រាជធានីភ្នំពេញ ៖ ប្តីខំធ្វើការគ្មានថ្ងៃសម្រាកដើម្បីរកលុយមកផ្គត់ផ្គង់គ្រួសារ ដោយឲ្យប្រពន្ធនៅតែផ្ទះមើលថែកូន តែបែរជាមិននៅផ្ទះគិតតែដើរផឹកស៊ី លុះពេលប្តីមកដល់ផ្ទះមិនឃើញ ក៏សួររក ហើយកូនប្រុសបានប្រាប់ថា «ម៉ាក់កំពុងអង្គុយផឹកស៊ីនៅហាងមួយកន្លែង» ឮបែបនេះធ្វើឲ្យប្តីទប់កំហឹងលែងបានក៏ទៅវាយដល់កន្លែងផឹកស៊ី បង្កការភ្ញាក់ផ្អើលដល់ប្រជាពលរដ្ឋនិងសមត្ថកិច្ចកាលពីវេលាម៉ោង១០និង២០នាទីយប់ថ្ងៃទី១៨ ខែមិថុនា ឆ្នាំ២០១៩ នៅហាងយីហោ ជំនោរលីលី ជិតស្ថានីយបូបទឹកស្អុយបឹងត្របែក តាមបណ្តោយផ្លូវ២៧១ ស្ថិតក្នុងសង្កាត់ផ្សារដើមថ្កូវ ខណ្ឌចំការមន។
ប្តីប្រពន្ធនិងកូនប្រុសខាងលើមិនត្រូវបានស្គាល់អត្តសញ្ញាណឡើយ ។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ គេឃើញស្ត្រីជាប្រពន្ធបានទៅអង្គុយផឹកស៊ីនៅហាងខាងលើ ដោយមានមនុស្ស២នាក់ លុះដល់វេលាកើតហេតុខាងលើ ស្រាប់តែប្តីមកដល់អូសប្រពន្ធចេញមកក្រៅហាង និងវាយបង្កការភ្ញាក់ផ្អើលដល់ប្រជាពលរដ្ឋនិងអ្នកធ្វើដំណើររាយការណ៍ទៅសមត្ថកិច្ចចុះមកជួយអន្តរាគមន៍ភ្លាមៗតែម្តង។
បើតាមប្រភពពីបុរសជាប្តីបានឲ្យដឹងថា គាត់បានចេញពីផ្ទះទៅធ្វើការងារបាត់ ដោយអោយប្រពន្ធនៅផ្ទះមើលថែកូនប្រុសម្នាក់ លុះពេលគាត់ចេញពីធ្វើការមកដល់ផ្ទះវិញ បែរជាមិនឃើញប្រពន្ធ ពេលគាត់សួរ កូនប្រុសប្រាប់ថា «ម៉ាក់ទៅផឹកនៅក្នុងហាងយីហោជំនោរលីលី» គ្រាន់តែឮបែបនេះ ធ្វើឱ្យគាត់ទប់កំហឹងលែងបានក៏តាមរកដល់ហាងផឹកស៊ី និងអូសដៃប្រពន្ធចេញមកក្រៅហើយវាយតែម្តង។
ក្រោយកើតហេតុ សមត្ថកិច្ចបានចុះមកដល់ចំណុចកើតហេតុ និងធ្វើការសម្របស្រួលដោយឱ្យប្តីប្រពន្ធទាំង២នាក់ត្រឡប់ទៅផ្ទះដើម្បីដោះស្រាយគ្នាតាមសន្តិវិធី ៕ (កែសម្រួលដោយ ៖ ធីតា)
ចែករំលែកព័តមាននេះ