ខេត្តបន្ទាយមានជ័យ ៖ មិនបានមួយថ្ងៃផង ក្រោយពីសារព័ត៌មាននិងគេហទំព័រកោះសន្តិភាព បានចេញ ផ្សាយពីជីវិតពិតរបស់គ្រួសារមួយ ដែលរស់អាស្រ័យការជួយពីអ្នកជិតខាង ហើយខ្ទមរស់នៅដំបូលប្រក់មេឃនិងគ្មានជញ្ជាំងនោះ នៅព្រឹកថ្ងៃទី១៥ មិថុនា នេះ អាជ្ញាធរខេត្តស្រុក-ឃុំ អមដោយមន្ត្រី និងកងកម្លាំងជាច្រើននាក់ ដឹកនាំដោយលោកអ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ តំណាងដ៏ខ្ពង់ខ្ពស់លោកឧបនាយករដ្ឋមន្ត្រីកែ គឹមយ៉ាន ប្រធានក្រុមការងារថ្នាក់ជាតិ ចុះជួយខេត្តបន្ទាយមានជ័យបានចុះសួរសុខទុក្ខ និងពាំនាំអំណោយជាច្រើន និងសាងសង់ផ្ទះថ្ម១ខ្នងជូនគ្រួសារមួយនេះផងដែរ ។
អំណោយដែលគ្រួសារខាងលើ ទទួលបានជាគ្រឿងឧបភោគ បរិភោគ រួមមានអង្ករ2ការ៉ុង, មុង១, ភួយ១, ចានឆ្នាំង, កន្ទេល, ទឹកត្រី2យួរ, ទឹកស៊ីអុីវ១យួរ, ទឹកសុទ្ធ៤យួរ និងថវិកា១លាន៥សែនរៀល ។ ក្រៅពីអំណោយខាងលើ គ្រួសារមួយនេះ នឹងទទួលបានផ្ទះថ្មីសន្លាង១ខ្នង មានទទឹង4ម៉ែត្រ×6ម៉ែត្រ ធ្វើពីឈើប្រក់សង្កសី ។
លោកអ៊ុំ រាត្រី អភិបាលនៃគណៈអភិបាលខេត្តបន្ទាយមានជ័យ ប្រាប់តាមទូរស័ព្ទថា ពេលនេះ លោកកំពុងដឹកនាំមន្ត្រីនិងសមត្ថកិច្ចចម្រុះក្នុងខេត្តនិងស្រុកថ្មពួក រួមមាននគរបាល, នគរបាលកាពារព្រំដែន និងយោ ធារួមគ្នាសាងសង់ផ្ទះថ្មី ជូនគ្រួសារ២នាក់ឪពុកកូនខាងលើ ។
លោកអភិបាលបន្តថា ក្រៅពីផ្ទះនិងអំណោយដែលទទួលបាន នាពេលនេះលោកនឹងគៀងគររកសប្បុរស ជនជួយបន្តទៀត ហើយសន្យាថានិងជួយគ្រួសារនេះអង្ករ១ការ៉ុងរៀងរាល់2ខែម្តង ។ លោកអភិបាលបញ្ជាក់ថា ក្រៅពីគ្រួសារនេះ នៅព្រឹកថ្ងៃដដែលក្រុមការងារ បានរួមគ្នាជួយដល់គ្រួសារមួយទៀតរស់នៅក្នុងភូមិកើតហេតុដែលបុរសជាប្តីពិការមានជម្ងឺចំនួន2លានរៀលនិងឲ្យរថយន្តសង្គ្រោះដឹកបញ្ជូនទៅមន្ទីរពេទ្យខេត្តដើម្បីព្យាបាលដំបៅជើងរហូតជាសះស្បើយទើបឲ្យវិលត្រឡប់ដោយមិនគិតប្រាក់ផងដែរ។
គួររំលឹកថា គ្រួសារទទួលបានអំណោយនិងផ្ទះថ្មីសន្លាងខាងលើ បុរសជាឱពុកឈ្មោះជុំ មឿន អាយុ៦៧ឆ្នាំកូនស្រីអាយុ៤ឆ្នាំ រស់នៅក្នុងភូមិប្រាសាទត្បែង ឃុំបន្ទាយឆ្មារ ស្រុកថ្មពួក ។ គ្រួសារនេះ រស់នៅតែ២នាក់ឱពុកកូន ក្រោយប្រពន្ធបានស្លាប់ ដោយជំងឺកាលពីជាង៣ឆ្នាំមុន ។ (សម្រួលដោយ៖ ស្រីណា)
ចែករំលែកព័តមាននេះ