រាជធានីភ្នំពេញ ៖ លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់បានថ្លែងបញ្ជាក់នៅចំពោះមុខម្ចាស់សំណង់ និងក្រុមហ៊ុនទទួលម៉ៅការសាងសង់ប្រមាណ១៦៥ក្រុមហ៊ុនថា គ្រប់សំណង់ទាំងអស់ត្រូវគោរពតាមច្បាប់…
រាជធានីភ្នំពេញ ៖ លោក ជា សុផារ៉ា ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់បានថ្លែងបញ្ជាក់នៅចំពោះមុខម្ចាស់សំណង់ និងក្រុមហ៊ុនទទួលម៉ៅការសាងសង់ប្រមាណ១៦៥ក្រុមហ៊ុនថា គ្រប់សំណង់ទាំងអស់ត្រូវគោរពតាមច្បាប់ និងត្រូវទទួលបាននូវការអនុញ្ញាតិត្រឹមត្រូវពីគ្រប់ស្ថាប័នជំនាញ ។
ថ្លែងក្នុងជំនួបសំណេះសំណាលជាមួយម្ចាស់សំណង់ និងក្រុមហ៊ុនទទួលម៉ៅការសាងសង់ប្រមាណ១៦៥ក្រុមហ៊ុន ឧបនាយករដ្ឋមន្ត្រី ជា សុផារ៉ា បានស្នើសុំឱ្យក្រុមហ៊ុនយកចិត្តទុកដាក់ បង្កើនការវិនិយោគសហការជាមួយក្រុមការងារចុះពិនិត្យដែលមានភារកិច្ចជួយគាំទ្រដល់ពួកគាត់ គោរពច្បាប់ក្នុងការសាងសង់ និងលើកកម្ពស់គុណភាពសំណង់ ដើម្បីនាំមកនូវប្រយោជន៍ផ្ទាល់ខ្លួន និងសេដ្ឋកិច្ចជាតិ ។ លោកជា សុផារ៉ា ក៏បានបញ្ជាក់ថា «សំណង់គ្មានច្បាប់ មិនអនុញ្ញាតឱ្យចូលស្នាក់នៅមិនអនុញ្ញាតឱ្យធ្វើអាជីវកម្ម មិនតទឹក និងតភ្លើងជូនឡើយក្នុងករណីមិនសហការជាមួយក្រុមការងារ» ។
ជាមួយគ្នានោះផងដែរ នាឱកាសអញ្ជើញដឹកនាំកិច្ចប្រជុំស្តីពីការប្រកាសគណៈកម្មការត្រួតពិនិត្យគុណភាពសំណង់ និងពិភាក្សាអំពីការគ្រប់គ្រងសំណង់នៅខេត្តព្រះសីហនុដោយមានការចូលរួមពីលោក គន់ គីម ទេសរដ្ឋមន្ត្រីមន្ត្រីទទួលបន្ទុកបេសកកម្មពិសេស ជាអនុប្រធានទី១ នៃគណៈកម្មការជាតិគ្រប់គ្រងគ្រោះមហន្តរាយ , លោក ថោង ខុន រដ្ឋមន្ត្រី ក្រសួងទេសចរណ៍ , លោក សាយ សំអាល់ រដ្ឋមន្ត្រីក្រសួងបរិស្ថាន និងអង្គភាពពាក់ព័ន្ធនៅសាលាខេត្តព្រះសីហនុ នាថ្ងៃទី២៥ ខែមិថុនានេះ ។
ដោយកិច្ចប្រជុំនេះទទួលបានលទ្ធផលដូចជា ៖ ១- បានប្រកាសសមាសភាពគណៈកម្មការត្រួតពិនិត្យគុណភាពសំណង់ខេត្តព្រះសីនុ និងក្រុមការងារបច្ចេកទេសបានអនុម័ត និងដាក់អោយអនុវត្ត check list ក្នុងការចុះពិនិត្យសំណង់ ដើម្បីមានមូលដ្ឋានវាយតម្លៃអំពីគុណភាពសំណង់ ។ ស្នើគណៈកម្មការ និងក្រុមការងារបច្ចេកទេសចាប់ផ្តើអនុវត្តការងារពេលមួយសប្តាហ៍ក្នុងជំហានដំបូងដោយត្រូវប្រតិបត្តិឱ្យបានម៉ងចត់ សុក្រឹត្យ និងគោរពក្រមសីលធម៌ វិជ្ជាជីវៈ។ ផ្អែកលើលទ្ធផលទទួលបានក្រសួងរៀបចំដែនដីនគរូបនីយកម្ម និងសំណង់បូកសរុបរបាយការណ៍ព្រមទាំងពិគ្រោះយោបល់ជាមួយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដើម្បីរាយការណ៍ និងសូមការសម្រេចដ៏ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងផ្អាកជាបន្ទាន់នូវការដ្ឋានសំណង់ដែលគ្មានច្បាប់ និងមិនគោរពតាមបទដ្ឋានបច្ចេកទេស ។ ជាមួយគ្នានោះផងដែរ ក្រសួងរៀបចំដែនដីនគរូបនីយកម្ម និងសំណង់ រៀបចំឱ្យមានរថយន្តពន្លត់អគ្គិភ័យសម្រាប់ខេត្តព្រះសីហនុ ដែលមានសមត្ថភាពប្រតិបត្តិការដល់កម្ពស់៥៧ជាន់ ចំនួន២គ្រឿងសម្រាប់បង្កើនសមត្ថភាពសង្គ្រោះក្នុងករណីមានគ្រោះថ្នាក់ជាយថាហេតុ ។
សូមរម្លឹកថា គណៈកម្មការត្រួតពិនិត្យគុណភាពសំណង់ខេត្តព្រះសីនុ និងក្រុមការងារបច្ចេកទេស ត្រូវបានបង្កើតឡើងក្រោយពីមានហេតុការណ៍នៃការបាក់រលំអគារកំពុងសាងសង់កកម្ពស់៧ជាន់ ដែលបានបណ្តាលឲ្យកម្មករសរុប២៨ នាក់ស្លាប់ និង២៦ រូបផ្សេងទៀតរងរបួស ៕ កែសម្រួលដោយ ៖ សុឃាក់
ចែករំលែកព័តមាននេះ