តារាប្រុសពុទ្ធិស័កក្តាប់ទាំងចម្រៀង និងសម្តែង

ថ្ងៃទី ២២ ខែ ឧសភា ឆ្នាំ ២០១៩
ម៉ោង ១៧:១៨
ខាត់ សាមឿន

គឺជារឿងមួយបានទាំងព្រមតែម្តង ដែលតារាសម្តែង ពឹង ចាន់បូណ៌មី ហៅពុទ្ធិស័ក មានអំណោយផលពីធម្មជាតិច្រើន ដោយលោកអាចឈរលើវិថីសិល្បៈឈោងចាប់យកភាពលេចធ្លោដោយសារចេះទាំងច្រៀង និងសម្តែងក្នុងពេលរូបសម្បត្តិក៏អំណោយផល។

បន្ទាប់ពីជោគជ័យក្នុងអាជីពសម្តែង ពុទ្ធិស័ក បានផ្អាកអាជីពចម្រៀងចោល ដើម្បីស្រវាការងារសម្តែងជំនួសវិញ ពុទ្ធិស័ក្ត បាននិយាយថា ទោះបីជាពេលនេះ លោករវល់ការងារថតកុន តែលោកក៏មិនភ្លេចអាជីពចម្រៀងដែរ លោកនឹងបន្តថតបទចម្រៀងឡើងវិញ នៅពេលដែលលោកទំនេរពីការងារសម្តែង ។

ក្រៅពីការងារសិល្បៈបុរសសង្ហារវ័យក្មេងពុទ្ធិស័ក ក៏ជានិស្សិតកំពុងបន្តការសិក្សានៅមហាវិទ្យាល័យឆ្នាំទី៣ ផងដែរ ។ តារាប្រុសមុខស្រស់ញញឹមទាក់ទាញរូបនេះ កំពុងតែស្រវាការងារក្នុងសិល្បៈឱ្យកាន់តែរីកចម្រើនក្នុងពេលដែលលោកកាន់តែមានឈ្មោះបោះសំឡេងច្រើនឡើងៗក្នុងសង្គមសិល្បៈ។

អ្នកដែលទើបតែស្គាល់បូណ៌មី គេថា សមជាតារាសម្តែង ព្រោះមានរាងខ្ពស់ រូបក៏ល្អ តុបតែងតួអ្វីក៏បាន។ប៉ុន្តែ ពុទ្ធិស័ក គឺចេះទាំងច្រៀងដោយសម្ងំធ្វើជាតារាចម្រៀងតាមហាងផឹកស៊ី មុនពេលក្លាយជាតារាសម្តែង។

លោកនៅតែប្រកាសថា ចាប់យកទាំងចម្រៀង និងសម្តែង ដើម្បីពង្រីកស្នាដៃ។ ផលិតករច្រើនហៅលោកថត ទើបចេះតែមានគេច្រឡំថា ជាតារាសម្តែង តែការណ៍ពិតលោកច្រៀងយូរហើយទើបគិតថា បើមានឱកាសឡើងច្រៀងតាមប៉ុស្តិ៍លោកនឹងព្យាយាមឱ្យល្អដូចជាពង្រឹងសំឡេង និងក្បាច់រាំ។

តារារូបនេះកាលពីយប់មិញបានធ្វើពិធីខួបកំណើតវ័យ២៣ឆ្នាំ ដោយចូលរួមសុទ្ធតែតារាល្បីៗជូនពរជ័យពេញហាង រហូតថែមម៉ោងធ្វើឲ្យសាមីខ្លួនកាន់តែមានការពេញចិត្តចំពោះទឹកចិត្តអ្នករាប់អាន៕ (កែសម្រួលដោយ ៖ បុប្ផា)