រាជធានីភ្នំពេញ ៖ តាមសេចក្តីរាយការណ៍បឋមបានឱ្យដឹងថា ជនសង្ស័យ១ក្រុមមានគ្នាជិត១០នាក់ ប៉ុន្តែត្រូវបានកម្លាំងនគរបាលខណ្ឌពោធិ៍សែនជ័យធ្វើការចាប់ខ្លួនបានចំនួន៧នាក់ ក្រោយពេលដែលក្រុមជនសង្ស័យទាំងនោះធ្វើសកម្មភាពជិះម៉ូតូដេញតាមធាក់បុរសម្នាក់ជាចុងភៅ និងប្លន់យកម៉ូតូមួយគ្រឿងរបស់បុរសរងគ្រោះបានសម្រេចកាលពី៤ថ្ងៃមុន ហើយយកម៉ូតូទៅលក់ចែកលុយគ្នាទាំងយប់ ។ ចំណែកបុរសរងគ្រោះបានមកដាក់ពាក្យបណ្ដឹងដើម្បីឱ្យនគរបាលជួយអន្តរាគមន៍ ទើបនគរបាលធ្វើការស្រាវជ្រាវរហូតដឹងថា ក្រុមជនសង្ស័យកំពុងលេងក្លឹបឌីស្កូមួយកន្លែងក៏ឆ្មក់ចូលទៅធ្វើការចាប់ខ្លួនបានជាបន្តបន្ទាប់តែម្ដង។
ហេតុការណ៍ខាងលើនេះបានកើតឡើងកាលពីវេលាម៉ោង១១និង៤៥នាទីយប់ថ្ងៃទី១៤ ខែកក្កដា ឆ្នាំ២០១៩ នៅតាមផ្លូវបេតុង ស្ថិតនៅក្នុងភូមិព្រៃពពេល សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
នគរបាលបានឲ្យដឹងថា ជនសង្ស័យ១ក្រុមនោះមានគ្នាជិត១០នាក់ខាងលើ ប៉ុន្តែត្រូវឃាត់ខ្លួនបាន៧នាក់ ចំណែកបក្សពួកមួយចំនួនទៀតបាននិងកំពុងរត់គេចខ្លួននៅឡើយ ហើយជនសង្ស័យដែលត្រូវសមត្ថកិច្ចចាប់ខ្លួននោះ រួមមាន ១,ឈ្មោះ ឈុំ ចន្នី ភេទប្រុស អាយុ១៧ឆ្នាំ មានទីលំនៅក្នុងភូមិសំរោងទាវ សង្កាត់ក្រាំងធ្នង់ ខណ្ឌសែនសុខ ២-ឈ្មោះផា ចំណាន ហៅណាន់ ភេទប្រុស អាយុ១៨ឆ្នាំ មានទីលំនៅក្នុងភូមិក្រាំងធ្នង់ សង្កាត់ក្រាំងធ្នង់ ខណ្ឌសែនសុខ ៣-ឈ្មោះណន វ៉ាន់ហេង ភេទប្រុស អាយុ២២ឆ្នាំ មានទីលំនៅក្នុងភូមិចំការឪឡឹក សង្កាត់កាកាប១ ខណ្ឌពោធិ៍សែនជ័យ ។
៤-ឈ្មោះណេត លីហ្សា ភេទប្រុស អាយុ១៧ឆ្នាំ មានទីលំនៅក្នុងភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ ៥-ឈ្មោះឌី សុភ័ក្ត្រ ភេទប្រុស អាយុ១៨ឆ្នាំ មានទីលំនៅក្នុងភូមិគោកឃ្លៀង សង្កាត់គោកឃ្លៀង ខណ្ឌសែនសុខ ៦-ឈ្មោះប៉ែន សុចិន ភេទប្រុស អាយុ១៧ឆ្នាំ និង៧-ឈ្មោះ ប៉ែន សុកែវ ភេទប្រុស អាយុ១៩ឆ្នាំ អ្នកទាំង២ស្នាក់នៅក្នុងភូមិប៉ប្រកខាងជើង សង្កាត់កាកាប១ ខណ្ឌពោធិ៍សែនជ័យ។
