ប្រទេសកូរ៉េខាងជើង ៖ ប្រទេសកូរ៉េខាងជើងអះអាងនាថ្ងៃទី៥ ឧសភាថា បានបាញ់សាកកាំជ្រួចហ្វូងរយៈឆ្ងាយនិងបណ្ដាអាវុធតាក់ទិកមានក្បាលបញ្ជា បន្ទាប់ពីបាញ់សាកមីស៊ីលរយៈខ្លី ពុំធ្លាប់មានចាប់តាំងពីជាង១ឆ្នាំមកហើយ។
ទីភ្នាក់ងារព័ត៌មានរដ្ឋកូរ៉េខាងជើងKCNAបញ្ជាក់ថា ការបាញ់សាកកាំំជ្រួចហ្វូងត្រូវបានធ្វើនាថ្ងៃទី៤ឧសភា ហើយសមយុទ្ធបាញ់គ្រាប់ពិតទាំងនោះ ត្រូវបានតាមដានមើលដោយមេដឹកនាំលោកគីមជុងអ៊ុន។ ទិសដៅនៃសមយុទ្ធនេះដើម្បីពិនិត្យមើលសមត្ថភាពប្រតិបត្តិការ និងការបាញ់ចំគោលដៅរបស់គ្រាប់រ៉ុក្កែតហ្វូងធុនធ្ងន់ហើយអាចបាញ់បានឆ្ងាយ ព្រមទាំងបណ្ដាអាវុធតាក់ទិកមានក្បាលគ្រាប់បញ្ជា។ ការបាញ់គ្រាប់រ៉ុក្កែតហ្វូងនោះក៏ធ្វើសំដៅទៅសមុទ្រជប៉ុនផងដែរ។
សមយុទ្ធបាញ់សាកទាំងនេះកើតមាន ខណៈប្រធានាធិបតីអាមេរិក លោកដូណាល់ត្រាំអះអាងនាថ្ងៃទី៤ឧសភាថា លោកនៅតែមានទំនុកចិត្តលើឆន្ទៈរបស់លោកគីមជុងអ៊ុន ធ្វើយ៉ាងណាឲ្យសម្រេចបានកិច្ចព្រមព្រៀងស្ដីពីនុយក្លេអ៊ែរមួយ ទោះជាមានការបាញ់មីស៊ីលរយៈខ្លីនោះក៏ដោយ។
គេមានការព្រួយបារម្ភថាការសាកល្បងអាវុធទាំងនេះរបស់ក្រុងព្យុងយ៉ាង អាចជាការចាប់ផ្ដើមនៃការវិលត្រឡប់ ទៅរកការគំរាមកំហែងនៃសង្គ្រាមនុយក្លេអ៊ែរ និងនាំទៅរកភាពតានតឹងប្រកបដោយគ្រោះថ្នាក់ ដែលគេត្រូវចៀសវាងតាមគ្រប់មធ្យោបាយ។
ការផ្ដួចផ្ដើមគំនិតបែបនេះរបស់កូរ៉េខាងជើងកើតមាន មុនទស្សនកិច្ចនៅជប៉ុននិងកូរ៉េខាងត្បូង នាសប្ដាហ៍ខាងមុខរបស់តំណាងពិសេសអាមេរិក លោកSTEPHEN BIEGUN៕
ចែករំលែកព័តមាននេះ