រាជធានីភ្នំពេញ ៖ បុរសម្នាក់ដែលគេស្គាល់ថាជាមន្ត្រីកងរាជអាវុធហត្ថលើផ្ទៃប្រទេសដោយសារខឹងជនដៃដល់ព្រួតវាយតប់ក្មួយប្រុសរបស់ខ្លួន បានដកកាំភ្លើងបាញ់គំរាមអស់ជាង១០គ្រាប់ នៅមុខមន្ត្រីកងរាជអាវុធខណ្ឌ៧មករា ហើយក៏ត្រូវបានឃាត់ខ្លួនតែម្តង ។ ហេតុការណ៍នេះបានកើតឡើងកាលពីវេលាម៉ោង១១និង៣០នាទីយប់ថ្ងៃទី៩ មករា នៅកែងផ្លូវលេខ១២៨និងផ្លូវលេខ១០៩ សង្កាត់មិត្តភាព ខណ្ឌ៧មករា។
ប្រភពព័ត៌មានពីមន្ត្រីកងរាជអាវុធហត្ថខណ្ឌ៧មករា បានឱ្យដឹងថា មុនពេលកើតហេតុជនដៃដល់មានគ្នា៣នាក់ជិះម៉ូតូ២គ្រឿងម៉ាកេស១២៥ ពណ៌ខ្មៅ និងម៉ាកToday បាននាំគ្នាព្រួតវាយយុវជនម្នាក់ដែលត្រូវជាក្មួយប្រុសរបស់លោកអនុសេនីយ៍ឯក ហោ តាំងសូ អាយុ៣៣ឆ្នាំ ជាមន្ត្រីកងរាជអាវុធហត្ថលើេផ្ទៃប្រទេស ស្នាក់នៅជិតកន្លែងកើតហេតុផ្ទះជាន់ទី១ សង្កាត់មិត្តភាព ខណ្ឌ៧មករា ។ ខណៈពេលកំពុងប្រវាយប្រតប់គ្នានោះ ដោយសារកម្លាំងកងរាជអាវុធហត្ថខណ្ឌ៧មករា ២នាក់ល្បាតក្នុងមូលដ្ឋានប្រទះឃើញ ជនដៃដល់ក៏នាំគ្នាឡើងជិះម៉ូតូគេចទៅបាត់អស់។ ប្រភពដដែលបន្តទៀតថា បន្ទាប់ពីជនដៃដល់គេចខ្លួនអស់ស្រាប់តែលោកអនុសេនីយ៍ឯកហោ តាំងសូ រត់ចេញពីក្នុងផ្ទះដែលនៅជិតកន្លែងកើតហេតុមកដល់ រួចសួរថានរណាវាយក្មួយរបស់គាត់ ។
លុះពេលដឹងថាជនដៃដល់គេចខ្លួនអស់ ស្រាប់តែលោកអនុសេនីយ៍ឯករូបនោះ ដែលត្រូវជាឪពុកមាបានដកកាំភ្លើងខ្លីម៉ាកP42 បាញ់ចំនួន៥គ្រាប់ជាប់ៗ គ្នាហើយដោយនៅមិនអស់ចិត្តក៏បាញ់អស់ជាច្រើនគ្រាប់ទៀត សរុបទាំងអស់ជាង១០គ្រាប់ ដោយបាញ់នៅមុខមន្ត្រីកងរាជអាវុធហត្ថខណ្ឌ៧មករា ទាំង២នាក់នោះតែម្តង ។ ចំណែកមន្ត្រីកងរាជអាវុធហត្ថខណ្ឌ៧មករា ក៏រើសសម្បកគ្រាប់បានជាច្រើនយកទៅរក្សាទុក ហើយលោកហោ តាំងសូ ក៏ត្រូវបានឃាត់ខ្លួនបញ្ជូនទៅបញ្ជាការដ្ឋានកងរាជអាវុធហត្ថខណ្ឌ៧មករា ដើម្បីសាកសួរនិងកសាងសំណុំរឿងបញ្ជូនទៅបញ្ជាការដ្ឋានកងរាជអាវុធរាជធានីភ្នំពេញចាត់ការតាមនីតិវិធី ៕
ចែករំលែកព័តមាននេះ