រាជធានីភ្នំពេញ ៖ ដើម្បីទាក់ទាញភ្ញៀវទេសចរចិនឲ្យមកទស្សនាកម្ពុជាកាន់តែច្រើននៅឆ្នាំ ២០១៩ កម្ពុជាក៏ត្រូវការឲ្យមានការវិនិយោគលើការបង្កើតផលិតផលទេសចរណ៍ថ្មីៗជាច្រើនប្រកបដោយការច្នៃប្រឌិត និងនវានុវត្តន៍។ ជាងនេះទៅទៀតកម្ពុជាមានមហិច្ឆតាខ្ពស់ក្នុងការទាញស្រូបទេសចរជនជាតិចិនឲ្យបានប្រមាណ ៣ លាននាក់ ហើយនឹងកើនឡើងដល់…
រាជធានីភ្នំពេញ ៖ ដើម្បីទាក់ទាញភ្ញៀវទេសចរចិនឲ្យមកទស្សនាកម្ពុជាកាន់តែច្រើននៅឆ្នាំ ២០១៩ កម្ពុជាក៏ត្រូវការឲ្យមានការវិនិយោគលើការបង្កើតផលិតផលទេសចរណ៍ថ្មីៗជាច្រើនប្រកបដោយការច្នៃប្រឌិត និងនវានុវត្តន៍។ ជាងនេះទៅទៀតកម្ពុជាមានមហិច្ឆតាខ្ពស់ក្នុងការទាញស្រូបទេសចរជនជាតិចិនឲ្យបានប្រមាណ ៣ លាននាក់ ហើយនឹងកើនឡើងដល់ ៥ លាននាក់នៅ ឆ្នាំ ២០២៥ និង ៨ លាននាក់នៅឆ្នាំ ២០៣០។
ហេតុដូច្នេះ ចិនបានសន្យាថានឹងពង្រឹងការបណ្ដុះបណ្ដាលធនធានមនុស្សដល់កម្បុជា តាមរយៈការបង្រៀនភាសាចិនដល់មគ្គុទ្ទេសក៍ទេសចណ៍ និងប្រតិបត្តិករនានា ដោយបានឯកភាពរៀបចំវគ្គបណ្ដុះបណ្ដាលលើកទី១ ឆ្នាំនេះ នៅចុងខែឧសភា ខាងមុខ។
ដើម្បីសម្រេចបានមហិច្ឆតាមួយនេះថ្នាក់ ដឹកនាំក្រសួងទេសចរហាក់ជម្រុញខ្លាំងទៅលើការពង្រឹងសមត្ថភាពធនធានរបស់កម្ពុជា ដោយផ្តោតទៅលើការពង្រឹងភាសាចិនតែម្តង ។ ជាក់ស្តែងនៅអំឡុងពេលនៃការចូលរួមព្រឹត្តិការណ៍នានានៃសន្និសីទស្ដីពីការសន្ទនាអំពីអរិយធម៌អាស៊ី នៅប្រទេសចិន លោក ថោង ខុន រដ្ឋមន្ត្រីក្រសួងទេសចរណ៍កម្ពុជាបានជួបពិភាក្សាការងារជាមួយ លោក Chen Dehai អគ្គលេខាធិការមជ្ឈមណ្ឌលអាស៊ាន-ចិន កាលពីរសៀលថ្ងៃទី ១៧ ខែឧសភា ឆ្នាំ២០១៩។ នៅក្នុងជំនួបនោះ អគ្គលេខាធិការមជ្ឈមណ្ឌលអាស៊ាន-ចិន បានអបអរសាទរចំពោះកំណើនសេដ្ឋកិច្ចនៅកម្ពុជា ជាពិសេសការកើនឡើងនៃការវិនិយោគ និងចំនួនទេសចរអន្តរជាតិដ៏ច្រើននាឆ្នាំកន្លងមក ព្រមទាំងបានវាយតម្លៃខ្ពស់ចំពោះកិច្ចសហប្រត្តិរវាងចិន និងកម្ពុជា ដែលបានពង្រឹងនិងពង្រីកថែមមួយកម្រិតទៀត។
ជាមួយគ្នានោះផងដែរ លោក ថោង ខុន បានថ្លែងអំណរគុណដល់មិត្តចិន ជាពិសេសតាមរយៈមជ្ឈមណ្ឌលអាស៊ាន-ចិន ដែលបានសហការជាមួយក្រសួងទេសចរណ៍កម្ពុជា ក្នុងការផ្សព្វផ្សាយ និងទាក់ទាញទេសចរចិនកន្លងមក។ ជាងនេះទៅទៀតលោកថោង ខុន ក៏បានស្នើដល់អគ្គលេខាធិការ ជួយគាំទ្រកម្ពុជាបន្ថែមទៀតក្រោមខ្លឹមសារនៃសហគមន៍វាសនារួម កម្ពុជា-ចិន ដែលជាស្មារតីនៃកិច្ចសហប្រតិបត្តិការស៊ីជម្រៅថែមមួយកម្រិតទៀត រវាងចិន និងកម្ពុជា ក៏ដូចជាចាប់យកកាលានុវត្តភាពនានា នៃការអភិវឌ្ឍរបស់ចិន ដូចជាគំនិតផ្ដួចផ្ដើមខ្សែក្រវ៉ាត់ និងវិថី និងស្មារតីរួមនៃការអភិវឌ្ឍទេសចរណ៍វប្បធម៌អាស៊ី ដែលសន្និសីទស្ដីពីការសន្ទនាអរិយធម៌អាស៊ីបានផ្ដួចផ្ដើមឡើង។
