ស្រស់ស្អាតដែលបានតុបតែងថតមុនពិធីរៀបការចូលមកដល់នេះត្រូវបាន ឈុំ វត្តី បង្ហោះនៅតាមគណនេយ្យហ្វេសប៊ុករបស់ខ្លួន ដោយមិនមានការលាកលៀមអ្វីឡើយ បើទោះបីជាពេលនេះ ទីផ្សារសិល្បៈរបស់នាងកំពុងតែមានការកាប់ខ្ពស់ក៏ដោយ។
ឈុំ វត្តី ហាក់មិនបានចាប់អារម្មណ៍ពីការបាត់បង់កេរ្តិ៍ឈ្មោះនៅក្នុងពិភពសិល្បៈរបស់នាងឡើយ ក្រោយពេលដែលនាងបានបង្ហាញមុខគូស្នេហ៍ប្រកបដោយភាពផ្អែមល្ហែមយ៉ាងបើចំហរជាបន្តបន្ទាប់ក៏ដោយ។
យ៉ាងណាការបញ្ចេញរូបថតមុនរៀបការរបស់ ឈុំ វត្តី នាពេលនេះរឹតតែបង្ហាញកាន់តែច្បាស់ថែមទៀតថា ស្នេហារបស់នាងកាន់តែរឹងមាំ ហើយនឹងមានដំណឹងចូលរោងការនាពេលខាងមុខនេះ បើទោះបីជាតារារូបនេះនៅមិនទាន់ទម្លាយពីការបរិច្ឆេទច្បាស់លាស់នៅឡើយក្តី៕ (កែសម្រួលដោយ ៖ បុប្ផា)
ចែករំលែកព័តមាននេះ