ច្បាស់ណាស់ថា ការសេពគប់ជារឿងសំខាន់បំផុត ព្រោះនៅក្នុងសង្គមមានមនុស្សច្រើនប្រភេទទាំងអ្នកប្រព្រឹត្តល្អ និងអ្នកធ្វើអាក្រក់គឺទៅទាំងព្រមតែម្តង ដូច្នេះការសេពគប់ក៏គួរមើលមនុស្សផង បើសេពគប់ប៉ះចំមនុស្សល្អនឹងបានជាប្រយោជន៍ តែបើប៉ះចំជនសង្គមងងឹតក៏នឹងនាំទុក្ខកង្វល់ដល់ខ្លួនជាក់ជាមិនខាន ។ កាលបើក្នុងសង្គមសម្បូរទៅដោយអំពើទុរយសដូចជា បងតូច…
ច្បាស់ណាស់ថា ការសេពគប់ជារឿងសំខាន់បំផុត ព្រោះនៅក្នុងសង្គមមានមនុស្សច្រើនប្រភេទទាំងអ្នកប្រព្រឹត្តល្អ និងអ្នកធ្វើអាក្រក់គឺទៅទាំងព្រមតែម្តង ដូច្នេះការសេពគប់ក៏គួរមើលមនុស្សផង បើសេពគប់ប៉ះចំមនុស្សល្អនឹងបានជាប្រយោជន៍ តែបើប៉ះចំជនសង្គមងងឹតក៏នឹងនាំទុក្ខកង្វល់ដល់ខ្លួនជាក់ជាមិនខាន ។
កាលបើក្នុងសង្គមសម្បូរទៅដោយអំពើទុរយសដូចជា បងតូច បងធំ ផឹកស៊ី ស្រីញី អូនបង ថ្នាំញៀន រាំច្រៀងជាដើម នឹងអាចធ្វើឲ្យកូនបែរងាកទៅតាមសង្គមអូសទាញ បើឪពុកម្តាយមិនបានអប់រំឱ្យបានល្អ។ ព្រោះហេតុនោះអាណាព្យាបាលត្រូវប្រុងប្រយ័ត្នជានិច្ច កុំឲ្យកូនសេពគប់បុគ្គលដែលមានចរិតមិនល្អ នឹងអាចនាំកូនទៅរកផ្លូវងងឹត ត្រូវព្យាយាមហាមឃាត់កូនមិនឲ្យដើរជាមួយបុគ្គលប្រភេទនេះជាដាច់ខាត ។
សព្វថ្ងៃនេះជាសម័យកាលទំនើបធ្វើឱ្យមនុស្សមាន លោភៈ ទោសៈ មោហៈច្រើន ឃើញគុណជាទោស ឃើញទោសជាគុណត្រឡប់ត្រឡិនអស់ ដូច្នេះឥទ្ធិពលខាងក្រៅនឹងនាំឲ្យមនុស្សខូចបាន ត្រូវប្រុងប្រយ័ត្នឲ្យមែនទែនមិនត្រូវធ្វើលំៗ សើៗនោះទេ ។
ឪពុកម្តាយជាឥទ្ធិពលទី១របស់កូន ព្រោះការអាស្រ័យគ្នារាល់ថ្ងៃ កាលបើឪពុកម្តាយប្រព្រឹត្តធ្វើឲ្យមានកំហុស ក៏ធ្វើឲ្យកូនយកធ្វើជាគំរូមានចិត្តលិចចុះក្នុងហេតុមិនប្រក្រតីដូចជា ការឈឺចាប់ក្នុងចិត្ត មានការខ្មាសអៀនអ្នកជិតខាង កិត្តិយសគ្រួសារត្រូវសាបសូន្យ ព្រោះទង្វើមិនល្អរបស់ឪពុកម្តាយ រហូតដល់កូនទៅប្រព្រឹត្តអំពើមិនគប្បី ។
ដូច្នេះដើម្បីឱ្យកូនដើរតាមផ្លូវល្អ ឪពុកម្តាយហ្នឹងហើយជាគ្រូដំបូងរបស់កូន ត្រូវធ្វើទង្វើណាដែលល្អសម្រាប់កូនយកជាគំរូ ។
ចែករំលែកព័តមាននេះ