បដិមាព្រះរាម នឹងបង្ហាញខ្លួនក្នុងពិព័រណ៍នៅអ៊ីតាលី និងអាមេរិក
- ភ្នំពេញ
រាជធានីភ្នំពេញ៖ ឯកឧត្តមគង់ វីរៈ អនុរដ្ឋលេខាធិកាក្រសួងវប្បធម៌ និងវិចិត្រសិល្បៈ បានចូលរួមក្នុងពិធីបិទកេស និងសូត្រមន្តប្រោះព្រំ ប្រសិទ្ធីបដិមាព្រះរាម មកពីខ្លោងទ្វារខាងកើតប្រាសាទចិន តំបន់កោះកេរ ដែលគ្រោងនឹងយកទៅតាំងពិព័រណ៍នៅបរទេសនាពេលខាងមុខ ។
បើតាមសារមន្ទីរជាតិ បដិមាព្រះរាម បន្ទាប់ពីធ្វើពិធីប្រោះព្រំរួចកាលពីពេលថ្មីៗកន្លងមកនេះនឹងត្រូវយកទៅតាំងបង្ហាញជាប្រភេទពិព័រណ៍ចល័តនៅបរទេសចំនួន២ទីតាំង គឺនៅក្នុងប្រទេសអ៊ីតាលី និងសហរដ្ឋអាមេរិក ក្រោមប្រធានបទ«Broken: The Power of the Fragment in Sculpture» ។ ទីតាំងទី១ គឺនៅសារមន្ទីរ Palazzo Strozzi នាទីក្រុង Flcrence ប្រទេសអ៊ីតាលី ដែលមានកាលបរិច្ឆេទពិព័រណ៍ចាប់ពីថ្ងៃទី២៦ ខែកញ្ញា ឆ្នាំ២០២៦ ដល់ថ្ងៃទី២៤ ខែមករា ឆ្នាំ២០២៧ ។
ទីតាំងទី២ នៅវិចិត្រសាល National Gallery of Art ទីក្រុង Washington D.C សហរដ្ឋអាមេរិក ចាប់ពីថ្ងៃទី៨ ខែមីនា ឆ្នាំ២០២៧ ដល់ថ្ងៃទី២៧ ខែមិថុនា ឆ្នាំ២០២៧ ។
ការតាំងបង្ហាញបដិមាព្រះរាម នឹងធ្វើឡើងរួមគ្នាជាមួយស្នាដៃសិល្បៈចំនួន៧៥ផ្សេងទៀត ឆ្លុះបញ្ចាំងអំពីប្រវត្តិសិល្បៈជាលក្ខណៈសាកលរបស់ពិភពលោក រាប់ចាប់តាំងពីអារ្យធម៌មេឌីទែរ៉ាណេនាសិល្បៈចម្លាក់ថ្មម៉ាបក្រិកបុរាណ រហូតដល់សិល្បៈសហសម័យ ។
ក្រោយបញ្ចប់ការតាំងពិព័រណ៍ស្តីអំពី «Broken: The Power of the Fragment in Sculpture» បដិមាព្រះរាមនឹងត្រូវចល័តត្រឡប់មកសារមន្ទីរជាតិកម្ពុជាវិញ ។ នេះជាកិច្ចសហប្រតិបត្តិការរវាងក្រសួងវប្បធម៌ និងវិចិត្រសិល្បៈនៃព្រះរាជាណាចក្រកម្ពុជា ជាមួយសារមន្ទីរPalazzo Strozzi នាទីក្រុងFlcrence ប្រទេសអ៊ីតាលី និងNational Gallery of Art ទីក្រុងWashington D.C សហរដ្ឋអាមេរិក ដើម្បីផ្សព្វផ្សាយអំពីសិល្បៈ និងអារ្យធម៌ខ្មែរ ក៏ដូចជាការពង្រឹងចំណងមិត្តភាពផ្នែកវប្បធម៌ជាមួយដៃគូអន្តរជាតិ តាមរយៈការតាំងបង្ហាញរូបចម្លាក់ខ្មែរនៅបរទេស ៕
ចែករំលែកព័តមាននេះ