ខេត្តបន្ទាយមានជ័យ ៖ ជនសង្ស័យប្រុស-ស្រីប្រើប្រាស់និងចែកចាយថ្នាំញៀនចំនួន៥នាក់ ត្រូវបាននគរបាលជំនាញប្រឆាំងគ្រឿងញៀននៃអធិការនគរបាលក្រុងប៉ោយប៉ែត សហការជាមួយនគរបាលប៉ុស្តិ៍រដ្ឋបាលសង្កាត់ផ្សារកណ្តាល និងប៉ោយប៉ែត ឃាត់បានជាបន្តបន្ទាប់ នៅព្រឹករហូតរសៀលថ្ងៃទី០៤កក្កដានេះ ។
យ៉ាងណាក៏ដោយ ជនសង្ស័យទាំង៥នាក់(ស្រី៣) នៅមិនទាន់ត្រូវសមត្ថកិច្ចប្រាប់ដឹងពីអត្តសញ្ញាណពួកគេនៅឡើយទេ ។ សមត្ថកិច្ចឃាត់ពីផ្ទះមួយ ស្ថិតក្នុងភូមិបាលិលេយ្យ2 សង្កាត់ប៉ោយប៉ែត ខណៈពួកគេអះ អាងថា ទៅសេពថ្នាំញៀន ។
ប្រភពបន្តថា នៅលើផ្ទះសង្ស័យជាទីតាំងទី២នេះ សមត្ថកិច្ចរកឃើញកាំបិតសាមូរ៉ៃចំនួន៤ដើម និងជញ្ជីងថ្លឹងថ្នាំញៀន១ តែម្ចាស់ផ្ទះគេចខ្លួនបាត់ ។ សមត្ថកិច្ចប្រាប់ថា មុនឆ្មក់ចូលទីតាំងទី២ នៅព្រឹកថ្ងៃដដែលឃាត់ជនសង្ស័យម្នាក់ ភេទប្រុស ស្ថិតលើដងផ្លូវលំ ជិតភោជ្ជដ្ឋានត្រជាក់ចិត្តថ្មី ក្នុងភូមិនិងសង្កាត់ផ្សារកណ្តាល និងឆែកឆេរឃើញថ្នាំញៀន ម្សៅក្រាមពណ៌សថ្លា(ម៉ាទឹកកក)១កូនថង់តូច ។
ក្រោយសួរនាំជនសង្ស័យ ក៏ប្រាប់ថាទិញថ្នាំញៀនចែកចាយបន្តពីជនសង្ស័យម្នាក់ ទើបឈានឆ្មក់ចូលទីតាំងទី២នេះ តែជនសង្ស័យទំនងជាដឹងខ្លួនមុន ក៏គេចបាត់បន្សល់នៅតែអ្នកប្រើប្រាស់៤នាក់ និងជញ្ជីងថ្លឹងថ្នាំញៀន១ ព្រមជាមួយនិងដាវទាំង៤ដើមនេះ ។ (សម្រួលដោយ៖ ស្រីណា)
ចែករំលែកព័តមាននេះ