ពាណិជ្ជកម្មរវាងកម្ពុជា និងជប៉ុនបានកើនឡើងគួរអោយកត់សម្គាល់ បើទោះបីជាមានចំនួនតិចនៅឡើយ បើប្រៀបធៀបទៅនឹងអាមេរិក និងសហភាពអឺរ៉ុប ។ យោងតាមរបាយការណ៍របស់អង្គការ Jetro របស់ជប៉ុនបានអោយដឹងថា កាលពីឆ្នាំ២០១៨…
ពាណិជ្ជកម្មរវាងកម្ពុជា និងជប៉ុនបានកើនឡើងគួរអោយកត់សម្គាល់ បើទោះបីជាមានចំនួនតិចនៅឡើយ បើប្រៀបធៀបទៅនឹងអាមេរិក និងសហភាពអឺរ៉ុប ។ យោងតាមរបាយការណ៍របស់អង្គការ Jetro របស់ជប៉ុនបានអោយដឹងថា កាលពីឆ្នាំ២០១៨ ជប៉ុនបាននាំចេញមកកាន់ប្រទេសកម្ពុជាតម្លៃជាទឹកប្រាក់ជាង៤២០លានដុល្លារ ខណៈដែលជប៉ុននាំចូលទំនិញពីកម្ពុជាមានតម្លៃជាទឹកប្រាក់ចំនួន១,៦ពាន់លានដុល្លារ ។
ចំណែកប្រភពចេញពីស្ថានទូតជប៉ុនវិញ បានអោយដឹងថា ក្នុងការធ្វើពាណិជ្ជកម្មជាមួយកម្ពុជានោះជប៉ុននាំចូលផលិតផលសម្លៀកបំពាក់ប្រហែលជា៦៧ភាគរយ និងស្បែកជើងប្រហែល១១៨ភាគរយ នៅឆ្នាំ២០១៧ ។ ប្រភពដដែលបានអោយដឹងទៀតថា ជប៉ុននាំចេញច្រើនជាងគេ គឺគ្រឿងម៉ាស៊ីនសម្រាប់សំណង់ និងរថយន្តមកកាន់ប្រទេសកម្ពុជា ។
ខណៈដែលសេដ្ឋកិច្ចប្រទេសកម្ពុជាបន្តមានកំណើនល្អ ក្នុងរង្វង់៧ភាគរយ គេរំពឹងថា ទំនាក់ទំនងពាណិជ្ជកម្មរវាងប្រទេសទាំងពីរ និងរឹតតែកើនឡើងពិសេសក្នុងករណីដែលកម្ពុជាចាត់វិធានការមួយចំនួន ដើម្បីសម្រួលដល់ការធ្វើពាណិជ្ជកម្មរវាងប្រទេសទាំងពីរដូចជា ការកាត់បន្ថយដំណើរការនីតិវីធីពន្ធគយជាដើម ។
ជាមួយគ្នានេះទស្សនកិច្ចរបស់សម្តេចតេជោ ហ៊ុន សែន ទៅកាន់ប្រទេសជប៉ុននៅចុងខែឧសភានេះនឹងក្លាយជាឱកាសមួយទៀត សម្រាប់ការបង្កើនពាណិជ្ជកម្មរវាងប្រទេសទាំងពីរ ហើយនឹងអាចលើកទឹកចិត្តវិនិយោគិនរបស់ជប៉ុនកាន់តែច្រើនមករកស៊ីនៅកម្ពុជា ៕
ចែករំលែកព័តមាននេះ