រាជធានីភ្នំពេញ ៖ ប្រាក់ដុល្លារអាមេរិកប្រមាណជាង៣,៥លានដុល្លារ ដែលបានរឹបអូសពីជនជាតិចិន៣នាក់នាំចូលមកពីទីក្រុងហុងកុងកាលពីរសៀលថ្ងៃទី២៩ មេសាកន្លងមក ត្រូវបានលោក គុជ គឹមឡុង ព្រះរាជអាជ្ញាធររងសាលាដំបូងរាជធានីភ្នំពេញ សម្រេចបញ្ជូនទៅតម្កល់នៅធនាគារជាតិទុកជាវត្ថុតាង នៅពេលបើកសវនាការលើអង្គសេចក្តី បន្ទាប់ពីតំណាងអយ្យការបានសម្រេចឃុំខ្លួនជនសង្ស័យ ដែលជាម្ចាស់ប្រាក់៣នាក់នោះរួចមក ។
ជាមួយគ្នានោះដែរស្ថាប័នអយ្យការអមសាលាដំបូង ក៏បានតម្រូវឲ្យអនុរក្សពន្ធនាគារ ដោយមានការចូលរួមពីកម្លាំងសមត្ថកិច្ចនគរបាលនាយកដ្ឋានអន្តោប្រវេសន៍ នាំជនសង្ស័យជាជនជាតិចិនទាំង៣នាក់ ដែលមានវាសនាបានជាប់ឃុំនៅក្នុងពន្ធនាគារប៉េហ្ស៊ី ទៅពិនិត្យនិងតាមអង្កេតមើលលុយរបស់ខ្លួនដែលត្រូវអាជ្ញាធររឹបអូស យកទៅរក្សាទុកក្នុងធនាគារជាតិជាបណ្តោះអាសន្ននោះ ។
គួបញ្ជាក់ថា ជនជាតិចិនទាំង៣នាក់ដែលបានចាប់ខ្លួន ១-ឈ្មោះ WANG SHI PING ២-ឈ្មោះ WANG LI CHAO និង៣.ឈ្មោះ ZHANG JIAN ត្រូវបានកម្លាំងសមត្ថកិច្ចនគរបាលអន្តោប្រវេសន៍សហការឃាត់ខ្លួន កាលពីថ្ងៃទី២៣ មេសា នៅព្រលានយន្តហោះអន្តរជាតិភ្នំពេញ ខណៈជនជាតិចិនទាំង៣នាក់នេះបាននាំយកប្រាក់ដុល្លារមានប្រភពមិនច្បាស់លាស់ជាង៣,៥លានដុល្លារអាមេរិក ពីទីក្រុងហុងកុងចូលមកកម្ពុជា ។
ជនសង្ស័យត្រូវបានតំណាងអយ្យការ អមសាលាដំបូងរាជធានីភ្នំពេញ ចោទប្រកាន់ពីបទសម្អាតប្រាក់ តាមមាត្រា៣ថ្មី និងមាត្រា២៩ថ្មី នៃច្បាប់ស្តីពីការប្រឆាំងការសម្អាតប្រាក់ និងហិរញ្ញប្បទានភេវរកម្ម ។ ក្រោយពីតំណាងអយ្យការបានចោទប្រកាន់ជាផ្លូវការ ជនសង្ស័យត្រូវបានចៅក្រមស៊ើបសួរសម្រេចឃុំខ្លួនដាក់ពន្ធនាគារប៉េហ្ស៊ី ជាបណ្តោះអាសន្ន ដើម្បីបើកការស៊ើបអង្កេត និងឈានដល់បើកសវនាការជំនុំជម្រះក្តីនាពេលខាងមុខនេះ ។
ទាក់ទិននឹងការរឹបអូសប្រាក់ជាង៣,៥លានដុល្លារនេះ មជ្ឈដ្ឋាននានាបានសាកសួរគ្នាថា ប្រាក់ដែលបានដកហូតនោះតើគេយកទៅណា ? អ្នកខ្លះនិយាយបែបកំប្លែងថា វាដូចជាគ្រឿងញៀន ឬវត្ថុបទល្មើសដែរ នឹងត្រូវយកទៅដុតចោល តែការពិតនរណាដាច់ចិត្តយកលុយវាល់លានទៅដុតបំផ្លាញចោលនោះ ។ ទីបំផុត គឺច្បាស់ហើយ ប្រាក់នោះត្រូវបានផ្ញើទុកនៅធនាគារជាតិនៃកម្ពុជា ៕
ចែករំលែកព័តមាននេះ