រាជធានីភ្នំពេញ ៖ ដើម្បីជំរុញនូវទំនាក់ទំនងពាណិជ្ជកម្មរវាងប្រទេសជិតខាង កម្ពុជាបានបន្តបើកច្រកព្រំដែនថ្មីៗជាបន្តបន្ទាប់ ក្នុងគោលបំណងជំរុញការដឹកជញ្ជូនទំនិញចេញចូល អោយបានឆាប់រហ័ស ជាក់ស្ដែងកាលពីចុងសប្ដាហ៍មុននេះ រដ្ឋាភិបាលកម្ពុជាបានចុះហត្ថលេខាជាមួយក្រុមហ៊ុនសាងសង់មួយ ដើម្បីសាងសង់ ច្រកទ្វារអន្តរជាតិថ្មីនៅស្ទឹងបត់ ក្នុងក្រុងប៉ោយប៉ែត ខេត្តបន្ទាយមានជ័យ ។ អ្នកដឹកជញ្ជូនទំនិញកម្ពុជា មានក្ដីរំពឹងថា ពួកគេនឹងអាចពន្លឿនការដឹកជញ្ជូន ទំនិញឆ្លងកាត់ព្រំដែនកាន់តែលឿន ដែលធ្វើអោយការនាំចេញនាំចូលកាន់តែមានសកម្មភាពខ្លាំងជាងមុន ។
លោក ស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនបានមានប្រសាសន៍ថា ច្រកទ្វារព្រំដែនអន្តរជាតិនេះ នឹងបម្រើតែសេវាដឹកជញ្ជូនប៉ុណ្ណោះ ដោយរក្សាទុកច្រកអន្តរជាតិប៉ោយប៉ែតសម្រាប់បម្រើតែសេវាដឹកជញ្ជូនភ្ញៀវទេសចរ ដើម្បីកាត់បន្ថយការកកស្ទះចរាចរណ៍ ក៏ដូចជាផ្ដល់ភាពងាយស្រួលដល់សមត្ថកិច្ចក្នុងការត្រួតពិនិត្យទំនិញដឹក ជញ្ជូនឆ្លងកាត់ព្រំដែនឱ្យមានប្រសិទ្ធភាព តម្លាភាព និងចំណេញពេលវេលា ។ ការសម្រេចទុកច្រកទ្វារព្រំដែនអន្តរជាតិកម្ពុជា-ថៃ (ច្រកទ្វារអន្តរជាតិស្ទឹងបត់) ថ្មីនឹងបម្រើសេវាដឹកជញ្ជូនទំនិញតែប៉ុណ្ណោះ ទទួលបានការសាទរពីអ្នកដឹកជញ្ជួន ក៏ប៉ុន្តែពួកគាត់បានលើកឡើងថា ទំនិញអាចនឹងត្រូវបញ្ជូនបានលឿន ពេលមានច្រកទ្វារអន្តរជាតិកាន់តែ ច្រើន ជាមួយបណ្តាប្រទេសជិតខាង ។
លោក ស៊ិន ចន្ធី សមាគមភ្នាក់ងារបញ្ជូនទំនិញកម្ពុជា បានមានប្រសាសន៍ថា ជាការពិតណាស់ ច្រកទ្វារកាន់តែច្រើនយើងមានជម្រើសក្នុងការបញ្ជូនទំនិញចេញក្រៅកាន់តែច្រើន ហើយនឹងពន្លឿនការនាំចេញទំនិញរបស់កម្ពុជា ទៅក្រៅប្រទេសកាន់តែច្រើនផងដែរ ។ លោក ស៊ិន ចន្ធី បាននិយាយថា «បើកច្រកកាន់តែច្រើនកាន់តែប្រសើរ ហើយមិនមែនជួយតែអ្នកជញ្ជូនប៉ុណ្ណោះទេ តែវានឹងជួយដល់កសិករនៅជិតមាត់ច្រកនោះ ក្នុងការបញ្ជូនទំនិញរបស់ខ្លួនទៅពាណិជ្ជករប្រទេសជិតខាងដូចជាពាណិជ្ជករថៃ វៀតណាមជាដើម ។ម្យ៉ាងទៀតនៅពេលដែលមានផ្លូវកាត់ កាន់តែជិត ការដឹកជញ្ជូនកាន់តែអស់តិច វាក៏អាចធ្វើអោយតម្លៃកសិផលនិងទំនិញរបស់កម្ពុជា ខ្ពស់ជាងមុនបន្តិចដែរ » ។ លោកបន្តថា ការបើកច្រកកាន់តែច្រើនក៏អាចជំរុញ កំណើនពាណិជ្ជកម្មរវាងប្រទេសកម្ពុជា និងប្រទេសជិតខាងផងដែរ ជាក់ស្ដែងកាលពីច្រកព្រំដែនព្រុំ នៅខេត្តប៉ៃលិនមិនទាន់ ហើយចង់ដឹកទំនិញពីកម្ពុជាទៅថៃ គេត្រូវដឹកទៅប៉ោយប៉ែតបន្ទាយមានជ័យ ហើយអ្នកដឹកជញ្ជូនត្រូវការចំណាយថ្លៃហើយដឹកបានតិចទៀតផងក្នុងមួយខែៗ តែនៅពេលដែលច្រកព្រំដែនព្រុំបានបើក ធ្វើអោយការដឹកជញ្ជូនទៅចេញពីកម្ពុជាបានលឿនរហ័សនិងចំណាយតិចជាងមុន ។
