ខេត្តមណ្ឌលគិរី ៖ ឈើកប់ក្នុងដីរាប់ពាន់កំណាត់ ត្រូវបានសមត្ថកិច្ចកាយរកឃើញជាបន្តបន្ទាប់ ដែលធ្វើឲ្យទំហំឧក្រិដ្ឋកម្មព្រៃឈើក្នុងខេត្តមណ្ឌលគិរីកាន់តែធំធេង រកនឹកស្មានមិនដល់ ដែលកាលកន្លងមកមន្ត្រីជំនាញនៅមូលដ្ឋានតែងអះអាងយ៉ាងម៉ឺងម៉ាត់ថា រាល់ឈើក្នុងដីក្រុមហ៊ុនវិនិយោគក្នុងស្រុកកោះញែក សុទ្ឋតែមានច្បាប់ មិនត្រឹមឈើដេកដួលនោះទេ…
ខេត្តមណ្ឌលគិរី ៖ ឈើកប់ក្នុងដីរាប់ពាន់កំណាត់ ត្រូវបានសមត្ថកិច្ចកាយរកឃើញជាបន្តបន្ទាប់ ដែលធ្វើឲ្យទំហំឧក្រិដ្ឋកម្មព្រៃឈើក្នុងខេត្តមណ្ឌលគិរីកាន់តែធំធេង រកនឹកស្មានមិនដល់ ដែលកាលកន្លងមកមន្ត្រីជំនាញនៅមូលដ្ឋានតែងអះអាងយ៉ាងម៉ឺងម៉ាត់ថា រាល់ឈើក្នុងដីក្រុមហ៊ុនវិនិយោគក្នុងស្រុកកោះញែក សុទ្ឋតែមានច្បាប់ មិនត្រឹមឈើដេកដួលនោះទេ សូម្បីដើមឈើនៅឈរក៏ត្រូវបានបង់ពន្ឋរួចរាល់ដែរ។
ជាក់ស្តែង សេចក្តីរាយការណ៍នៅថ្ងៃទី២០ កក្កដា នេះថា មានឈើរាប់រយកំណាត់មានគល់ អារជ្រៀកជាសន្លឹក ឈើជ្រុងដែលមានមុខកាត់ធំៗ ប្រវែងវែងៗ ត្រូវបាន គណៈកម្មាធិការថ្នាក់ជាតិដើម្បី បង្ក្រាបបទល្មើស ធនធានធម្មជាតិ ប្រើគ្រឿងចក្រកាយយកចេញពីក្នុង ដែលស្ថិតនៅក្នុងភូមិសាស្ត្រនៃក្រុមហ៊ុនដីសម្បទានសេដ្ឋកិច្ច។
លោកឧត្តមសេនីយ៍ត្រី ហែម បូណារ៉ែល មេបញ្ជាការកងរាជអាវុធហត្ថខេត្តមណ្ឌលគិរីបានឲ្យដឹងថា នៅថ្ងៃទី១៩ និង២០ កក្កដា គណៈកម្មាធិការថ្នាក់ជាតិ បង្ក្រាបបទដែលមានលោកឧត្តមសេនីយ៍ឯក ហុងវិណុល ជាប្រធាន បានដឹកនាំ កម្លាំងក្រោមឱវាទ ដោយសហការជាមួយនឹងមន្ត្រីបរិស្ថាន រដ្ឋបាលព្រៃឈើនគរបាលជាតិ សមត្ថកិច្ចមូលដ្ឋាន ធ្វើការកាយដីស្វែងរកកំណាត់ឈើ ដែលកប់ទុកក្នុងក្រុមហ៊ុនវិជ្ជរី ស្ថិតនៅក្នុងស្រុកកោះញែកនឹងបានប្រទះឃើញ ឈើជាច្រើនកំណាត់នៅក្នុងរណ្ដៅរាយប៉ាយក្នុងក្រុមហ៊ុននោះ។
លោកមេបញ្ជាការបានបន្តទៀតថា ក្នុងប្រតិបត្តិការរបស់គណៈកម្មាធិការ គឺនៅពុំទាន់បញ្ចប់នោះទេ។ក្នុងរយៈពេលប៉ុន្មានថ្ងៃនេះក្រុមហ៊ុនចំនួន៧ក្នុងចំណោមក្រុមហ៊ុនចំនួន ១១ត្រូវបានកម្លាំងជំនាញ ចូលដល់គោលដៅទាំងអស់។ ចំពោះប្រធានក្រុមហ៊ុនវិជ្ជរី ដែលជាជនជាតិចិននោះ កំពុងតែស្ថិតនៅ ការមិនទាន់ចូលខ្លួនឆ្លើយបំភ្លឺនៅឡើយ ខណៈដែលមានដីកាបញ្ជាឱ្យចូលខ្លួន របស់ស្ថាប័នតុលាការខេត្តមណ្ឌលគិរីផងនោះ។មធ្យោបាយជាច្រើនគ្រឿង នៅក្នុងក្រុមហ៊ុនវិជ្ជរី នោះ ក៏ត្រូវបាន គណៈកម្មាធិការថ្នាក់ជាតិ ធ្វើការរឹបអូសផងដែរ ប៉ុន្តែចំពោះចំនួន នៅមិនទាន់ដឹងថា មានមធ្យោបាយល្មើស ប៉ុន្មានគ្រឿងនោះទេ ដោយគណៈកម្មាធិការ បង្ក្រាបបទល្មើសធនធានធម្មជាតិនេះ នៅបន្តការងារ ពុំទាន់បញ្ចប់នៅឡើយ។
លោកម៉ម វណ្ណដា ព្រះរាជអាជ្ញារងនិងជាអ្នកនាំពាក្យអយ្យការអមសាលាដំបូងខេត្តមណ្ឌលគិរី បានថ្លែងប្រាប់អ្នកកាសែតថា តំណាងក្រុមហ៊ុន និងអ្នកពាក់ព័ន្ធក្នុងករណីនេះ ត្រូវបានស្ថាប័នតុលាការ ចេញដីកាបញ្ជាឱ្យចូលខ្លួន ចំនួន ៩ នាក់ហើយ អំឡុងពេលគណៈកម្មាធិការ ចុះដល់ នឹងធ្វើការស៊ើបអង្កេត រយៈពេលជាច្រើនថ្ងៃមកនេះ។ ដោយឡែក ជនសង្ស័យ០៣នាក់បានរងនូវការឃុំខ្លួនក្នុងពន្ធនាគាររួចហើយ ៕ (សម្រួលដោយ៖ ស្រីណា)
ចែករំលែកព័តមាននេះ