ខេត្តកំពង់ឆ្នាំង ៖ លោក កែវ ពៅ ប្រធានមន្ទីរសាធារណការនិងដឹកជញ្ជូនខេត្តកំពង់ឆ្នាំងបានជំរុញឲ្យមន្ត្រីក្រោមឱវាទខិតខំអនុវត្តការងារក្នុងគម្រោងដែលនៅសេសសល់ អោយរួចរាល់ក្នុងឆមាសទី១ ដោយ មិនត្រូវទុកឲ្យអូសបន្លាយឆ្លងចូលឆមាសទី២នោះឡើយ ។…
ខេត្តកំពង់ឆ្នាំង ៖ លោក កែវ ពៅ ប្រធានមន្ទីរសាធារណការនិងដឹកជញ្ជូនខេត្តកំពង់ឆ្នាំងបានជំរុញឲ្យមន្ត្រីក្រោមឱវាទខិតខំអនុវត្តការងារក្នុងគម្រោងដែលនៅសេសសល់ អោយរួចរាល់ក្នុងឆមាសទី១ ដោយ មិនត្រូវទុកឲ្យអូសបន្លាយឆ្លងចូលឆមាសទី២នោះឡើយ ។ លោកប្រធានមន្ទីរសាធារណការនិងដឹកជញ្ជូនខេត្តកំពង់ឆ្នាំងបានមានប្រសាសន៍បែបនេះនៅក្នុងឱកាសប្រជុំបូកសរុបលទ្ធផលការងារប្រចាំឆមាសទី១ និងលើកទិសដៅផែនការឆមាសទី២ ឆ្នាំ២០១៩ នៅមន្ទីរសាធារណការនិងដឹកជញ្ជូនខេត្តកំពង់ឆ្នាំង នារសៀលថ្ងៃទី៥ ខែកក្កដា ឆ្នាំ២០១៩។
លោកប្រធានមន្ទីរសាធារណការនិងដឹកជញ្ជូនខេត្តកំពង់ឆ្នាំងបានបន្តថា ការងារដែលនៅសេសសល់ក្នុងឆមាសទីមួយយើងត្រូវរួមគ្នា បន្តអនុវត្តឱ្យហើយជាចាំបាច់ ឧទាហរណ៍ដូចជា ការធ្វើផ្លូវ ដាក់ប្រព័ន្ធលូ ការជួសជុលផ្លូវខូចខាតដោយជំនន់ទឹកភ្លៀង និងហេដ្ឋារចនាសម្ព័ន្ធមួយចំនួនទៀត។ ដោយឡែកចំពោះលទ្ធផលដែលទទួលបានកន្លងមកគឺជាកិច្ចខិតខំប្រឹងប្រែងរបស់បងប្អូនជាកម្មករ ជាមន្ត្រីនៃមន្ទីរ ដែលបានសាមគ្គីគ្នាក្នុងការអនុវត្តតួនាទីភារកិច្ចចំពោះមុខរៀងៗខ្លួន ។
ជាមួយគ្នានេះចំពោះយុទ្ធសាស្ត្រពង្រឹងសុវត្ថិភាពចរាចរណ៍ផ្លូវគោក លោកស្នើដល់មន្ត្រីក្រោមឱវាទត្រូវយកចិត្តទុកដាក់តាមផែនការរបស់គណៈបញ្ជាការឯកភាពខេត្ត ដោយជំរុញផ្សព្វផ្សាយអោយបានខ្លាំងក្លាថែមទៀត នៅតាមបណ្តាស្រុកក្រុង តាមគ្រឹះស្ថាន សាលារៀន និងជំរុញដល់ប្រព័ន្ធផ្សព្វផ្សាយក្នុងខេត្ត មានវិទ្យុ ទូរទស្សន៍ សារព័ត៌មាន ដើម្បីផ្សាយអំពីច្បាប់ចរាចរណ៍ផ្លូវគោកក្នុងទិសដៅពង្រឹងសុវត្ថិភាពចរាចរណ៍ផ្លូវគោកឲ្យកាត់បន្ថយអត្រាគ្រោះថ្នាក់អោយនៅកម្រិតទៀតបំផុត។
លោក ប្រធានមន្ទីរសាធារណការ បានរំលឹកថា៖ កន្លងទៅជំនួយ ធនាគារ អភិវឌ្ឍន៍ អាស៊ី ហៅកាត់ថា៖ ADB ដែលនឹងសាងសង់ផ្លូវមួយខ្សែក្រវ៉ាត់ក្រុង សម្រាប់ជាទំនប់រំដោះទឹកជំនន់ត្រូវបានបរាជ័យដោយ សារតែយើងអនុវត្តតាមផែនការគេមិនបាន ។ ប៉ុន្តែពេលនេះជំនួយដដែលនេះ មានទឹកប្រាក់ខ្ទង់១១លានដុល្លារត្រូវបាន ADB ដាក់មកឱ្យអនុវត្តជាថ្មីម្ដងទៀតក្នុងខេត្តកំពង់ឆ្នាំង នោះ គឺសាងសង់ស្ថានីយចម្រោះជាតិកខ្វក់ដែលធ្វើឡើងនៅចំណុចផ្សារក្រោម ហើយលើកនេះបើសិនជាមានភាពរាំងស្ទះ ធ្វើមិនបានទៀត គេនឹងដកជំនួយដែលមានខ្ទង់ប្រាក់១១លានដុល្លារនេះ ទៅអភិវឌ្ឍន៍នៅខេត្តពោធិ៍សាត់វិញជាមិនខាន ។
ហេតុនេះហើយសូមមន្ត្រីទាំងអស់យកចិត្តទុកដាក់ចំពោះបញ្ហានេះនឹងដោះស្រាយឲ្យទាន់ពេលវេលា។ ជាចុងក្រោយប្រធានមន្ទីរបានផ្ដាំផ្ញើដល់មន្ត្រីរាជការនៃមន្ទីរសាធារណការអស់ទៅយកចិត្តទុកដាក់បំពេញភារកិច្ចដោយមិនត្រូវធ្វេសប្រហែសឡើយ ខណៈដែលលោកនឹងចូលនិវត្តន៍ហើយនៅសល់មិនដល់ប៉ុន្មានខែទៀតតែប៉ុណ្ណោះ ៕
ចែករំលែកព័តមាននេះ