ខេត្តកណ្តាល ៖ អ្នកភ្នំពេញច្បាស់ជាញញើត ពេលនិយាយដល់ការហូបសាច់កណ្តុរ ។ ប៉ុន្តែសម្រាប់អ្នកភូមិមួយចំនួននៅខេត្តកណ្តាល កណ្តុរបានត្រូវយកធ្វើជាម្ហូបឆ្ងាញ់ៗជាច្រើនមុខដូចជា ឆារក្តៅ និងម្ជូរកណ្តុរជាដើម ។
នៅក្នុងភូមិមួយចំនួននៅក្នុង ឃុំព្រែក អំបិល ខេត្តកណ្តាល ប្រជាពលរដ្ឋបានចាប់កណ្តុរមកពីក្នុងព្រៃ ដីស្រូវ ដំណាំកសិផលផ្សេងៗ ដើម្បីយកលក់នៅក្នុងផ្សារ ។ សាច់កណ្តុរត្រូវបានគេដឹកលក់តាមកញ្ឆេម៉ូតូបន្លែ ស្ទើរតែរាល់ថ្ងៃ នៅក្នុងភូមិព្រែកក្រាញ់ ក្នុងស្ថិតក្នុងឃុំព្រែកអំបិល ។ ជាងនេះសាច់នេះត្រូវបានប្រជាពល រដ្ឋឬអ្នកដែលហូបទិញដាច់ណាស់ ដើម្បីយកទៅធ្វើម្ហូបសម្រាប់ហូបនៅពេលទទួលទានបាយ ឬធ្វើជាគ្រឿងក្លែមផងដែរ ។
សាច់កណ្តុរត្រូវបានប្រជាពលរដ្ឋនៅក្នុងភូមិហូបស្ទើរគ្រប់រដូវហើយ ប៉ុន្តែរដូវដែលសាច់កណ្តុរឆ្ងាញ់នៅរដូវវស្សារ ឬអាចនិយាយបានថា រដូវទឹកចូលព្រែក ។ រដូវនេះកណ្តុរមានសាច់ ឬខ្លាញ់ច្រើននៅពេលយកសាច់វាអាំង ឬជៀនមើលទៅគួរឲ្យចង់ហូប ។ សាច់កណ្តុរក៏មានតម្លៃថ្ងៃផងដែរ គឺ១គីឡូមានតម្លៃរហូតដល់១៧០០០រៀល ឬ២ម៉ឺន រៀលក៏មានដែរសម្រាប់លក់តាមកញ្ឆេរម៉ូតូលក់តាមផ្សារតម្លៃពី១២០០០រៀល ទៅ ១៥០០០រៀលឯណោះ ។
លោក វណ្ណា រ៉ាជា ប្រជាពលរដ្ឋរស់នៅក្នុងភូមិព្រែកអំបិល ឃុំព្រែកអំបិល ដែលជាអ្នកហូបសាច់កណ្តុរ និងជាចុងភៅចំអិនកណ្តុរបានឲ្យដឹងថា សាច់កណ្តុរអាចធ្វើម្ហូបជា ច្រើនមុខសម្រាប់ទទួលទាន និងសម្រាប់អ្នកក្លែមស្រា ។ លោកថា កណ្តុរអាចយកទៅប្រឡាក់ចៀន បំពង ឬអាំងជ្រលក់ ឬចុចជាមួយទឹកត្រី ទឹកអំពិលទុំ ទឹកម្ជូរសណ្តាន់ ជាដើម ។ លើសពីនេះសាច់កណ្តុរក៏អាចធ្វើម្ហូបជាច្រើនដូចជា ចិញ្ចាំ ឆាជាមួយខ្មី ឆ្មាក្តៅដូចសាច់គោ ឬសាច់ផ្សេងទៀតផងដែរ ។ លើសពីនេះសាច់កណ្តុរក៏បានស្លបានផងដែរ គឺអាចស្លម្ជូរដូង ឬសម្លការីជាដើម ។
លោកវណ្ណរ៉ា ក៏បានឲ្យ ដឹងថា សាច់កណ្តុរភាគីច្រើនត្រូវបានប្រជាជនក្នុងភូមិចូលចិត្តហូបជាអាហារ ។ វាមិនបានប៉ះពាល់ដល់សុខភាពនោះទេ ព្រោះវាជាសត្វស៊ីស្មៅ ឬសឈើរ ស្រូវ ស្មៅ ផ្លែឈើរព្រៃ ដំនាំកសិកផលមួយចំនួនរបស់ប្រជាពលរដ្ឋជាអាហារ ។
យ៉ាងណាក្តីលោកវណ្ណរ៉ា ក៏បានឲ្យដឹងនៅក្នុងគ្រួសារនៅក្នុងភូមិមនអ្នកហូបសាច់កណ្តុរច្រើន ប៉ុន្តែក៏មានអ្នកអត់ហូបដែរ គឺចំនួនតិចប៉ុណ្ណោះ ។ ជាមួយគ្នានោះដែរលោកថារាល់ការជួបជុំមិត្តភក្តិក្នងភូមិ ពិសេសនោះពេលហូបស្រាបៀរ លោកតែងតែទិញសាច់ កណ្តុរធ្វើជាគ្រឿងក្លែមទៀតផង ។លោកបន្ថែមថា មិត្តភក្តិលោកដែលមកផឹកជាមួយគ្នាក៏ចូលចិត្តហូបសាច់កណ្តុរផងដែរ ហើយពេលខ្លះពួកគេបានឲ្យកុម្មង់សាច់កណ្តុរទុកទទួលទាន ឬធ្វើជាគ្រឿងក្លែមទៀតផង។
ចំណែក លោក សេរី ដែលជាអ្នកភូមិផ្សេងពីលោកវណ្ណរ៉ា ហើយធ្វើការនៅភ្នំពេញក៏បានឲ្យដឹងថា លោកក៏ឧស្សាហ៍ហូបសាច់កណ្តុរផងដែរ នៅពេលចុះមកស្រុកម្តងៗ ។ លោកថា សាច់កណ្តុរធ្វើម្ហូបសឆ្ងាញ់ពិសេសនោះ ធ្វើគ្រឿងក្លែមដោយយកទៅអាំងឲ្យស្រួយឬ ស្រួល ចុច ឬជ្រលក់ទឹកម្ជូរសណ្តាន់ខ្ចី និងឆារក្តៅ ឆារគ្រឿង ឆារអំពិលទុំ ឬម្ជូរង៉ាប់ងូវជាដើម ។ លោកបន្តថា ហូបសាច់កណ្តុរមិនត្រលាន់ដូចជា សាច់ជ្រូកនោះទេ ព្រោះសាច់កណ្តុរមិនមានខ្លាញ់ ដោយសារពេលគេធ្វើគេបានយកខ្លាញ់ចេញអស់ ។
ដោយឡែកលោក ស្រស់ ដែលជាជាងដែករស់នៅក្នុងភូមិអន្លង់តាសេក ក៏បានឲ្យដឹងថា លោកក៏ហូបសាច់កណ្តុរផងដែរ ។ លោកថា សាច់កណ្តុរឆាញ់នៅពេលយកវាប្រឡាក់ ហើយហាលឲ្យស្ងួត ឬយកអាំងឲ្យស្រួយជ្រលក់ទឹកម្ជូរសណ្តាន់ ឬទឹកត្រីអំពិល ។ លោកថា ពេលខ្លះលោកក៏យកសាច់កណ្តុរឆារគ្រឿង ឬឆាខ្ញីផងដែរ ឆារគល់ស្លឹកគ្រៃជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