រាជធានីភ្នំពេញ ៖ ឪពុកនិងកូនប្រុសជាជនជាតិចិនបានចេញពីសណ្ឋាគារបំរុងទៅហូបអីនៅក្រៅ លុះកំពុងតែនិយាយទូរស័ព្ទស្រាប់តែត្រូវជនសង្ស័យ២នាក់ឆក់ទូរស័ព្ទបានសំរេច បង្កអោយមានការភ្ញាក់ផ្អើលកាលពីវេលាម៉ោង១០និង៣០នាទីយប់ថ្ងៃទី៤ ខែកក្កដា ឆ្នាំ២០១៩ នៅមុខសណ្ឋាគារ ហ័រយិនកុងស៊ាន និងនៅមុខប៉ុស្តិ៍នគរបាលចោមចៅ៣ ដែលស្ថិតនៅភូមិព្រៃព្រីងខាងជើង សង្កាត់ចោមចៅទី៣ ខណ្ឌពោធិ៍សែនជ័យ ។
![](https://kohsantepheapdaily.com.kh/wp-content/images/2019/07/9662476a1cc436deb4f0d235fc5b3c96-1.jpg)
ជនរងគ្រោះជាកូនឈ្មោះ HUANG TONG ភេទប្រុស អាយុ៣១ឆ្នាំ ជាជនជាតិចិន មុខរបរជាអ្នកគ្រប់គ្រង ស្នាក់នៅក្នុងសណ្ឋាគារហ័រយិនកុងស៊ាន ដែលស្ថិតនៅភូមិព្រៃព្រីងខាងជើង សង្កាត់ចោមចៅទី៣ ខណ្ឌពោធិ៍សែនជ័យ ។
![](https://kohsantepheapdaily.com.kh/wp-content/images/2019/07/7488d4b2a86efaef22be63bcecc5db43-2.jpg)
បើតាមសម្តីរបស់ស្ត្រីម្នាក់បកប្រែភាសាចិនបានអោយដឹងថា នៅមុនពេលកើតហេតុ ជនជាតិចិនទាំង២នាក់ឪពុកនិងកូនខាងលើបានចេញពីសណ្ឋាគារខាងលើបំរុងនាំគ្នាទៅហូបអីនៅក្រៅ បន្ទាប់មកដោយឪពុកឡើងជិះលើរថយន្ត ហើយកូនប្រុសកំពុងនិយាយទូរស័ព្ទនៅខាងក្រោយរថយន្ត ភ្លាមៗនោះស្រាប់តែឃើញជនសង្ស័យ២នាក់ជិះម៉ូតូមួយគ្រឿងម៉ាកស្គូពី ហើយបានឆក់យកទូរស័ព្ទពីដៃរបស់គាត់ ហើយជិះគេចខ្លួនបាត់ស្រមោល ។
ក្រោយពេលកើតហេតុ ជនរងគ្រោះបាននាំស្ត្រីជាអ្នកបកប្រែមកដាក់ពាក្យបណ្ដឹង នៅប៉ុស្តិ៍នគរបាលរដ្ឋបាលចោមចៅទី៣ដើម្បីឲ្យសមត្ថកិច្ចជួយអន្តរាគមន៍ភ្លាមៗផងដែរ ៕ (កែសម្រួលដោយ ៖ ធីតា)
ចែករំលែកព័តមាននេះ