រាជធានីភ្នំពេញ ៖ ប្រមុខរាជរដ្ឋាភិបាលកម្ពុជាសម្តេចតេជោ ហ៊ុន សែន បានប្រកាសស្វាគមន៍ចំពោះអនុសាសន៍របស់អ្នកវិនិយោគទន់ទាំងអស់ ដែលមានគំនិតធ្វើវិនិយោគនៅកម្ពុជាមិនត្រឹមតែត្រូវការហិរញ្ញប្បទាន ឬជំនួយនោះទេ ។ ការប្រកាសរបស់ប្រមុខរាជរដ្ឋាភិបាលកម្ពុជាធ្វើឡើងក្នុងជំនួបពិភាក្សាការងារជាមួយប្រធានក្រុមប្រឹក្សាផ្លាស់ប្តូរមិត្តភាពអន្តរជាតិជប៉ុន (FEC) នៅរសៀលថ្ងៃទី២៩ ខែឧសភា ឆ្នាំ២០១៩ ។
សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាបានអនុញ្ញាតឱ្យលោក កេន ម៉ាតស៊ុហ្សាវ៉ា (Ken Matsuzawa) ប្រធានក្រុមប្រឹក្សាផ្លាស់ប្តូរមិត្តភាពអន្តរជាតិជប៉ុន (FEC) និងថ្នាក់ដឹកនាំក្រុមហ៊ុនរបស់ជប៉ុន៦រូបផ្សេងទៀតចូលជួបសម្តែងការគួរសម និងពិភាក្សាលើការងារវិនិយោគនៅក្នុងប្រទេសកម្ពុជា ។ ជាកិច្ចចាប់ផ្តើមនៃជំនួបសម្តេចតេជោនាយករដ្ឋមន្ត្រី បានសម្តែងការស្វាគមន៍យ៉ាងកក់ក្តៅ និងបញ្ជាក់ថា សម្តេចពិតជារីករាយដែលជាបានជួបជា ថ្មីម្តងទៀតជាមួយលោក កេន ម៉ាត ស៊ុហ្សាវ៉ា ។ ក្នុងជំនួបនោះសម្តេចតេជោ ហ៊ុន សែន បានបង្ហាញពីការសម្រេចក្នុងការលុបចោលពន្ធកាន់ទុក១ភាគរយ ហើយឱ្យចាប់ផ្តើមអនុវត្តន៍ភ្លាមៗ ដោយមិនទុករហូតដល់ចុងឆ្នាំនោះឡើយ ។
សម្តេចតេជោបានបញ្ជាក់ថា៖« កម្ពុជាមិនមែនត្រូវការត្រឹមតែហិរញ្ញប្បទាន ឬជំនួយនោះទេ ប៉ុន្តែកម្ពុជាក៏ស្វាគមន៍នូវអនុសាសន៍ និងគំនិតផ្សេងៗទៀតពាក់ព័ន្ធលើការវិនិយោគផងដែរ»។ ចំណែកលោក កេន ម៉ាតស៊ុហ្សាវ៉ា បានថ្លែងថា លោកនឹងជួយជំរុញនូវលំហូរអ្នកវិនិយោគពីជប៉ុនទៅកម្ពុជា ហើយក្រុមហ៊ុនរបស់លោកនេះនឹងបន្តជួយដល់ប្រទេសកម្ពុជា និងជួយដល់សម្តេចតេជោផងដែរ ។ សម្តេចតេជោនាយករដ្ឋមន្ត្រីបានថ្លែងអំណរគុណដល់ការបញ្ចេញនូវឆន្ទៈរបស់ប្រធាន FEC និងក្រុមហ៊ុនរបស់លោកចំពោះឆន្ទៈដ៏មុះមុតក្នុងការជួយដល់ប្រទេសកម្ពុជា ។
