ខេត្តកំពង់ស្ពឺ ៖ យុវជនម្នាក់ត្រូវបានកម្លាំងសមត្ថកិច្ចនគរបាលឃាត់ខ្លួនភ្លាមៗបន្ទាប់ពីធ្វើសកម្មភាពយកសាំងចាក់ដុតផ្ទះរបស់ខ្លួនឆេះគ្មានសល់ ព្រោះតែខឹងសុំលុយម្តាយមិនបាន ។
ហេតុការណ៍ខាងលើនេះបង្កការភ្ញាក់ផ្អើលកាលពីវេលាម៉ោង២នាទីរសៀលថ្ងៃទី២៧ ខែកក្កដា ឆ្នាំ២០១៩ នៅចំណុចភូមិព្រៃក្តី ឃុំធម្មតាអរ ស្រុកសំរោងទង ខេត្តកំពង់ស្ពឺ។
យុវជនជាជនសង្ស័យខាងលើឈ្មោះសង្ហា អាយុ៣០ឆ្នាំ រស់នៅក្នុងភូមិឃុំកើតហេតុខាងលើ ។ ចំណែកផ្ទះដែលឆេះមានទំហំ៧ម៉ែត្រគុណ៩ម៉ែត្រ សង់អំពីឈើប្រក់ក្បឿង ។
តាមប្រភពពីសមត្ថកិច្ចបានឲ្យដឹងថា មុនពេលកើតហេតុ ជនសង្ស័យបានទៅសុំលុយម្ដាយចំនួន២០ដុល្លារដើម្បីយកទៅទិញស្រាផឹក តែត្រូវម្តាយប្រាប់ថា ពុំមានលុយនោះទេ ហើយស្ត្រីជាម្ដាយក៏បានស្ដីបន្ទោសជនសង្ស័យជាច្រើនថា «ខ្លួនពេញរូប ពេញរាង គួរណាស់តែខិតខំស្វែងរកការងារធ្វើយកប្រាក់កម្រៃដើម្បីមកចិញ្ចឹមជីវិត តែនេះខ្លួនប៉ុនម៉ែទៅហើយនៅតែមកលាដៃសុំលុយម៉ែ មិនគិតអាណិតម៉ែទាល់តែសោះ»។
តាមប្រភពដដែលបានបន្តថា ក្រោយពេលដែលម្ដាយស្ដីបន្ទោសបែបនេះធ្វើឲ្យជនសង្ស័យជាកូនមានការក្តៅក្រហាយយ៉ាងខ្លាំងបានរត់ទៅទិញសាំងយកមកចាក់នៅលើផ្ទះ ហើយដុតបណ្ដាលឱ្យឆេះយ៉ាងសន្ធោសន្ធៅ បង្កការភ្ញាក់ផ្អើលដល់អ្នកជិតខាង និងសមត្ថកិច្ចចុះមកជួយអន្តរាគមន៍ដែរ ប៉ុន្តែព្រះអាគីបានលេបត្របាក់ផ្ទះអស់ទាំងស្រុងទៅហើយ។
តាមប្រភពដដែលបានបន្តទៀតថា ជនសង្ស័យត្រូវបានសមត្ថកិច្ចធ្វើការឃាត់ខ្លួនភ្លាមៗផងដែរ នៅចំពោះមុខសមត្ថកិច្ច ជនសង្ស័យបានឆ្លើយសារភាពថា ខ្លួនពិតជាបានធ្វើសកម្មភាពយកសាំងចាក់ដុតផ្ទះម្ដាយប្រាកដមែន ព្រោះខឹងសុំលុយម្ដាយមិនបាន ។ បន្ទាប់ពីស្ដាប់ចម្លើយសារភាពរួចរាល់ សមត្ថកិច្ចនគរបាលស្រុកសំរោងទងបានរៀបចំកសាងសំណុំរឿងបញ្ជូនទៅកាន់ស្នងការដ្ឋាននគរបាលខេត្តដើម្បីចាត់ការបន្តតាមនីតិវិធី៕
ចែករំលែកព័តមាននេះ