រាជធានីភ្នំពេញ ៖ យុទ្ធនាការដើរដង្ហែក្បួនប្រឆាំងជំងឺគ្រុនឈាមប្រចាំឆ្នាំបានចាប់ផ្ដើមហើយក្រោមប្រធានបទ “កំចាត់ជំងឺគ្រុនឈាម ដើម្បីការពារអ្នក និងគ្រួសារអ្នក”។ ការដង្ហែក្បួននេះបានធ្វើឡើងនៅព្រឹកថ្ងៃទី១៥ មិថុនា ក្នុងរាជធានីភ្នំពេញ ។ អ្នកស្រីម៉ូល្លីកា អិតធិសាគុលឆៃ តំណាងក្រុមហ៊ុនអេសស៊ី ចនសាន់បានឱ្យដឹងថានេះ គឺជាឆ្នាំទី៦ ដែលក្រុមហ៊ុនអេសស៊ី ចនសាន់ បង្កើតយុទ្ធនាការដោយប្រើរ៉េដ និងអហ្វ ដែលជាផលិតផលកំចាត់ជំងឺគ្រុនឈាមដើម្បី រួមចំណែកយកចិត្ដទុកដាក់ក្នុងការប្រយុទ្ធប្រឆាំងនឹងជំងឺគ្រុនឈាមនៅក្នុងប្រទេសកម្ពុជា ដោយមានការជួយជ្រោមជ្រែងសហការយ៉ាងអស់ពីកម្លាំងកាយចិត្ដ ពីមជ្ឈមណ្ឌលជាតិប្រយុទ្ធជំងឺគ្រុនចាញ់របស់ក្រសួងសុខាភិបាល រួមទាំងមន្ទីរ និងស្ថាប័នពាក់ព័ន្ធនានា ។
ករណីជំងឺគ្រុនឈាមថ្មីៗក្នុងប្រទេសកម្ពុជា ក្នុងរយៈពេលចាប់ពីខែមករា ដល់ខែ មិថុនា ឆ្នាំ២០១០នេះ មានជំងឺគ្រុនឈាម ១.១១១ករណីបានកើតឡើង ហើយមានមនុស្សប្រហែល៧នាក់បានស្លាប់ដោយសារជំងឺនេះ ។ ក្នុងអំឡុងសបា្ដហ៍ទី២១ ក្នុងឆ្នាំនេះ ស្ថានភាពជំងឺគ្រុនឈាមហាក់ដូចជាមានការកើនឡើងបន្ដិច នៅក្នុងខេត្ដកំពង់ចាម កំពង់ធំ សៀមរាប និងរាជធានីភ្នំពេញ។ ទោះបីជាយ៉ាងណាក៏ដោយ ករណីស្លាប់មាន ការធ្លាក់ចុះបើយើងប្រៀបធៀបទៅនឹង អំឡុងពេលដូចគ្នាកាលពីឆ្នាំទៅមិញ ដោយសារការអប់រំដែលក្រសួងសុខាភិបាលបានធ្វើ ក្នុងរយៈពេលកន្លងមក ។ ក្រុមហ៊ុនអេសស៊ី ចនសាន់ មានកិត្ដិយសខ្លាំងណាស់ដែលបាន រួមចំណែកក្នុងជោគជ័យនេះ ហើយសូមធានាអះអាងថា នឹងបន្ដចូលរួមក្នងយុទ្ធនាការដ៏សំខាន់នេះ ដើម្បីប្រយុទ្ធប្រឆាំងនឹងជំងឺគ្រុនឈាម ។
សកម្មភាពសំរាប់យុទ្ធនាការនេះប្រារឰ ចាប់ពីថ្ងៃទី១៥ ខែមិថុនា រហូតដល់ថ្ងៃទី២៤ ខែសីហា ឆ្នាំ២០១០ ដូចជាការដើរដង្ហែក្បួន យុទ្ធនាការ ដែលមានការចូលរួមពីសិស្សានុសិស្ស លោកគ្រូអ្នកគ្រូ និងមន្ដ្រីមកពីមជ្ឈមណ្ឌលជាតិប្រយុទ្ធប្រឆាំងជំងឺគ្រុនចាញ់ ដោយចេញដំណើរពីមុខវត្ដឧណ្ណាឡោម តាមបណ្ដោយវិថីព្រះស៊ីសុវត្ថិ តំរង់ឆ្ពោះទៅរង្វង់មូលសម្ដេចព្រះសង្ឃរាជ ជួនណាត រួចបត់ ទៅសួនច្បារមុខវត្ដបទុមវតី ។ ហើយនៅថ្ងៃនេះ សិក្ខាសាលានឹងធ្វើឡើងរហូតដល់ថ្ងៃទី ២៤ ខែសីហា ឆ្នាំ២០១០ ដោយក្រុមការងារ របស់ក្រុមហ៊ុនអេសស៊ី ចនសាន់ ហើយមាន ការចូលរួមគាំទ្រពីតំណាងមកពីមជ្ឈមណ្ឌលជាតិប្រយុទ្ធប្រឆាំងជំងឺគ្រុនចាញ់ និងនាយកដ្ឋានសុខភាពរាជធានីភ្នំពេញផងដែរ ។
សិក្ខាសាលានេះនឹងត្រូវរៀបចំឡើងនៅរាជធានីភ្នំពេញ ខេត្ដកំពង់ចាម ខេត្ដកំពង់ធំ ខេត្ដសៀមរាប ខេត្ដបន្ទាយមានជ័យ ខេត្ដបាត់ដំបង ខេត្ដពោធិ៍សាត់ ខេត្ដកំពង់ឆ្នាំង និង ខេត្ដកណ្ដាល ដោយមានការចូលរួមពីប្រជាពលរដ្ឋចំនួន៤.០០០គ្រួសារ ។ ក្រុមការងារ នឹងលើកយកប្រធានបទ “កំចាត់ជំងឺគ្រុនឈាមដើម្បីការពារអ្នក និងគ្រួសារអ្នក” មកបង្ហាញក្នុងសិក្ខាសាលានេះ ដែលនឹងផ្ដល់ការយកចិត្ដទុកដាក់ និងពិភាក្សាដោយផ្ទាល់ជាមួយប្រជាជន អំពីការការពារឱ្យជៀសផុតពី ជំងឺគ្រុនឈាម ។ ក្រុមការងារនឹងចែកជូនធូបមូសរ៉េដឡាវ៉ែនឌ័រមួយប្រអប់ដល់គ្រួសារនីមួយៗដែលបានមកចូលរួមក្នុងសិក្ខាសាលានេះ ។ចក្ខុវិស័យមួយរបស់យើង គឺត្រូវតែធ្វើឱ្យគ្រួសារនីមួយៗរស់នៅដោយមានអនាម័យ សុវត្ថិភាព និងសុខភាពល្អ ហើយយើងមានកិត្ដិយសខ្លាំងណាស់ដែលមានឱកាសធ្វើការងារជាមួយមជ្ឈមណ្ឌលជាតិប្រយុទ្ធប្រឆាំង ជំងឺគ្រុនចាញ់របស់ក្រសួងសុខាភិបាល រួមជាមួយមន្ទីរ និងស្ថាប័នពាក់ព័ន្ធនានា ដើម្បីសំរេចកិច្ចការទាំងអស់នេះបានប្រកបដោយជោគជ័យ ៕
ចែករំលែកព័តមាននេះ