ប្រទេសអុី ៖ អុីរ៉ង់ប្រកាសនាថ្ងៃទី២០ មិថុនាថា បានបាញ់ធ្លាក់យន្តហោះគ្មានមនុស្សបើកធ្វើចារកម្ម១គ្រឿងរបស់អាមេរិក ដែលហោះរំលោភបំពានដែនអាកាសខ្លួន ខណៈកំពុងមានភាពតានតឹងខ្លាំងក្នុងតំបន់ឈូងសមុទ្រពែរ្ស៍ ដែលនាំឲ្យមានការភ័យខ្លាច ផ្ទុះជម្លោះដោយចំហមួយ រវាងក្រុងវ៉ាស៊ីនតោននិងក្រុងតេហេរ៉ង់ ។
យន្តហោះម៉ូដែល GLOBAL HAWK ផលិតដោយក្រុមហ៊ុនអាមេរិក NORTHROP GRUMMAN ត្រូវបាញ់ធ្លាក់នាវេលាព្រឹក ពីលើខេត្តជាប់មាត់សមុទ្រ HORMOZGAN ភាគខាងត្បូងអុីរ៉ង់ ។ នេះបើតាមសេចក្ដីប្រកាសមួយរបស់កងឆ្មាំបដិវត្តន៍ អុីរ៉ង់ ។
តាមសេចក្ដីប្រកាសនោះថា យន្តហោះនេះត្រូវបាញ់ធ្លាក់ ដោយមីស៊ីល១គ្រាប់ របស់កងកម្លាំងអាកាស នៃកងឆ្មាំបដិវត្តន៍ក្នុងដែនទឹកនៃឆ្នេរសមុទ្រទល់មុខភ្នំម៉ូបារ៉ាក់ ពេលហោះរំលោភបំពានដែនអាកាសអុីរ៉ង់ ។
កងទ័ពអាមេរិកកាលពីថ្ងៃទី១៩ មិថុនា បានបង្កើនការចោទប្រកាន់ប្រឆាំងអុីរ៉ង់ថា ជាអ្នកទទួលខុសត្រូវលើការវាយប្រហារនាវាដឹកប្រេង២គ្រឿងកាលពីថ្ងៃទី១៣ មិថុនា ក្នុងសមុទ្រអូម៉ង់ ៕
កែសម្រួលដោយ ៖ សំណាង
ចែករំលែកព័តមាននេះ