ខេត្តក្រចេះ ៖ តាមសេចក្តីរាយការណ៍ឲ្យដឹងថា ស្ត្រីមេម៉ាយម្នាក់ត្រូវបានគេប្រទះឃើញចងកសម្លាប់ខ្លួននៅលើដើមស្វាយ ដែលប្រមាណជាង៥០០ម៉ែត្រពីភូមិ គ្មានអ្នកណាដឹងពីមូលហេតុនោះទេ ។
ហេតុការណ៍ខាងលើបានបង្កការភ្ញាក់ផ្អើលកើតឡើងកាលពីវេលាម៉ោង១២និង៤៤នាទីថ្ងៃត្រង់ថ្ងៃទី២៣ ខែមិថុនា នៅភូមិចង្ហប ឃុំក្បាលដំរី ស្រុកសំបូរ ខេត្តក្រចេះ ។
តាមប្រភពពីសាក្សីជាអ្នកជិតខាងបានរៀបរាប់ប្រាប់សមត្ថកិច្ចថា ស្ត្រីរងគ្រោះដែលស្លាប់ឈ្មោះ ថោង ធី ហៅ យាយ ធី អាយុ៥១ឆ្នាំ ជាស្ត្រីមេម៉ាយអត់មានកូន រស់នៅភូមិឃុំកើតហេតុខាងលើ ។
តាមប្រភពដដែលបានបន្តថា ស្ត្រីរងគ្រោះបានបាត់ពីផ្ទះកាលពីវេលាម៉ោងប្រហែល៥និង៣០ល្ងាចថ្ងៃទី២២ ខែមិថុនា ដោយមិនឃើញត្រឡប់មកផ្ទះវិញឡើយ ដែលនោះខុសពីទម្លាប់ប្រចាំថ្ងៃ ។ ប៉ុន្តែនៅពេលដែលអ្នកស្រុកដឹងថា ស្ត្រីរងគ្រោះបាត់ពីផ្ទះនោះ ធ្វើឱ្យបងប្អូន និងអ្នកជិតខាងបាននាំគ្នាជួយដើរកដែរ តែរកមិនឃើញឡើយ ហើយក៏សម្រាករៀងខ្លួនអស់ទៅ ។
តាមប្រភពដដែលបានបន្តទៀតថា ស្ត្រីរងគ្រោះតែផឹកស្រា និងស្រវឹងខួបប្រចាំថ្ងៃ តែមិនដែលទៅណាឆ្ងាយពីផ្ទះនោះទេ ដូច្នោះហើយបានជាបងប្អូន និងអ្នកជិតខាងមិនសូវមានការចាប់អារម្មណ៍ដើររកនោះឡើយ ។ លុះដល់វេលាម៉ោងប្រមាណជិត១រសៀលថ្ងៃ២៣ មិថុនា ស្រាប់តែអ្នកស្រុកប្រទះឃើញស្ត្រីរងគ្រោះចងកនៅលើដើមស្វាយ ដែលមានចម្លាយពីភូមិប្រមាណជាង៥០០ម៉ែត្រ ស្លាប់បាត់ទៅហើយ ដោយគ្មានអ្នកណាម្នាក់ដឹងពីមូលហេតុនៃការធ្វើអត្តឃាតដោយចង.កនេះឡើយ បន្ទាប់មកអ្នកស្រុកក៏បានរាយការណ៍ទៅសមត្ថកិច្ចដើម្បីឱ្យចុះមកពិនិត្យតែម្តង។
ក្រោយពេលកើតហេតុ សមត្ថកិច្ចបានចុះទៅដល់កន្លែងកើតហេតុ និងកាប់មែកស្វាយដើម្បីទម្លាក់សពចុះក្រោម និងធ្វើការពិនិត្យរួច សមត្ថកិច្ចបានប្រគល់សពឲ្យទៅក្រុមគ្រួសារដើម្បីរៀបចំធ្វើបុណ្យតាមប្រពៃណី ៕
ចែករំលែកព័តមាននេះ