ខេត្តកំពង់ឆ្នាំង ៖ ផ្ទះឈើមួយខ្នងប្រក់ស័ង្កសីមានទំហំ៦ម៉ែត្រគុណ៩ម៉ែត្រត្រូវអគ្គិភ័យឆាបឆេះអស់មួយកំណាត់ខាងក្រោយ ខណៈម្ចាស់ដាំបាយដាក់ចោល ហើយចេញទៅផ្សារ ។ ហេតុការណ៍នេះបង្កឱ្យមានការភ្ញាក់ផ្អើលបានកើតឡើងកាលពីវេលាម៉ោង៨និង៤០នាទីព្រឹកថ្ងៃទី២១ ខែមិថុនា ឆ្នាំ២០១៩ នៅភូមិត្រពាំងបី សង្កាត់ផ្សារឆ្នាំង ក្រុងកំពង់ឆ្នាំង។
សមត្ថកិច្ចនគរបាលក្រុងកំពង់ឆ្នាំងបានអោយដឹងថា ម្ចាស់ផ្ទះរងគ្រោះឈ្មោះ ជួន វិបុល អាយុ៥០ឆ្នាំ ត្រូវជាប្តី និងប្រពន្ធឈ្មោះ គឹម ហេង អាយុ៤៩ឆ្នាំ ជាអាជីវករលក់មាន់នៅផ្សារលើ ។
តាមប្រភពដដែលបានបញ្ជាក់ថា មុនពេលកើតហេតុ ម្ចាស់ផ្ទះខាងលើបានដាំបាយដាក់ចោលហើយក៏ទៅផ្សារ ក្រោយមកក៏មានអគ្គីភ័យឆាបឆេះ ហើយកម្មករដែលកំពុងធ្វើផ្ទះនៅជិតកន្លែងកើតហេតុបានជួយជះទឹកពន្លត់ បន្ទាប់មកក៏មានរថយន្តពន្លត់អគ្គីភ័យរបស់ស្នងការដ្ឋាននគរបាលខេត្តចេញអន្តរាគមន៍ចំនួន៤គ្រឿងមកដល់កន្លែងកើតហេតុដែរ ប៉ុន្តែបាញ់ទឹកពន្លត់អស់មួយគ្រឿងធ្វើឱ្យភ្លើងរលត់ទៅវិញទាំងស្រុង ។
ក្នុងហេតុការណ៍អគ្គិភ័យឆាបឆេះខាងលើ បណ្តាលឱ្យរងការខូចខាតអស់ផ្ទះមួយកំណាត់ខាងក្រោយ និងសម្ភារៈក្នុងផ្ទះមួយចំនួន តែមិនមាននរណាម្នាក់រងគ្រោះថ្នាក់នោះទេ៕
ចែករំលែកព័តមាននេះ