AFP ផ្សាយថា បុរសជនជាតិអង់គ្លេសម្នាក់ដែលបញ្ជូនអត្ថបទតាមហ្វេសប៊ុកមើលងាយអ្នកបម្រើការតាមរថភ្លើងនៅសិង្ហបុរីថា «ជាជនក្រីក្រ» ត្រូវក្រុមហ៊ុនចលនទ្រព្យបណ្តេញចេញពីការងារ ។
លោកអេនតុន កាស៊ី អាយុ៣៩ឆ្នាំ ដែលរៀបការជាមួយនាង ប៊ឺនីស អាវ៉ុង អតីតបវរកញ្ញាសិង្ហបុរី នៅឆ្នាំ២០១៣ បានចាកចេញពីសិង្ហបុរី ទៅអូស្ត្រាលី និងមិនទាន់បង្ហាញពីអនាគតរបស់ខ្លួន ក្រោយពីទទួលរងការវាយប្រហារតាមប្រព័ន្ធអីុនធើរណេតខ្លាំងនៅសិង្ហបុរី ។ លោកកាស៊ី ដែលមានទិដ្ឋាការរស់នៅសិង្ហបុរីជាអចិន្ត្រៃយ៍បានអះអាងថា រូបគេត្រូវគំរាមសម្លាប់ បន្ទាប់ពីបានប្រើអត្ថបទនៅក្នុងហ្វេសប៊ុក មើលស្រាលជនក្រីក្រ ។
ក្រុមហ៊ុន Crossinvest (Asia) Pte Ltd បានសំដែងការយល់ឃើញ ទាក់ទិននឹងអត្ថបទរបស់អតីតបុគ្គលិកជនជាតិអង់គ្លេស កាលពីពេល ថ្មីៗកន្លងមកថា «អត្ថបទនោះ បានជំទាស់នឹងប្រជាប្រិយភាពរបស់ក្រុមហ៊ុន ដែលសង្កត់ធ្ងន់លើការយោគយល់ដ៏ល្អ រួមទាំងការគោរពដល់អតិថិជន ហេតុដូច្នេះក្រុមហ៊ុន និងលោក កាស៊ី ត្រូវចែកផ្លូវគ្នា ដោយមានហេតុផល» ។
ទីភ្នាក់ងារស្ត្រេតថែម របស់សិង្ហបុរី បានផ្សាយដោយយោងលើសម្តីរបស់លោក កាស៊ី ថា បច្ចុប្បន្នលោកធ្វើដំណើរទៅអូស្ត្រាលី ក្រោយពីក្រុមគ្រួសារទទួលការគំរាមកំហែង ។ ទន្ទឹមនេះ លោកសុំអភ័យទោសចំពោះសម្តីរបស់ខ្លួន ដែលបង្កការឈឺចាប់ដល់ជនជាតិសិង្ហបុរី ។
ក្រុមគ្រួសារលោកកាស៊ី បច្ចុប្បន្នរស់នៅក្នុងក្រុងភើត ត្រូវអ្នកប្រើប្រព័ន្ធអីុនធើរណេត សិង្ហបុរីព្រមាន ក្រោយពីលោកបង្ហាញរូបភាពកូនប្រុសអាយុ៥ឆ្នាំ ជិះក្នុងរថភ្លើង រួមទាំងមានអត្ថបទនៅលើរូបភាពថា «ប៉ា! រថយន្តរបស់ប៉ានៅឯណា? ហើយជនក្រីក្រទាំងនេះជាអ្នកណា»? ។ សម្រាប់រូបថតទី ២ ជារូបកុមារកំពុងបោយដៃ ខណៈពេលជិះរថយន្ត Peugeot ពណ៌ប្រាក់ និងមានអត្ថបទបញ្ជាក់ថា «អូ៎! បានឃើញកូនហើយ ទើបមកបម្រើការជាប្រក្រតី ក្រោយពីលាងក្លិនស្អុយស្មោកគ្រោកនៅលើរថភ្លើងចេញពីខ្លួនប្រាណ» ៕
ចែករំលែកព័តមាននេះ