ប្រទេសរុស្ស៊ី ៖ អាជ្ញាធររុស្ស៊ីគូសបញ្ជាក់កាលពីថ្ងៃទី២ កក្កដាថា នាវិក១៤នាក់បានត្រូវស្លាប់ដោយសារភ្លើងឆាបឆេះក្នុងនាវាមុជទឹកស្រាវជ្រាវមួយគ្រឿងរបស់កងទ័ពរុស្ស៊ី មានមូលដ្ឋាននៅតំបន់អាក់ទិក។ សោកនាដកម្មនោះនាំឲ្យគេនឹកឃើញដល់សោកនាដកម្មនៃនាវាមុជទឹកKOURSK ដែលគេចងចាំមិនភ្លេចក្នុងប្រទេសនេះ។
ប្រធានាធិបតីរុស្ស៊ីលោកវ្ល៉ាឌីមៀរពូទីន ដែលរងការរិះគន់ខ្លាំង កាលពីឆ្នាំ២០០០ចំពោះការគ្រប់គ្រងមិនបានល្អ លើគ្រោះមហន្តរាយនៃនាវាមុជទឹកនុយក្លេអ៊ែរKOURSKនោះ បានលើកពីការបាត់បង់ធ្ងន់ធ្ងរ សម្រាប់កងម៉ារីនរុស្សុីនិងនិយាយរួម សម្រាប់កងទ័ពទាំងមូល ចំពោះគ្រោះមហន្តរាយថ្មីនេះ នៃនាវាមុជទឹករុស្ស៊ីពេលលោកថ្លែងតាមទូរទស្សន៍ ជាមួយរដ្ឋមន្ត្រីការពារប្រទេសរបស់លោក គឺលោកស័រហ្គេយឆយហ្គូនាល្ងាចថ្ងៃទី២កក្កដា។ លោកបានបញ្ជាឲ្យរដ្ឋមន្ត្រីរូបនោះទៅកាន់កំពង់ផែយោធា SEVEROMORSK ជាមូលដ្ខាននៃនាវាមុជទឹកនោះ ស្ថិតក្នុងតំបន់អាក់ទិករុស្សុីដើម្បីកំណត់ពីមូលហេតុនៃការឆេះនាវានេះ។
កងទ័ពរុស្ស៊ីមិនបានផ្ដល់ភាពលម្អិត លើគ្រោះថ្នាក់ដែលកើតមានកាលពីថ្ងៃទី១កក្កដាក្នុងនាវាមុជទឹកអាថ៌កំបាំងនេះ ដែលតាមការបកស្រាយផ្លូវការថាសម្រាប់សិក្សាបរិយាកាសសមុទ្រនិងបាតសមុទ្ររបស់កងទ័ពរុស្ស៊ីឡើយ។ យោងតាមក្រសួងការពារប្រទេសរុស្ស៊ីថា មនុស្ស១៤នាក់បានស្លាប់ដោយសារការពុល បណ្ដាលមកពីនាវាឆេះ។
ភ្លើងអាចពន្លត់ហើយនាវាមុជទឹកនេះបានមកកាន់កំពង់ផែសំចតរបស់ខ្លួនវិញ។ មានព័ត៌មាននានាពីអ្នកនៅរស់រានមានជីវិត។ ផ្ទុយទៅវិញគេមិនដឹងថាតើមាននាវិកប៉ុន្មាននាក់ក្នុងនាវាមុជទឹកនោះឡើយ ពេលជួបគ្រោះថ្នាក់។ ការស៊ើបអង្កេតមួយត្រូវបានកងទ័ពរុស្ស៊ីបើកធ្វើ។
អាជ្ញាធរន័រវែសនិយាយថា ខ្លួនបានទទួលការផ្ដល់ព័ត៌មានពីគ្រោះថ្នាក់នោះពីក្រុងមូស្គូ ដែលថា មានការផ្ទុះឧស្ម័នក្នុងនាវាមុជទឹកនោះ។ អាជ្ញាធរការពារវិទ្យុសកម្មន័រវែសបញ្ជាក់ថា ពុំបានកត់សម្គាល់ឃើញការកើនឡើងនៃអត្រាវិទ្យុសកម្មឡើយ ខណៈតាមកាសែតរុស្ស៊ីជាច្រើនថា នោះពុំមែនជានាវាមុជទឹកធម្មតារបស់រុស្ស៊ីឡើយ៕ (កែសម្រួលដោយ ៖ បុប្ផា)
ចែករំលែកព័តមាននេះ