ជាពិសេសការងារដែលបានជួយដល់ប្រទេសកម្ពុជា នាពេលកន្លងទៅ ។ សម្តេចតេជោក៏បានរំលឹកប្រាប់លោក កេន ម៉ាតស៊ុហ្សាវ៉ា ថាកម្ពុជាបានឆ្លងកាត់ដំណាក់កាលលំបាកជាច្រើនជាពិសេសការអភិវឌ្ឍធនធានមនុស្ស ។ ជាមួយគ្នានោះដែរសម្តេចតេជោក៏លើកឡើងថា កម្ពុជាខ្វះធនធានមនុស្សដោយសារក្នុងរបបខ្មែរក្រហមបានកាប់សម្លាប់ធ្វើឱ្យកម្ពុជាបាត់បង់ធនធានមនុស្សជាច្រើន ។ កម្ពុជាបានស្ថានភាពដ៏លំបាកក្នុងការកសាងប្រទេសឡើងវិញ ។ សម្តេចតេជោបានបញ្ជាក់ថា ៖«ក្រសួងការបរទេសកម្ពុជាដែលចាប់ផ្តើមជាថ្មីនៅក្នុងឆ្នាំ១៩៧៩ ជាមួយធនធានមនុស្សតិចតួចបំផុត ហើយមិនមែនតែក្រសួងការបរទេសនោះទេ ស្ថាប័នរដ្ឋមួយចំនួនក៏ខ្វះធនធានមនុស្សផងដែរ ។ក្នុងន័យនេះ ខ្ញុំស្នើដល់ក្រុមហ៊ុនរបស់លោក កេន ម៉ាតស៊ុហ្សាវ៉ា និងក្រុមហ៊ុនជប៉ុនដទៃទៀត ជួយបណ្តុះបណ្តាលធនធានមនុស្សនៅកម្ពុជា» ។
ក្នុងឱកាសនោះដែរសម្តេចតេជោបានថ្លែងកោតសរសើរក្រុមហ៊ុនជប៉ុន ពេលវិនិយោគនៅកម្ពុជាតែងតែបង្ហាញការបារម្ភពីធនធានមនុស្ស ហើយតែងតែជួយបណ្តុះបណ្តាលធនធានមនុស្សនៅកម្ពុជាផងដែរ ។ ដូចជាក្រុមហ៊ុនមីនីបៀ បានចូលមកវិនិយោគ និងបង្កើតរោងចក្រជាបន្តបន្ទាប់ ហើយក្រុមហ៊ុននេះបានវិនិយោគក្នុងការបណ្តុះ បណ្តាលធនធានមនុស្សរបស់កម្ពុជា ដើម្បីឱ្យមានសមត្ថភាពគ្រប់គ្រាន់ក្នុងការធ្វើកិច្ចការបម្រើក្នុងក្រុមហ៊ុនរបស់ខ្លួន ។ កន្លងទៅក្រុមហ៊ុននេះបានបញ្ជូនពលរដ្ឋកម្ពុជាទៅបណ្តុះបណ្តាលនៅប្រទេសថៃ និងម៉ាឡេ ស៊ីជាដើម ។
មិនតែប៉ុណ្ណោះក្រុមហ៊ុនជប៉ុនតែងតែបង្កើតនូវកម្មវិធីបណ្តុះបណ្តាលនៅក្នុងក្រុមហ៊ុនខ្លួនផងដែរ ។ ជាចុងក្រោយលោក កេន ម៉ាតស៊ុហ្សាវ៉ា បានឆ្លើយតបថា ទាំងរូបលោក និងថ្នាក់ដឹកនាំក្រុមហ៊ុន៦រូបផ្សេងទៀត គឺពិតជាយល់អំពីអ្វីដែលសម្តេចបានលើកឡើង ហើយនឹងប្រឹងជំរុញលើការងារបណ្តុះបណ្តាលធនធានមនុស្សនេះ ៕កែសម្រួលដោយ ៖ សុឃាក់
ចែករំលែកព័តមាននេះ