ទីក្រុងវ៉ាស៊ីនតោន៖ លោកត្រាំថ្មីៗនេះបាននិយាយពន្លះក្រុមសម្ព័ន្ធមិត្តនៅក្នុងអង្គការណាតូជាមួយគ្នាមួយអស់ដៃ និងចាត់ទុកថាពួកគេសុទ្ធតែជាក្រុមកំសាក មិនព្រមជួយជ្រោមជ្រែងឱ្យបានពេញដៃពេញជើងនៅក្នុងប្រតិបត្តិការសឹករបស់អាមេរិកនៅអ៊ីរ៉ង់។ ត្រាំបានបង្ហោះសារនៅលើបណ្ដាញសង្គមថា «បើគ្មានអាមេរិកទេ ណាតូគ្រាន់តែជាខ្លាក្រដាសតែប៉ុណ្ណោះ»។
អស់ជាច្រើនថ្ងៃហើយ លោកត្រាំបានអំពាវនាវឱ្យក្រុមសម្ព័ន្ធមិត្ត និងប្រទេសដទៃទៀតជួយបើកច្រកហ័រម៉ូសដែលត្រូវអ៊ីរ៉ង់បិទខ្ទប់ជិតឈឹង មិនអនុញ្ញាតឱ្យកប៉ាល់ដឹកប្រេង និងឧស្ម័នឆ្លងកាត់បានឡើយ។ បញ្ហានេះធ្វើឱ្យតម្លៃថាមពលហក់ឡើងខ្ពស់ជាបន្តបន្ទាប់។ គួរកត់សម្គាល់ថាប្រទេសដែលលោកត្រាំបោះដៃទៅរកនោះសុទ្ធតែមិនបានដឹងថាអាមេរិកមានផែនការវាយប្រហារអ៊ីរ៉ង់នៅពេលណាទេព្រោះមិនបានជូនដំណឹង ឬសួរយោបល់អ្វីទាំងអស់។
លោកត្រាំថ្លែងថាក្រុមប្រទេសសម្ព័ន្ធមិត្តនៅក្នុងអង្គការណាតូចេះតែត្អូញត្អែរអំពីបញ្ហាប្រេងឡើងថ្លៃ។ ប៉ុន្តែពួកគេមិនចង់ចូលរួមជាមួយអាមេរិកដើម្បីវាយប្រហារអ៊ីរ៉ង់សោះ។ លោកសរសេររៀបរាប់បន្តទៀតថាឥឡូវនេះ អាមេរិកមើលឃើញជ័យជម្នះយោធាជាបណ្ដើរៗហើយ (លើអ៊ីរ៉ង់)។ ប៉ុន្តែនៅក្នុងស្ថានភាពដែលពួកគេ (ណាតូ) ប្រឈមនឹងគ្រោះថ្នាក់តិចតួចជាទីបំផុត ពួកគេនៅតែត្អូញត្អែរអំពីប្រេងឡើងថ្លៃ។ លោកចង់មានន័យថាពួកគេបានតែត្រឹមត្អូញ។ ប៉ុន្តែមិនព្រមជួយបើកច្រកសមុទ្រហ័រម៉ូស។ លោកអះអាងថាបញ្ហាហ័រម៉ូសនេះតែមួយគត់ដែលធ្វើឱ្យប្រេងឡើងថ្លៃ។ លោកយល់ថាគ្មានអ្វីពិបាកសោះ គ្រាន់តែចូលរួមបន្តិចទៅក៏មិនបាន, មានទៅប្រឈមនឹងហានិភ័យអ្វីធ្ងន់ធ្ងរ!
កំសាកណាស់, យើងនឹងចងចាំរឿងនេះទុក
អាល្លឺម៉ង់ អង់គ្លេស បារាំង អ៊ីតាលី ហូឡង់ ជប៉ុន និងកាណាដាបានចេញសេចក្ដីថ្លែងការណ៍រួមកាលពីយប់មិញដោយសន្យាថានឹងចូលរួមនៅក្នុងកិច្ចខិតខំប្រឹងប្រែងរួមគ្នាដើម្បីចាត់វិធានការដ៏សមស្របណាមួយជួយសម្រួលដល់សុវត្ថិភាពរបស់កប៉ាល់ដែលបើកចេញ-ចូលច្រកសមុទ្រហ័រម៉ូស។ ប៉ុន្តែអធិការបតីអាល្លឺម៉ង់ លោកហ្វ្រីតរីច ម៊ែក (Friedrich Merz) បញ្ជាក់ច្បាស់ហើយថាលោកនឹងចូលរួមអនុវត្តផែនការនេះលុះត្រាតែសង្គ្រាមប្រដាប់អាវុធបិទបញ្ចប់ជាមុនសិន៕ ប្រភព៖ រ៉យទ័រ និងប្រភពដទៃទៀត
ចែករំលែកព័តមាននេះ