ខេត្តតាកែវ ៖ ប្រជាពលរដ្ឋមួយគ្រួសារមានសមាជិក៨នាក់បានទិញពងទាសាបយកមកធ្វើម្ហូបហូបបាយពេលព្រឹក ស្រាប់តែមានអការៈចុកពោះ និងក្អួតចង្អោ ដោយសង្ស័យពុលពងទា ព្រោះកើតឡើងក្រោយពេលដែលយកទៅចៀនធ្វើម្ហូបហូប បណ្តាលឲ្យរត់ចូលពេទ្យសឹងមិនទាន់ទាំងព្រឹក។
ករណីពុលចំណីអាហារ ដោយសង្ស័យថា បណ្តាលមកពីហូបពងទានោះ បានកើតឡើងកាលពីព្រឹកម៉ោង៨ នៅថ្ងៃទី១៨ ខែមិថុនា ឆ្នាំ២០១៩ ស្ថិតនៅក្នុងភូមិត្រពាំងទឹក ឃុំជាងទង ស្រុកត្រាំកក់ ខេត្តតាកែវ។
បើតាមនគរបាលស្រុកត្រាំកក់បានឱ្យដឹងថា គ្រួសារដែលមានសមាជិកចំនួន៨នាក់ខាងលើ ១-ឈ្មោះ ប៊ិន ស្រីអូន ភេទស្រី អាយុ៣២ឆ្នាំ ២-ឈ្មោះ ផាន់ វុទ្ធី ភេទប្រុស អាយុ៣២ឆ្នាំ ៣-ឈ្មោះ ប៊ិន សុជា ភេទប្រុស អាយុ ៤២ឆ្នាំ ៤-ឈ្មោះ ពេជ្រ យ៉ា ភេទស្រី អាយុ៦៦ឆ្នាំ ៥-ឈ្មោះ លឹម ចាន់ថាវី ភេទស្រី អាយុ១០ឆ្នាំ ៦-ឈ្មោះ លឹម ចាន់រស្មី ភេទស្រី អាយុ៨ឆ្នាំ ៧-ឈ្មោះ រិន មករា ភេទប្រុស អាយុ៣ឆ្នាំ និង៨-ឈ្មោះ ហ៊ន ចិន្ដា ភេទស្រី អាយុ៣ឆ្នាំ។
បើតាមការបញ្ជាក់ពីជនរងគ្រោះប្រាប់ថា ពងទាដែលពួកគាត់ហូបនេះ បានទិញកាលពីថ្ងៃអាទិត្យ ទី១៦ មិថុនា ចំនួន៧គ្រាប់ពីផ្សាអង្គរកា រួចយកទៅចៀនហូបអស់ចំនួន៤គ្រាប់ភ្លាមៗតែពេលនោះមិនបានកើតអ្វីនោះទេ ។
ទើបតែនៅព្រឹកថ្ងៃទី១៨ មិថុនានេះ បានចៀនពងទាហូបចំនួន៣គ្រាប់បង្ហើយ ស្រាប់តែមានសភាពន់ដៃទន់ជើង ល្ហិតល្ហៃ អស់កម្លាំង និងក្អួតតែម្តង ។ ជនរងគ្រោះបន្ថែមថា ពងទាដែលចៀននោះ គឺដាក់គ្រឿងផ្សំមានប៊ីចេង អំបិល ធម្មតាពុំបានដាក់ម្រេចទេ ហើយក៏ពុំបានហូបអ្វីក្រៅពីពងទាដែរ។
ខណៈពេលនោះអ្នកជំងឺទាំង៨នាក់ពុលចំណីខាងលើ ដែលសង្ស័យបណ្តាលមកពីពងទានេះ ត្រូវបានសាច់ញាតិយកទៅព្យាបាលនៅមន្ទីរពេទ្យបង្អែកអង្គរកាដើម្បីជួយសង្គ្រោះ ចំណែកអ្នកធូរស្រាលក៏ត្រឡប់ទៅផ្ទះវិញ ៕ (កែសម្រួលដោយ ៖ បុប្ផា)
ចែករំលែកព័តមាននេះ