លោកបានបន្ថែមថា នៅពេលដែលកម្ពុជា មានផ្លូវកាន់តែច្រើន មានច្រកក៏កាន់តែច្រើន ក៏ធ្វើអោយអាជីវកម្មដឹកជញ្ជូនក៏កាន់តែរីកដុះដាលដែរ ជាក់ស្ដែងកាលពី៥ឆ្នាំមុន អាជីវកម្មដឹកជញ្ជូននៅកម្ពុជាមានតែប្រមាន២០០ទៅ៣០០ក្រុមហ៊ុនប៉ុណ្ណោះ តែរហូតមកដល់បច្ចុប្បន្ននេះក្រុមហ៊ុនដឹកជញ្ជូននៅកម្ពុជាបានកើនឡើងដល់ជាង៥០០ក្រុមហ៊ុន ពោលគឺកើនឡើងជាងពាក់កណ្ដាល ។
បើតាមមន្ត្រីស្ថានទូតថៃប្រចាំកម្ពុជា បានមានប្រសាសន៍កន្លងមកថា ដើម្បីជំរុញ ទំហំពាណិជ្ជកម្មរវាងកម្ពុជា និងថៃអោយបានដល់គោលដៅដែលបានកំណត់ ភាគីទាំងពីរ នឹងសហការបន្តបើកច្រកថ្មីៗបន្ថែមទៀតដើម្បីបញ្ជូនទំនិញរវាងប្រទេសទាំងពីរអោយបានកាន់ច្រើន ។ គួររំលឹកផងដែរថា កាលពីថ្ងៃទី២២ ខែមេសា ឆ្នាំ២០១៩ កន្លងទៅនេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងលោក ប្រាយុទ្ធ ចាន់អូចា នាយករដ្ឋមន្ត្រី នៃព្រះរាជាណាចក្រថៃ បានអញ្ជើញជាអធិបតីក្នុងកម្មវិធីបីផ្សេងគ្នានៅលើទឹកដីក្រុងប៉ោយប៉ែត ខេត្ត បន្ទាយមានជ័យ ដែលកម្មវិធីទាំងបីនោះរួមមាន៖ ១) ការចាក់បេតុងតភ្ជាប់មុខតំណស្ពានមិត្តភាពកម្ពុជា-ថៃ (ស្ពានស្ទឹងបត់) ២)ការបើកការដ្ឋានសាងសង់អគាររដ្ឋបាលច្រកទ្វារព្រំដែនអន្តរជាតិស្ទឹងបត់ និងផ្លូវ តភ្ជាប់ទៅផ្លូវជាតិលេខ ៥ និង ៣) ពិធីចុះហត្ថលេខាលើកិច្ចព្រមព្រៀងប្រតិបត្តិការរួមគ្នាលើការដឹកជញ្ជូន ឆ្លងកាត់ព្រំដែន និងពិធីប្រគល់-ទទួលក្បាលរដ្ឋភ្លើងDMU ។
សូមរម្លឹកថាលោក ស៊ុន ចាន់ថុល បានចុះហត្ថលេខាលើកិច្ចសន្យាគម្រោងសាងសង់ច្រកទ្វារអន្តរជាតិស្ទឹងបត់ និងផ្លូវតភ្ជាប់ទៅផ្លូវជាតិលេខ៥ ជាមួយក្រុមហ៊ុនសាងសង់ FIN TECHNIC កាលពីថ្ងៃទី ២៤ ខែឧសភា ដែលពិធីនេះមានការចូលរួមពីថ្នាក់ដឹកនាំ មន្ត្រីជាន់ខ្ពស់របស់ក្រសួងសាធារណការ និងដឹកជញ្ជូន ឯកឧត្ដម Panyarak Poolthup អគ្គរាជទូតថៃប្រចាំកម្ពុជា ឯកឧត្ដម Perames Vudthitornetiraks នាយកភ្នាក់ងារអភិវឌ្ឍន៍សេដ្ឋកិច្ចប្រទេសជិតខាង ឯកឧត្ដមតំណាងក្រសួងសេដ្ឋកិច្ច និងហិរញ្ញវត្ថុ និងនាយក ក្រុមហ៊ុន FIN TECHNIC និងភាគីពាក់ព័ន្ធផងដែរ។ គម្រោងនេះផ្ដោតលើការសាងសង់ហេដ្ឋារចនាសម្ព័ន្ធច្រកទ្វារព្រំដែន ដែលរួមមាន៖ អគាររដ្ឋបាលច្រកចូលទ្វារព្រំដែន និងផ្លូវ សំណង់អគារអន្តេវាសិកដ្ឋាន ចំណតសម្រាប់ផ្ទេរទំនិញឆ្លងកាត់ សំណង់កាត់ បន្ថយគ្រោះទឹកជំនន់ និងការជួសជុលកែលម្អផ្លូវចាស់។ គម្រោងនេះគ្រោងចំណាយថវិកាប្រមាណ ៩២៨ ១១០ ៦៨១ បាត (ប្រមាណជាង 29,176,087 ដុល្លារអាមេរិក) ក្រោមហិរញ្ញប្បទានសម្បទានពីរាជរដ្ឋាភិបាលថៃ និងប្រើរយៈពេល២៤ខែ ៕ កែសម្រួលដោយ ៖ សុឃាក់
ចែករំលែកព័តមាននេះ