រាជធានីភ្នំពេញ ៖ សម្តេច ហេង សំរិន ប្រធានកិត្តិយស និងជាប្រធានរដ្ឋសភាបានប្រារព្ធធ្វើខួប៦៨ឆ្នាំ នេះបានបង្ហាញយ៉ាងច្បាស់ថា គណបក្សប្រជាជនកម្ពុជា ប្តេជ្ញាយ៉ាងមុះមុត ក្នុងការថែរក្សា សុខសន្តិភាព ការអភិវឌ្ឍ និងអធិបតេយ្យជាតិ ។ យោងតាមបណ្តាញសង្គមរបស់ហេង សំរិនបានឲ្យដឹងថា ថ្ងៃទី២៨ ខែមិថុនា ឆ្នាំ២០១៩ គណបក្សប្រជសជនបានប្រារព្ធពិធីអបអរសាទរខួបគម្រប់៦៨ឆ្នាំថ្ងៃកំណើតគណបក្សយ៉ាងមហោឡារិកនេះ នៅមជ្ឈមណ្ឌលកោះពេជ្រ ។
សម្តេចបញ្ជាក់ថា«ឆ្លងកាត់ការលំបាក និងឧបសគ្គរាប់មិនអស់ គណបក្សប្រជាជនកម្ពុជាបានកសាងសមទ្ធិផលច្រើនណាស់ នៅក្នុងរយៈពេល៦៨ឆ្នាំមកនេះ ជាពិសេសនៅក្នុងរយៈពេល៤០ចុងក្រោយនេះ បន្ទាប់ពីរបបប៉ុលពតប្រល័យពូជសាសន៍បានផ្តួលរំលំទៅនោះ» ។
សម្តេចបន្ថែមថា គុណតម្លៃធំៗរបស់គណបក្សប្រជាជនកម្ពុជាត្រូវបានកត់សម្គាល់មានដូចជា ការចូលរួមទាមទារឯករាជ្យរំដោះប្រទេសជាតិចេញពីប្រល័យពូជសាសន៍ការស្វះស្វែងរកសុខសន្តិភាព បិទបញ្ចប់ភ្លើងសង្គ្រាម និងការប្រឹងប្រែងរក្សាឱ្យបាននូវសុខសន្តិភាព ដើម្បីអភិវឌ្ឍន៍ប្រទេសឱ្យរីកចម្រើនលើគ្រប់វិស័យ ដូចដែលយើងកំពុងទទួលបាននាពេលនេះ ។
គណបក្សប្រជាជនកម្ពុជា គឺជាទីប្រមូលផ្តុំខ្មែរគ្រប់ទិសទីគ្រប់មជ្ឍដ្ឋាន ដោយមិនប្រកាន់និន្នាការ អតីកាល វណ្ណៈនោះឡើយ ដែលមកដល់ពេលនេះ គណបក្សប្រជាជនកម្ពុជាមានសមាជិកសមាជិកាប្រមាណជាង៥លាននាក់ ។ ចាប់តាំងពីថ្ងៃបដិសន្ធិមកគណបក្សប្រជាជនកម្ពុជាបានប្រកាន់ខ្ជាប់ជានិច្ចនូវគោលបំណង និងឧត្តមគតិរបស់ខ្លួន គឺឈរនៅខាងប្រជាជនផ្សារភ្ជាប់រួមសុខទុក្ខជាមួយប្រជាជនពុះពារជម្នះគ្រប់ឧបសគ្គហ៊ានធ្វើពលិកម្មឥតរុញរា ដើម្បីកម្ពុជា ឯករាជ្យ សន្ដិភាព សេរីភាព ប្រជាធិបតេយ្យ អព្យាក្រឹត្យ និងវឌ្ឍនភាពសង្គម ។
គណបក្សប្រជាជនកម្ពុជាដែលបានដឹកនាំប្រទេស៤០មកហើយនោះមានបេសកកម្មដ៏ចម្បងក្នុងការថែរក្សាសុខសន្តិភាព ស្ថិរភាពសង្គម និងការអភិវឌ្ឍប្រទេសជាតិទៅមុខទៀតក្រោមម្លប់ព្រះមហាក្សត្រ និងដំបូលរដ្ឋធម្មនុញ្ញ ការការពារឱ្យបាននូវអធិបតេយ្យជាតិ សាមគ្គីជាតិ ឯករាជ្យជាតិ ស្នេហាជាតិ ស្រឡាញ់ប្រជាពលរដ្ឋ ដើម្បីសម្រេចឱ្យបាននូវសមទ្ធិលផលធំៗទៀត ជូនជាតិ និងប្រជាជន ពោល គឺដើម្បីប្រែក្លាយកម្ពុជាទៅជាប្រទេសអភិវឌ្ឍន៍រីកចម្រើន ស៊ីវីល័យ គ្មានសង្គ្រាម កើតឡើងជាថ្មីទៀតឡើយ នៅទឹកដីមាតុភូមិរបស់យើង ៕ កែសម្រួលដោយ ៖ សុឃាក់
ចែករំលែកព័តមាននេះ