លោកត្រាំនៅតែរក្សាការគាបសង្កត់ខ្លាំងលើចិន

ថ្ងៃទី ១២ ខែ ឧសភា ឆ្នាំ ២០១៩

ម៉ោង ១៦:៥១

សហរដ្ឋអាមេរិក-ចិន ៖ ចាប់តាំងពីដើមសប្ដាហ៍មុនមក ប្រធានាធិបតីអាមេរិកលោកដូណាល់ត្រាំ នៅតែបន្តការគំរាមកំហែងខ្លាំងចំពោះមហាអំណាចសេដ្ឋកិច្ចអាស៊ីចិន ទោះមានសញ្ញានៃភាពធូរស្រាលខ្លះក្ដី។

ក្រោយការចរចាគ្នា ខាងពាណិជ្ជកម្មនៅក្រុងវ៉ាស៊ិនតោនកាលពីថ្ងៃទី១០ឧសភា លោកត្រាំនៅតែពុំផ្លាស់ប្ដូរចិត្ត។ បន្ទាប់ពីអះអាងថាការចរចា លើបញ្ហាពាណិជ្ជកម្មជាមួយក្រុងប៉េកាំងមានលក្ខណៈស្ថាបនា តែលោកត្រាំនៅបន្តអនុវត្តការគំរាមកំហែង ដែលលោកបានលើកចាប់តាំងពីច្រើនខែមកហើយ។

លោកត្រាំរក្សាការគាបសង្កត់ខ្លាំងបំផុតលើចិន ហើយបានចេញបញ្ជាកាលពីយប់ថ្ងៃទី១០ឧសភា ឲ្យអនុវត្តនីតិវិធីសំដៅយកពន្ធគយ លើស្ទើរតែគ្រប់ផលិតផលចិនទាំងអស់ ដែលនាំចូល។ យោងតាមក្រុងប៉េកាំងថា ទោះជាយ៉ាងនេះក្ដីការចរចាពាណិជ្ជកម្មនឹងបន្តទៀត។

ក្នុងសេចក្ដីប្រកាសមួយតំណាងពាណិជ្ជកម្មអាមេរិក លោកROBERT LIGHTHIZERគូសបញ្ជាក់ថា ប្រធានាធិបតីបានបញ្ជាឲ្យជម្រុញដំណើរការ បង្កើនការយកពន្ធគយ លើផលិតផលចិនស្ទើរទាំងអស់ ដែលនាំចូល មានទឹកប្រាក់ប្រមាណជា៣០០ពាន់លានដុល្លារ។

នីតិវិធីនោះត្រូវជម្រុញនាថ្ងៃទី១៣ឧសភា។ មកទល់ពេលនេះការនាំចូលមកពីចិន ត្រូវរងពន្ធគយធ្ងន់ដោយពន្ធនោះ ចាប់ពីថ្ងៃទី១០ឧសភាទៅត្រូវដំឡើងពី១០%មក២៥% មានទឹកប្រាក់២០០ពាន់លានដុល្លារ។ ចំណែកនីតិវិធីសម្រាប់យកពន្ធដល់ទៅប្រមាណជា៣០០ពាន់លានដុល្លារនៃការនាំចូលផលិតផលចិន ជាកម្មវត្ថុនៃការប្រកាសជាសាធារណៈមួយ៕

អត្រាប្តូរប្រាក់

អត្រាប្តូរប្រាក់ផ្សេងទៀត