រាជធានីភ្នំពេញ ៖ ព្រឹទ្ធសភានឹងអនុម័តលើសេចក្តីព្រាងច្បាប់អនុញ្ញាឲ្យក្រុមហ៊ុនឯកជនមួយចំនួនបង្កើតរោងចក្រអគ្គិសនីសម្រាប់ផ្គត់ផ្គង់អគ្គិសនីបន្ថែម នៅក្នុងប្រទេសកម្ពុជាកុំឲ្យមានភាពខ្វះខាតដូចឆ្នាំនេះទៀត ។ នេះបើតាមអ្នកនាំពាក្យព្រឹទ្ធសភា ។
លោកម៉ម ប៊ុននាង អ្នកនាំពាក្យព្រឹទ្ធសភាបានប្រាប់ក្រុមអ្នកសារព័ត៌មានក្រោយកិច្ចប្រជុំគណៈកម្មាធិការអចិន្ត្រៃយ៍ព្រឹទ្ធសភា នាព្រឹកថ្ងៃទី៨ ខែកក្កដានេះ ថានៅក្នុងកិច្ចប្រជុំគណៈកម្មាធិការអចិន្ត្រៃយ៍ក្រោមអធិបតីភាពសម្តេចវិបុលសេនាភក្តីសាយ ឈុំ ប្រធានព្រឹទ្ធសភាបានកំណត់យកថ្ងៃទី១១ កក្កដាខាងមុខនេះ បើកសម័យប្រជុំពេញអង្គព្រឹទ្ធសភា ដើម្បីពិភាក្សា និងអនុម័តសេចក្តីព្រាងច្បាប់អនុញ្ញាតឲ្យក្រុមហ៊ុនចំនួន៣ធ្វើការសាងសង់រោងចក្រអគ្គិសនីបន្ថែមទៀតនៅកម្ពុជានិ ងរបៀបវារៈមួយចំនួនទៀត ។
អ្នកនាំពាក្យព្រឹទ្ធសភាបានបន្តថា អង្គប្រជុំព្រឹទ្ធសភា ដើម្បីអនុម័ត្តឲ្យក្រុមហ៊ុនចំនួនបីខាងលើវិនិយោគលើវិស័យអគ្គិសនីប្រើប្រាស់ដោយថាមពលព្រះអាទិត្យ និងថ្មធ្យួងនៅកម្ពុជា ខណៈ ភ្លើងដែលប្រើប្រាស់ដោយព្រះអាទិត្យនឹងចាប់ផ្តើមដំណើរការនៅរាជធានីភ្នំពេញ នាចុងឆ្នាំ២០១៩នេះ ចំនួន៦០មេកាវ៉ាត់ ។ លោកបានបញ្ជាក់ ៖«សុទ្ធតែរៀបវារៈសំខាន់ៗដូចជា សេចក្តីព្រាងច្បាប់ស្តីពីការគ្រប់គ្រងរោងចក្រចំនួន៣ អីញ្ចឹងរោងចក្រទាំងនេះ គឺរោងចក្រដើរពន្ធឺព្រះអាទិត្យចំនួន២ ហើយរោងចក្រដើរដោយធ្យូថ្មចំនួន១ ។ អីញ្ចឹងរោងចក្រអគ្គិសនីដែលដើរឲ្យ ព្រះអាទិត្យយើងនឹងរៀបចំរៀងចក្រឲ្យទាន់ចុងឆ្នាំ២០១៩នេះ ឲ្យដំណើរការចំនួន៦០មេហ្គាវ៉ាត់ ដើម្បីជួយនៅក្នុងទីក្រុងឆ្នាំពេញកុំខ្វះភ្លើងទៀត ។ រោងចក្រអគ្គិសនីដើរឲ្យពន្លឺព្រះអាទិត្យប្រើបានតែពេលថ្ងៃ តែពេលយប់ដើរបានបន្តិច» ។
លោកម៉ម ប៊ុននាង ក៏បានឲ្យដឹងថា ពាក់ព័ន្ធនឹងវិស័យអគ្គិសនីរាជរដ្ឋាភិបាលបានយកចិត្តទុកដាក់យ៉ាងខ្លាំង គឺធ្វើយ៉ាងណាជំរុញឲ្យរោងចក្រអគ្គិសនីដើរដោយពន្លឺព្រះអាទិត្យជួយបានថាមពល៦០មេហ្គាវ៉ាត់ថែមទៀត ហើយនឹងរោងចក្រធ្យូថ្មនៅខេត្តពោធិសាតិ៍មានកម្លាំងថាមពល៨០មេហ្គាវ៉ាត់ និងដាក់ឲ្យដំណើរការនៅចុងឆ្នាំ២០២០ ឬដើមឆ្នាំ២០២១ ។ ជាមួយគ្នានោះដែរអ្នកនាំពាក្យក៏បានឲ្យដឹងថា កាលពីពេលថ្មីៗកន្លងមកនេះ ប្រមុខរាជរដ្ឋាភិបាលកាលពីទៅប្រទេសស្វីសបានយកចិត្តទុកដាក់ក្នុងការរៀបចំឲ្យមានទំនាក់ទំនងទិញពីរោងចក្រចំនួនពីរពីប្រទេសហ្វាំងឡង់ ដែលដើរឲ្យប្រេងខ្មៅ ។
លោក ម៉ម ប៊ុននាង ក៏បានឲ្យដឹងថា លោកបានសួររដ្ឋមន្ត្រីក្រសួងរ៉ែ និងថាមពលថា ម៉ាស៊ីន ដែលកម្ពុជាទិញពីប្រទេសហ្វាំងឡង់មួយមានកម្លាំង២០០មេហ្គាវ៉ាត់ ហើយកម្ពុជាទិញពីរ គឺ ស្មើ៤០០មេហ្គាវ៉ាត់ និងរៀបចំឲ្យដំណើរការនៅឆ្នាំ២០២០ផងដែរ ។ លោកបន្ថែមថា តាមចក្ខុវិស័យរបស់រាជរដ្ឋាភិបាលកម្ពុជា យើងឃើញថា ការវិនិយោគនៅកម្ពុជាមានការកើនឡើងទ្វេដង អីញ្ចឹងថាមពលអគ្គិសនីក៏ត្រូវការទ្វេដងដែរ ។ ដូច្នេះប្រមុខរាជរដ្ឋាភិបាលបានយកចិត្តទុកដាក់ក្នុងការតម្រូវដល់ការវិនិយោគធ្វើយ៉ាងណាឲ្យមានកាប្រើប្រាស់អគ្គិសនីគ្រប់គ្រាន់ ។
ក្នុងឱកាសនោះលោក ម៉ម ប៊ុននាង ក៏បានអះអាងថា ថាមពលអគ្គិសនីដែលនឹងតម្លើងឲ្យប្រើប្រាស់នេះនឹងផ្គត់ផ្គងទៅបណ្តាខេត្តនានានៅទូទាំងប្រទេសព្រោះថា បច្ចុប្បន្នកម្ពុជាមានបណ្តាញជាតិក្នុងការបែងចែកភ្លើងរួចហើយ ៕ កែសម្រួលដោយ ៖ សុឃាក់
ចែករំលែកព័តមាននេះ