ដោយឡែក ឆ្លើយតបនឹងសំណើកម្ពុជា ចំពោះមុខមជ្ឈមណ្ឌលអាស៊ាន-ចិន នឹងជួយកម្ពុជាលើ៖ ១)- បន្តជួយផ្សព្វផ្សាយទេសចរណ៍កម្ពុជា ក្នុងបណ្ដាញសារព័ត៌មាន តាមក្រុមហ៊ុនឯកជន ជាពិសេសក្នុងព្រឹត្តិការណ៍នានារបស់មជ្ឍមណ្ឌលអាស៊ាន ចិន ។ ២)- ផលិតឯកសារផ្សព្វផ្សាយទេសចរណ៍ រៀបចំឲ្យមានដំណើរទស្សនកិច្ចស្វែងយល់របស់អ្នកសារព័ត៌មាន ប្រតិបត្តិករចិន នៅកម្ពុជា ដើម្បីចងក្រងការផ្សព្វផ្សាយ និងរៀបចំកញ្ចប់ទស្សនកិច្ចមកកម្ពុជា។ ៣)- ពង្រឹងការបណ្ដុះបណ្ដាលធនធានមនុស្សរួមមាន ការបង្រៀនភាសាចិនដល់មគ្គុទ្ទេសក៍ទេសចណ៍ និងប្រតិបត្តិករនានា ដោយបានឯកភាពរៀបចំវគ្គបណ្ដុះបណ្ដាលលើកទី១ ឆ្នាំនេះ នៅចុងខែឧសភា ខាងមុខ។ ៤)- ជួយបណ្ដុះបណ្ដាលជំនាញទេសចរណ៍ដល់យុវជន និងជំរុញឲ្យមានការចុះកម្មសិក្សានៅប្រទេសចិន។ ៥)- គាំទ្រការអនុវត្តបន្ថែមទៀត លើសៀវភៅស ស្ដីពី China Ready និងធ្វើឲ្យឯកសារជាយុទ្ធសាស្ត្រនេះអាចឆ្លើយតបនឹងបរិបទនៃកិច្ចសហប្រតិបត្តិការថ្មីៗ។ ៦)- ជួយផ្សព្វផ្សាយដល់អ្នកវិនិយោគចិនឲ្យមកវិនិយោគក្នុងវិស័យទេសចរណ៍កម្ពុជាបន្ថែមទៀត។
ទន្ទឹមនឹងនេះ ដើម្បីចូលរួមជំរុញយុទ្ធនាការផ្សព្វផ្សាយ «កម្ពុជា៖ ព្រះរាជាណាចក្រអច្ឆរិយៈ ផ្ដល់ភាពកក់ក្ដៅ» និងដើម្បីត្រៀមទទួលភ្ញៀវទេសចរចិន ដែលកំពុងមានការកើនឡើងរៀងរាល់ឆ្នាំ ក្រសួងទេសចរណ៍កំពុងរៀបចំការប្រឡងជ្រើសរើសអ្នកនិយាយភាសាចិនឆ្នើម ផ្នែកសណ្ឋាគារ ប្រចាំឆ្នាំ២០១៩ ដែលបាននឹងកំពុងប្រព្រឹត្តទៅចាប់ពីខែមេសា-ខែឧសភា ដែលវគ្គជម្រុះនឹងត្រូវធ្វើឡើងនៅថ្ងៃទី៣១ ខែឧសភា ឆ្នាំ២០១៩ ខាងមុខនេះ ។
សូមបញ្ជាក់ផងដែរថា ជាមួយនឹងកំណើនវិនិយោគិនចិនមកកម្ពុជា ក៏ដូចជាទេសចរចិនមកទស្សនាកម្ពុជាមានការកើនឡើងជាបន្តបន្ទាប់និងឈរលំដាប់កំពូលសម្រាប់ទេសចរបរទេសមកទស្សនាកំសាន្តនៅកម្ពុជានោះ គឺសង្កេតឃើញថានៅរាជធានីភ្នំពេញ និងខេត្ត-ក្រុងមួយចំនួន ដូចជាខេត្តព្រះសីហនុ ក្រុងប៉ោយប៉ែតនៃទឹកដីខេត្តបន្ទាយមានជ័យ និងទីក្រុងប៉ាវិត ខេត្តស្វាយរៀងជាដើម មានការរីកដុះដាលនៅហាងចិនដូចផ្សិត ។ ជាក់ស្តែងសម្រាប់រយៈពេល ៤ ខែដើមឆ្នាំ ២០១៩ នេះគឺ ភ្ញៀវទេសចរចិននៅតែឈរលំដាប់លេខរៀងទី១នៅស្រុកខ្មែរ នាំមុខជនជាតិដទៃទៀតនៅក្នុងពិភពលោក ។ នេះបើយោងតាមរបាយការណ៍ពីក្រសួងទេសចរណ៍។ ប្រភពដដែលបានឲ្យដឹងថា ទេសចរជនជាតិចិនមកលេងប្រទេសកម្ពុជា មានចំនួនជិត៧សែននាក់គិតពីខែមករា ដល់ខែមេសា ពោលគឺមានការកើនឡើងប្រមាណជាង៣៥% ។
យ៉ាងណាមិញមានសំណួរមួយកំពុងត្រូវបានគេចោទសួរយ៉ាងគគ្រុក ថាតើភាសាចិននឹងត្រូវបានប្រើប្រាស់ជំនួសភាសាអង់គ្លេសជាសកលដែរឬទេ ខណៈនៅកម្ពុជាជាក់ស្តែងចំនួនអ្នកវិនិយោគិនចិនទាំងមុខរបរតូចធំ ក៏ដូចជាទេសចរចិនក៏មានចំនួនស្ទុះឡើងយ៉ាងគំហុកបែបនេះ ?
ចែករំលែកព័តមាននេះ