តាមប្រភពពី Oddity Central បានឱ្យដឹងថា ក្រុមហ៊ុនមួយក្នុងរដ្ឋ Utah បានប្រកាសរកអ្នកសុខចិត្តមិនប្រើប្រាស់ទូរស័ព្ទស្មាតហ្វូន រយៈពេល១សប្តាហ៍ ហើយងាកទៅប្រើទូរស័ព្ទបត់ធម្មតាវិញ គេនឹងផ្តល់ប្រាក់រង្វាន់១០០០ដុល្លារ ដល់អ្នកឈ្នះ។
ក្រុមហ៊ុនប្រព័ន្ធទាក់ទង Frontier បានប្រារព្ធពិធីគម្រប់ខួប៣០ឆ្នាំ នៃទូរស័ព្ទបត់ដែលចេញលក់ជាលើកដំបូង។ ក្រុមហ៊ុននេះ ប្រកាសថានឹងឱ្យប្រាក់រង្វាន់១០០០ដុល្លារ ដល់អ្នកដែលហ៊ានប្រើទូរស័ព្ទបត់ និង មិនប្រើស្មាតហ្វូន រយៈពេលមួយសប្តាហ៍ ។ អ្នកដែលឈ្នះនឹងត្រូវគេកត់ត្រាទុកពីបទពិសោធន៍មួយចំនួនស្តីពី របៀបផ្ញើអ៊ីម៉ែលពេលគ្មានទូរស័ព្ទ ការវាយអក្សរ រយៈពេលគេង និង ការធ្វើការងារប្រចាំថ្ងៃ។
ក្រៅពីការផ្តល់ជូនលុយ គេក៏ផ្តល់ជូនជារង្វាន់ពិសេសៗមួយចំនួន សម្រាប់ឱ្យយើងគិតឃើញពីស្ថានភាពកាលពីមិនទាន់មានស្មាតហ្វូន។ ក្នុងនោះមានដូចជា ក្រដាសផែនទី (ជំនួស GPS) សៀវភៅកត់ត្រា (ជំនួសកម្មវិធីកត់ត្រា) និង ស៊ីឌីមួយចំនួន (ជំនួស MP3)។
ក្រុមហ៊ុន Frontier Communication បានប្រាប់ថា មានមនុស្សជាង៣០០០០នាក់ មកចុះឈ្មោះចូលរួមការប្រកួតប្រជែង។ ក្រុមហ៊ុនបានបន្ថែមទៀតថា ប្រសិនបើអ្នកមាន youtube អាចបង្ហោះពីបទពិសោធន៍របស់ខ្លួនជាវីឌីអូទៀត គេនឹងផ្តល់ជូនពិន្ទុបន្ថែម៕ (សម្រួលដោយ៖ ស្រីណា)
ចែករំលែកព័តមាននេះ