រាជធានីភ្នំពេញ៖ តារាចម្រៀងអ្នកស្រីអ៊ុន សុផល កំពុងមានវត្តមានលើទឹកដីកំណើត ហើយកាលពីពេល ថ្មីៗនេះបានចូលរួមច្រៀងក្នុងកម្មវិធីតន្ត្រីទូរទស្សន៍ ។ អ្នកចម្រៀងជំនាន់លោកប៊ុន ចាន់ថន រូបនេះបានបែកឃ្លាតមាតុភូមិចេញទៅនៅអាមេរិកប្រមាណ២០ឆ្នាំហើយ…
រាជធានីភ្នំពេញ៖ តារាចម្រៀងអ្នកស្រីអ៊ុន សុផល កំពុងមានវត្តមានលើទឹកដីកំណើត ហើយកាលពីពេល ថ្មីៗនេះបានចូលរួមច្រៀងក្នុងកម្មវិធីតន្ត្រីទូរទស្សន៍ ។ អ្នកចម្រៀងជំនាន់លោកប៊ុន ចាន់ថន រូបនេះបានបែកឃ្លាតមាតុភូមិចេញទៅនៅអាមេរិកប្រមាណ២០ឆ្នាំហើយ ។
អ្នកស្រីអ៊ុន សុផល ក្រៅពីច្រៀងបទសម័យ ក៏ច្រៀងបទប្រពៃណីដែរ ហើយទទួលបានការសរសើរពីទឹកដមសំឡេងពីរោះរណ្តំ ។ បើទោះជាអ្នកស្រីសុផល ចាកចេញទៅនៅស្រុកគេក្តី តែក្នុងកម្មវិធីមង្គលការគេតែងតែឮបទចម្រៀងប្រពៃណីរបស់អ្នកស្រី ។ ក្រៅពីច្រៀងភ្លេងការ អ្នកស្រីអ៊ុន សុផល ច្រៀងបទសម័យក៏ពីរោះពីរោះដែរ ។
ថ្លែងលើវេទិកាតន្ត្រីរបស់ទូរទស្សន៍ភីអិនអិន កាលពីយប់ថ្ងៃទី២៣ មិថុនា ឆ្នាំ២០១៩ អ្នកស្រីអ៊ុន សុផល ដែលចូលរួមច្រៀង៣បទក្នុងនោះប្រពៃណី២បទបានរៀបរាប់ ខ្លះៗថា អ្នកស្រីចេញទៅនៅអាមេរិកជិត២០ឆ្នាំមកហើយ ដោយអារម្មណ៍ពិតជាមហានឹកមាតុភូមិខ្មែរបំផុត ។ ទៅនៅអាមេរិកអ្នកស្រីនៅតែបន្តអាជីពសិល្បៈដោយសព្វថ្ងៃច្រៀងប្រចាំនៅភោជនីយដ្ឋានមួយរាល់ចុងអាទិត្យ ។
អ្នកស្រីអ៊ុន សុផល មិនបានបង្ហាញឲ្យដឹងថា ស្វាមីអ្នកស្រីប្រកបការងារអ្វី ឬមានកូនចៅប៉ុន្មាននោះទេ ។ អ្នកស្រីសុផលបន្តទៀតថា «បែកស្រុក២០ឆ្នាំទើបតែ១១ឆ្នាំចុងក្រោយនេះ ដែលខ្ញុំមិនបានមក ។ មកលើកនេះពិតជាប្លែកឃើញស្រុកទេសជឿនលឿនខ្លាំង ។ ឮគេថាប្លែករីកចម្រើន ជាក់ស្តែងមកដល់ស្រុកឃើញថាលូតលាស់រហូតវង្វេងផ្លូវចំណាំមិនបានដោយអារម្មណ៍ និងចិត្តវិញគឺអរណាស់ ឃើញប្រទេសយើងមានអ្វី ល្អៗគ្រប់បែបយ៉ាង » ។
នៅពេលពិធីករសួរថាបើមានផលិតកម្មណាចង់ឲ្យថតចម្រៀង តើអ្នកស្រីថតទេ ហើយចង់នៅស្រុកខ្មែរវិញទេ ? អ្នកស្រីសុផលនិយាយយ៉ាងលឿនថា «បើមានគេហៅថតចម្រៀងពេញចិត្តទទួល ហើយបើនិយាយពីចិត្តអាចនឹងមានគម្រោងត្រឡប់មកនៅកម្ពុជាយើងវិញមិនចោលនោះទេ ដោយរង់ចាំចាត់ចែងការងារផ្ទាល់ខ្លួនឲ្យចប់រួចរាល់ នោះផែនការមកនៅស្រុកខ្មែរអាចកើតមានច្រើនបំផុតព្រោះស្រឡាញ់ប្រទេសយើងបំផុត » ។
អ្នកស្រីអ៊ុន សុផល មិនទាន់វិលទៅអាមេរិកលឿនវិញទេ ដោយចំណាយពេលច្រៀងតាមទូរទស្សន៍នានា ដើរកម្សាន្តតាមខេត្ត និងជាពិសេសអ្នកស្រីចង់សួរសុខទុក្ខមិត្តភក្តិ ចាស់ៗដែលបែកគ្នាយូរ ៕ (កែសម្រួលដោយ ៖ បុប្ផា)
ចែករំលែកព័តមាននេះ