រាជធានីភ្នំពេញ ៖ មន្ត្រីជាន់ខ្ពស់ក្រសួងទេសចរណ៍បានថ្លែងឲ្យដឹងថា នៅឆ្នាំ២០១៩នេះ កម្ពុជានឹងធ្វើជា ម្ចាស់ផ្ទះរៀបចំពិពរណ៌ទេសចរណ៍កម្ពុជាអន្តរជាតិលើកទី៣ ( CTM 2019 ) ។ តាមគម្រោង CTM លើកទី៣នេះ នឹងត្រូវរៀបចំធ្វើឡើងនៅថ្ងៃទី១១-១៣ តុលា ឆ្នាំនេះ ។ នេះបើយោងតាមការឲ្យដឹងរបស់លោក សូ វិសុទ្ធី អនុរដ្ឋលេខាធិការក្រសួងទេសចរណ៍ដែលថ្លែងក្នុងសន្និសិទសារព័ត៌មានស្តីពីពិពរណ៌ ទេសចរណ៍កម្ពុជាអន្តរជាតិលើកទី៣ ឆ្នាំ២០១៩ ដែលរៀបចំធ្វើកាលពីថ្ងៃទី១៣ ឧសភា ឆ្នាំ២០១៩ នៅទីស្តីការក្រសួងទេសចរណ៍ ។
លោក សូ វិសុទ្ធី បានបញ្ជាក់ថា ពិព័រណ៍ទេសចរណ៍កម្ពុជាអន្តរជាតិ ឬហៅកាត់ថា CTM (Cambodia Travel Mart) គឺជាព្រឹត្តិការណ៍ជួបជុំគ្នាដ៏សំខាន់បំផុតរវាងអ្នកលក់ (Buyer) និងអ្នកទិញកញ្ចប់ទស្សនកិច្ចទេសចរណ៍ (Saler) ពិសេសគឺការលក់កញ្ចប់ទស្សនកិច្ចនៅកម្ពុជាទៅឱ្យក្រុមហ៊ុន ឬទីភ្នាក់ងារទេសចរណ៍នៅក្រៅប្រទេស ដែលក្រុមហ៊ុនលក់កញ្ចប់ទស្សនកិច្ចទាំងឡាយនៅកម្ពុជាគួរតែក្តាប់នូវឱកាសនេះឱ្យបាន។
លោកបន្តថានេះ ជាចំណុចពិសេសដែលមជ្ឈដ្ឋាននានា កំពុងមានការចាប់អារម្មណ៍ ពិសេសគឺភាគីពាក់ព័ន្ធក្នុងវិស័យទេសចរណ៍ បន្ទាប់ពីព្រឹត្តិការណ៍ទេសចរណ៍ដ៏ធំនេះ ត្រូវបានរៀបចំឡើងជោគជ័យចំនួន២លើកមកហើយ ក្រោមការសហការរវាងវិស័យរដ្ឋ និងឯកជន ពោលគឺវាបានរៀបចំបង្កើតឡើងដោយស្នាដៃប្រជាជាតិខ្មែរខ្លួនឯងផ្ទាល់តែម្ដង។
លោកអនុរដ្ឋលេខាធិការ បានឱ្យដឹងទៀតថា តាមការគ្រោងទុក ព្រឹត្តិការណ៍ CTM 2019 នេះ នឹងមានការចូលរួមពីពីក្រុមហ៊ុន ឬទីភ្នាក់ងារទេសចរណ៍ ឬហៅថាជា អ្នកទិញ (Buyer) ជាច្រើនមកពីប្រមាណ៦០ប្រទេសជុំវិញពិភពលោក ។ ចំណែកក្រុមអ្នកលក់កញ្ចប់ទស្សនកិច្ចទេសចរណ៍ ឬហៅថា Saler នោះ គឺភាគច្រើនជាក្រុមហ៊ុននៅក្នុងប្រទេស និងខ្លះទៀតមកពីប្រទេសនានាក្នុងតំបន់អាស៊ាន។
ចែករំលែកព័តមាននេះ