ប្រទេសរុស្ស៊ី ៖ មិនដល់១សប្ដាហ៍ផងក្រោយការប្រមូលផ្ដុំមនុស្សដ៏ធំ ពុំធ្លាប់មានពីមុនមករបស់ពួកប្រឆាំង កងកម្លាំងប៉ូលិសលើកនេះមិនផ្ដល់ឱកាសឲ្យពួកអ្នកតវ៉ាទៀតទេ ដោយនាថ្ងៃទី២៧កក្កដា ពួកគេដែលប្រមូលផ្ដុំគ្នានៅក្រុងមូស្គូ ត្រូវបានប៉ូលិសបង្រា្កបជាមួយការចាប់ខ្លួនមនុស្សដល់ជាង១០០០នាក់។
ប្រមូលកម្លាំងដ៏ច្រើនកងកម្លាំងប៉ូលិសបានចាប់ខ្លួនពួកបាតុករដ៏ច្រើន ដែលនាវេលារសៀលបានលើកគ្នាដើរហែក្បួនតាមដងវិថីសំខាន់មួយនៃក្រុងមូស្គូ គឺមហាវិថីស្វេស្កាអុីយ៉ាដោយស្រែកពាក្យថា គួរខ្មាស់អៀនណាស់ឬថាយើងចង់ឲ្យមានការបោះឆ្នោតដោយសេរីមួយ។ ពួកគេត្រូវកងកម្លាំងប៉ូលិសបំបែកឲ្យរត់ទៅកាន់បណ្ដាដងវិថីដែលនៅក្បែរ។ យោងតាមតួលេខផ្លូវការរបស់ប៉ូលិសក្រុងមូស្គូថា មនុស្សប្រមាណជា៣៥០០នាក់ ក្នុងនោះមានអ្នកកាសែតវិជ្ជាជីវៈឬមិនវិជ្ជាជីវៈប្រមាណជា៧០០នាក់ បានចូលរួមធ្វើបាតុកម្ម ហើយមនុស្សប្រមាណជា១០១៧នាក់ត្រូវចាប់ខ្លួនពីការប្រព្រឹត្តបទល្មើស។
អង្គការលើកលែងទោសអន្តរជាតិAMNESTY INTERNATIONAL កាលពីយប់ថ្ងៃទី២៧កក្កដាបានបរិហារការប្រើកម្លាំងជ្រុលហួសហេតុរបស់កងកម្លាំងប៉ូលិសរុស្ស៊ី ដោយអំពាវនាវឲ្យដោះលែងជាបន្ទាន់ពួកអ្នកតវ៉ាដោយសន្តិវិធី។ តាមTWITTERមេដឹកនាំប្រឆាំងម្នាក់លោកស្រីអុីលីយ៉ាឡាស៊ីនដែលប្រកាសពីបាតុកម្មធំថ្មីនៅក្រុងមូស្គូនាថ្ងៃទី៣សីហានិយាយថា អាជ្ញាធរបោះបង់ចោលហេតុផលទាំងស្រុង ដោយធ្វើសម្មភាពដ៏សាហាវ។
មុនពេលបាតុកម្មនោះមេដឹកនាំប្រឆាំងច្រើននាក់ក្នុងនោះមានលោកស្រីអុីលីយ៉ាឡាស៊ីន ព្រមទាំងលោកលីអ៊ូបូវស៊ូបុលនិងលោកឌីមីទ្រីហ្គូតកូវបានត្រូវចាប់ខ្លួននាព្រឹកថ្ងៃទី២៧កក្កដា។ តែបន្តិចក្រោយមកអ្នកទាំង៣នាក់នោះត្រូវបានដោះលែងវិញ។ ប៉ុន្តែលោកស្រីអុីលីយ៉ាឡាស៊ីន និងលោកលីអ៊ូបូវសូ៊បុលត្រូវចាប់ខ្លួនជាថ្មីនាវេលាល្ងាច ពេលមានការប្រមូលផ្ដុំគ្នានៅទីលានទ្រូបណាអុីយ៉ា។ ចំណែកផ្ទះរបស់មេដឹកនាំប្រឆាំងច្រើនរូបត្រូវឆែកឆេរ៕ (កែសម្រួលដោយ ៖ បុប្ផា)
ចែករំលែកព័តមាននេះ