នគរបាលដកហូតបានម៉ូតូមួយគ្រឿងម៉ាកហុងដាវ៉េវ ពណ៌ខ្មៅ ពាក់ស្លាកលេខ ភ្នំពេញ ១HB-៨៨០៩ និងមួយគ្រឿងទៀត ម៉ាកហុងដាឌ្រីម ធុនសេ១២៥ ស៊េរីឆ្នាំ២០១៥ បិទតែមស៊េរីឆ្នាំ២០១៩ ពណ៌ទឹកមាសពាក់ស្លាកលេខ កំពង់ស្ពឺ ១G-៧៣៥៦។
ចំណែកជនរងគ្រោះឈ្មោះទិះ វិទូ ភេទប្រុស អាយុ៣០ឆ្នាំ មុខរបរចុងភៅណាហ្គាវើល មានទីលំនៅក្នុងភូមិកោះរងៀង សង្កាត់ពន្សាំង ខណ្ឌព្រែកព្នៅ រីឯម៉ូតូមួយគ្រឿងរបស់ជនរងគ្រោះដែលត្រូវក្រុមជនសង្ស័យខាងលើប្លន់យកទៅបាត់ម៉ាកហុងដាឌ្រីម ធុនសេ១២៥ ស៊េរីឆ្នាំ២០១៨ ពណ៌ខ្មៅ ពាក់ស្លាកលេខ ភ្នំពេញ១GV-៣០៣៥។
តាមប្រភពព័ត៌មានបានឱ្យដឹងថា នៅមុនពេលកើតហេតុ ខណៈដែលបុរសរងគ្រោះខាងលើជិះម៉ូតូតែម្នាក់ឯងចេញពីកន្លែងធ្វើការនៅណាហ្គាវើលឆ្ពោះទៅផ្ទះ លុះមកដល់ត្រង់ចំណុចកើតហេតុខាងលើស្រាប់តែមានក្រុមជនសង្ស័យមួយក្រុមមានគ្នាជិត១០នាក់ជិះម៉ូតូចំនួន៥គ្រឿងដេញតាមធាក់ម៉ូតូរបស់ជនរងគ្រោះ បណ្ដាលឲ្យដួល ពេលនោះដើម្បីសុវត្ថិភាពជនរងគ្រោះក៏បានរត់ចេញ ។
តាមប្រភពព័ត៌មានបានបន្តថា ខណៈនោះក្រុមជនសង្ស័យក៏បានលើកយកម៉ូតូរបស់ជនរងគ្រោះជិះគេចខ្លួននិងយកទៅលក់ចែកចាយលុយគ្នាទាំងយប់ព្រមទាំងដើរផឹកសុីសប្បាយ ។ រហូតដល់ថ្ងៃទី១៧ ខែកក្កដា ឆ្នាំ២០១៩ ទើបជនរងគ្រោះបានមកដាក់ពាក្យបណ្ដឹង ហើយនគរបាលបានធ្វើការស្រាវជ្រាវរហូតដល់វេលាម៉ោង១២និង២០នាទីយប់រំលងអាធ្រាត្រឈានចូលថ្ងៃទី១៩ កក្កដា ទើបឈានដល់ការចាប់ខ្លួនជនសង្ស័យបានចំនួន៥នាក់ ខណៈដែលជនសង្ស័យទាំងនេះកំពុងសប្បាយនៅក្នុងក្លឹបរីលេក្ស ដែលស្ថិតនៅតាមផ្លូវលេខ២០១១ ភូមិតាងួន២ សង្កាត់កាកាប១ ខណ្ឌពោធិ៍សែនជ័យ។
បន្ទាប់មកបាននាំក្រុមជនសង្ស័យទាំង៥នាក់ទៅសាកសួរនៅផ្នែកព្រហ្មទណ្ឌនគរបាលខណ្ឌរួចមក លុះដល់វាលាម៉ោង១១និង៣០នាទីព្រឹកថ្ងៃដដែល សមត្ថកិច្ចបន្តទៅចាប់ខ្លួនជនសង្ស័យបាន២នាក់ទៀតនៅក្នុងភូមិប៉ប្រកខាងជើង សង្កាត់កាកាប១ ពេលនេះនគរបាលកំពុងកសាងសំណុំរឿងចាត់ការតាមច្បាប់ហើយ៕ (កែសម្រួលដោយ ៖ ធីតា)
ចែករំលែកព័តមាននេះ